پرەزيدەنت, مەنىڭ ويىمشا, بولعان وقيعالاردان تولىق قورىتىندى جاساپ, ماڭىزدى ماسەلەلەردى قوزعادى.
مەنىڭ ويىمشا, بۇل اشىق اڭگىمە – حالىققا بۇدان دا ماڭىزدى مالىمدەمەلەردىڭ باسى.
ەڭ الدىمەن, قاسىم-جومارت توقاەۆتىڭ «Qazaqstan» تەلەارناسىنىڭ جۋرناليسىمەن سۇحباتىنداعى ءۇش نەگىزگى تاقىرىپتى اتاپ وتكىم كەلەدى.
پرەزيدەنت قازاقستان ۇقشۇ-نىڭ بىزگە كورسەتكەن كومەگى ءۇشىن ەشكىمگە جانە ەشنارسەگە مىندەتتى ەمەس ەكەنىن ەرەكشە اتاپ ءوتتى. بارلىعى ورتاق مۇددە ءۇشىن جاسالدى.
مەن ءوزىم جاقىندا عانا قسزي ديرەكتورى بولىپ تاعايىندالدىم. بۇعان دەيىن 4 جىل رەسەي فەدەراتسياسىندا ديپلومات بولىپ قىزمەت ەتتىم. سوندىقتان ءبىزدىڭ ەلدەرىمىز اراسىنداعى اۋەلدەن كەلە جاتقان بەيبىت قارىم-قاتىناستار تۋرالى جاقسى بىلەمىن.
وسى سۇحباتىندا مەملەكەت باسشىسى قاسىم-جومارت كەمەل ۇلى توقاەۆ ءبىزدىڭ ەلدەرىمىز اراسىندا ەشقاشان تۇسىنىسپەۋشىلىك بولماعانىن جانە بولمايتىنىن ايتتى. ءبىز بارلىق دەڭگەيدە باۋىرلاس حالىقپىز دەپ ايتا الامىز. مەن مۇنى ءوزىم دە راستايمىن. بۇل بوس سوزدەر ەمەس. بۇل – شىندىق. جالپى, شەكارا شەگەندەلگەن, دەليميتاتسيالانعان, دەماركاتسيالانعان.
مەملەكەت باسشىسى اتاپ وتكەندەي, بىزدە رەسەيمەن ەشقانداي شەكارا, جەر ماسەلەلەرى مەن پروبلەما جوق. بىزدە بولاشاققا قاتىستى ۇلكەن جوسپارلار بار.
پرەزيدەنتتىڭ ماعان ۇناعان تاعى ءبىر ويى – ءبىز قاڭتارداعى وقيعالاردان ماڭىزدى ساباق الۋىمىز كەرەك. قازىر تەرگەۋ ءجۇرىپ جاتىر, ماماندار, بەدەلدى زاڭگەرلەر جۇمىس ىستەپ جاتىر.
مەنىڭ ويىمشا, قازىر اسىعىس قورىتىندى جاساۋعا, سونىمەن قاتار جالعان اقپارات تاراتۋعا, ادامداردى قىزىقتىرۋعا بولمايدى. پرەزيدەنت ق.توقاەۆ قوعامنىڭ جوعارى سەنىمىنە يە جانە ول جاساندى ەمەس, سوندىقتان تەرىس پيعىلدىلاردىڭ ويى ىسكە اسپايدى.
قاسىم-جومارت كەمەل ۇلى توقاەۆ ەلدەگى قاڭتار ايىنداعى وقيعالار جونىندەگى تەرگەۋدە ەشكىمگە ءوز بەتىنشە ارەكەت ەتۋگە جول بەرىلمەيتىنىن اتاپ ءوتتى. شەشىمدەر قابىلداۋ كەزىندە اشىقتىق, ايقىندىق جانە ادىلدىك بولۋعا ءتيىس.
ءۇشىنشى ماڭىزدى ماسەلە – جاڭا قازاقستاننىڭ كەلبەتى تۋرالى ايتىلدى. پرەزيدەنت بىزدە بىرتە-بىرتە كۇردەلى رەفورمالار بولاتىنىن ناقتى ايتتى. ەل الدىندا ۇلكەن مىندەتتەر تۇر. قازاقستان – ءبىزدىڭ وتانىمىز. بىزدە باسقا وتان جوق, ءبىز ونىڭ ىرگەسىن بىرگە قالايمىز.
مەملەكەت باسشىسى اتاپ وتكەندەي, جاڭا قازاقستان – ەكونوميكاسى دامىعان, قۇقىقتىق تۇرعىدا ءادىل جانە كۇشتى مەملەكەت. وندا ءار ازامات ءۇشىن ءادىل جانە تەڭ مۇمكىندىكتەر بولادى.
ەركىن تۇقىموۆ,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى, ساياسي عىلىمدار كانديداتى
