قورقىت اتا اتىنداعى قىزىلوردا ۋنيۆەرسيتەتى مەن وبلىستىق دەنە شىنىقتىرۋ جانە سپورت باسقارماسى بىرلەسە ۇيىمداستىرعان تۋرنير ايماقتاعى ءداستۇرلى جارىستاردىڭ بىرىنە اينالعان. وسىدان 17 جىل بۇرىن وبلىستىق دەڭگەيدە وتكەن سايىسقا 2006 جىلدان باستاپ ەلىمىزدىڭ ءار تۇكپىرىنەن كوماندالار قاتىسىپ كەلەدى.
بيىل جارىس الاڭىنان نۇر-سۇلتان, شىمكەنت, بايقوڭىر قالالارى مەن تۇركىستان وبلىسىنان كەلگەن كوماندالار كورىندى. ولارمەن قاتار جەرگىلىكتى «قىزىلوردا جاستارى» مەن «قورقىت اتا اتىنداعى قىزىلوردا ۋنيۆەرسيتەتى» كومانداسى باق سىنادى.
تۋرنير قورىتىندىسى بويىنشا «بايقوڭىر» كومانداسى ءىىى, تۇركىستاندىق «قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى» كومانداسى ءىى ورىن يەلەنسە, «قورقىت اتا اتىنداعى قىزىلوردا ۋنيۆەرسيتەتى» كومانداسى ءبىرىنشى تۇعىردان كورىندى.
تۋرنير جەڭىمپازدارىن ماراپاتتاۋ راسىمىندە قورقىت اتا اتىنداعى قىزىلوردا ۋنيۆەرسيتەتىنىڭ باسقارما توراعاسى – رەكتور بەيبىتكۇل كارىموۆا جاستاردىڭ ءبىلىمدى, تاربيەلى, جىگەرلى بولۋمەن قاتار سالاماتتى ءومىر سالتىن ۇستانۋى, سپورتپەن تۇراقتى تۇردە شۇعىلدانۋى اسا ماڭىزدى ەكەنىن اتاپ ءوتتى. بۇگىندە وقۋ ورداسىندا سپورتتىڭ 11 تۇرىنەن 21 سپورت سەكتسياسى بار..
تۋرنيردە ۇزدىك ويىن كورسەتكەندەر ءتۇرلى نوميناتسيالار يەلەندى.
قىزىلوردا
