تاياۋدا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ ماينينگ ورتالىقتاردىڭ جۇمىسىن رەتتەۋدى تاپسىرعان بولاتىن. تاپسىرمانىڭ العاشقى ناتيجەسى – وسى.
قارجى مونيتورينگى اگەنتتىگى تەكسەرۋ جۇمىستارى بارىسىندا ەكىباستۇز گرەس-1 كاسىپورنى اۋماعىندا ماينينگ داتا-ورتالىقتاردىڭ ۇزدىكسىز جۇمىس ىستەۋى ءۇشىن ەلەكتر ەنەرگياسىن زاڭسىز تۇتىنۋ مەن ساتۋ ءىسى ۇيىمداستىرىلىپ كەلگەنىن انىقتاعان. ەلەكتر ەنەرگياسى جەكەمەنشىك كومپانيا ارقىلى ەكى كاسىپورىنعا تۇراقتى تۇردە تاراتىلىپ كەلگەن. كومپانيانىڭ «رۇقساتتار مەن ەسكەرتۋلەر تۋرالى زاڭعا سايكەس راسىمدەلگەن ەشقانداي ليتسەنزياسى بولماي شىقتى. ستانسادان ەلەكتر جارىعىن «وندىرىستىك قاجەتتىلىك رەتىندە» دەپ كادەگە جاراتىپتى.
ارينە, مۇنداي جاعىمسىز اقپارات ەكىباستۇز گرەس-1 سياقتى الپاۋىت كاسىپورىنعا ابىروي اپەرمەيتىنى تۇسىنىكتى. ىلە-شالا ستانسا باسشىلىعى رەسمي جاۋاپ بەردى.
– ەكىباستۇز گرەس-1 وندىرىستىك الاڭدارىندا ەشقانداي بوگدە ۇيىمدار نەمەسە وبەكتىلەر جوق جانە بولا المايدى. ستانسا اۋماعىندا ماينينگ فەرمالار تابىلدى دەگەن اقپارات شىندىققا جاناسپايدى. اڭگىمە ستانساعا جاقىن ۇيىمداردا انىقتالعان ماينينگ داتا-ورتالىقتارى تۋرالى ايتىلىپ جاتقان بولۋى مۇمكىن. بىراق ولار گرەس-1 اۋماعىندا ورنالاسپايدى. ءارى ستانسانىڭ ولارعا ەشقانداي قاتىسى جوق, – دەيدى كاسىپورىننىڭ ءباسپاسوز قىزمەتى.
نە دەسەك تە, قۇزىرلى ورگاندار ءىستى تەرگەۋدى جالعاستىرۋدا. پرەزيدەنت تاپسىرما بەرمەسە, زاڭسىز ارەكەتتەر اشكەرە بولماي ما سوندا؟ ەنەرگەتيكا مينيسترلىگىنىڭ اقپاراتىنا سۇيەنسەك, بۇعان دەيىن ەنەرگيا بەرۋشى جانە ەنەرگيانى وتكىزەتىن كومپانيالار ماينينگ ورتالىقتاردىڭ ورنالاسقان جەرى تۋرالى اقپارات بەرمەپتى. شىنىمەن بىلمەيدى نەمەسە جاسىرىپ كەلگەن. بۇل ماسەلە دە ءجىتى تەكسەرىلمەك.
پاۆلودار وبلىسى
