ونلاين وتكەن سالتاناتتى وقيعاعا الماتىداعى ەكى كونفۋتسي ينستيتۋتى مەن ءال-فارابي اتىنداعى قازاق ۇلتتىق ۋنيۆەرسيتەتى, لانچجوۋ ۋنيۆەرسيتەتى, ابىلاي حان اتىنداعى قازاق حالىقارالىق قاتىناستار جانە الەم تىلدەرى جانە وڭتۇستىك-باتىس ۋنيۆەرسيتەتتەرى دە ورتاقتاستى.
مەرەيتويلىق شارا بارىسىندا الماتىداعى قحر باس كونسۋلى تسزيان ۆەي حانىم, الماتىداعى قر ءسىم وكىلدىگى جەتەكشىسىنىڭ ورىنباسارى رۋسلان مالىك ۇلى, حالىقارالىق قىتاي ءتىلى ءبىلىم بەرۋ ورتالىعىنىڭ باس حاتشىسى چجاو لينشان, ءال-فارابي اتىنداعى قازۇۋ رەكتورى جانسەيىت تۇيمەباەۆ, لانچجوۋ ۋنيۆەرسيتەتىنىڭ رەكتورى, قىتاي عىلىم اكادەمياسىنىڭ اكادەميگى يان چۋنحۋا, وڭتۇستىك-باتىس ۋنيۆەرسيتەتىنىڭ رەكتورى چجان ۆەيگوي, ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ وقۋ ىستەرى جونىندەگى پرورەكتورى اسەل چاكليكوۆا ءسوز الدى.
قاشىقتان جىلى لەبىزدەرىن جەتكىزگەن قوناقتار وسى وتىز جىلداعى قازاقستان مەن قىتايدىڭ بارلىق سالادا قول جەتكىزگەن تابىستارىن تىلگە تيەك ەتىپ, ونىڭ ناقتى مىسالدارىن اتادى.
ەجەلدەن تاتۋ, ەجەلدەن كورشى ەكى مەملەكەتتىڭ اراسىنداعى ديپلوماتيالىق قارىم-قاتىناستار ەكى ەلدىڭ دامۋىنا عانا ەمەس, ماڭگىلىك ستارەگيالىق ارىپتەستىككە دە قۇرىلعانى اتاپ ايتىلدى.
قوناقتار ەكى ەلدىڭ ەكونوميكالىق جانە الەۋمەتتىك دامۋىندا ەكى جاقتى تاتۋلىق ايماقتىق تۇراقتىلىق ماسەلەسىندە دە اسا ماڭىزدى ءرول اتقاراتىندىعىنا توقتالا كەلە, ەكى مەملەكەتتىڭ كەلەشەگى مۇنان دا جارقىن بولاتىندىعىنا سەنىم ءبىلدىردى.
سالتاناتتى شارادا الماتى قالاسىنداعى ەكى كونفۋتسي ينستيتۋتىنىڭ بەينە-باياندارى كورسەتىلىپ, اتالمىش ينستيتۋتتاردىڭ دامۋى مەن جەتىستىكتەرى جان-جاقتى پاش ەتىلدى. ال ءتورت قۇرىلتايشى-جوو-لاردىڭ وقىتۋشىلارى مەن ستۋدەنتتەرى ەكى ەلدىڭ ديپلوماتيالىق قارىم-قاتىناستىڭ ورناتىلعانىنا 30 جىل تولۋ قۇرمەتىنە تاماشا كونتسەرتتىك باعدارلامالارىن كورسەتتى.
ونلاين-مەرەكە سوڭىندا قوناقتار بەيجىڭدەگى قىسقى وليمپيادا مەن پاراوليمپيادا ويىندارىنا ساتتىلىك تىلەدى.
