توتەنشە جاعداي قىزمەتىنىڭ جەدەل قۇتقارۋ جاساعى تاياۋدا عانا دۇلەي بوراننىڭ وتىندە ورتا جولدا قالعان جولاۋشىلاردى قۇتقارۋ بويىنشا بىرنەشە وپەراتسيانى ءساتتى وتكىزدى. قۇتقارۋشىلار قار قۇرساۋىنان 32 ادامدى امان-ەسەن الىپ شىققان. ەۆاكۋاتسيالانعانداردىڭ اراسىندا 2 بالا بار.
تج دەپارتامەنتى ءباسپاسوز قىزمەتىنىڭ مالىمەتىنشە, 13 اقپان كۇنى ساعات 06:25-تە ارقالىق – امانگەلدى اۆتوجولىنىڭ 20-شاقىرىمىندا 3 جەڭىل اۆتوكولىك قار قۇرساۋىندا قالعان. ءۇش كولىكتىڭ ىشىندە 15 ەرەسەك ادام جانە 2 بالا بولعان.
– جولاۋشىلار ساعات 08:22-دە جول تالعامايتىن «ۇقك-600» ارنايى تەحنيكاسىمەن ارقالىق قالاسىنا امان-ەسەن جەتكىزىلدى. زارداپ شەككەندەر جوق. سول كۇنى كەشكى ساعات 19:00-دە ارقالىق – تورعاي باعىتىنداعى كۇرە جولدىڭ بويىندا, ارقالىق قالاسىنان 100 شاقىرىم جەردە قار قۇرساۋىندا قالعان 4 جەڭىل اۆتوكولىك قۇتقارىلدى. بۇل كولىكتەردەگى 15 جولاۋشى ارنايى قۇتقارۋ تەحنيكاسىنىڭ كومەگىمەن ارقالىق قالاسىنا جەتكىزىلدى. جولاۋشىلاردىڭ دەنەسىن ۇسىك شالماعان, ءبارى ءدىن امان بولعاندىقتان, مەديتسينالىق كومەكتەن باس تارتتى, – دەپ مالىمدەدى تجد ءباسپاسوز قىزمەتى.
قوستاناي وبلىسى
