«ەندى مۇراعات ءىسى سالاسىنا قاتىستى. رەسپۋبليكادا 229 مەملەكەتتىك مۇراعات جۇمىس ىستەيدى. بۇل رەتتە مەملەكەتتىك مۇراعاتتاردىڭ تيپتىك مامانداندىرىلعان عيماراتتارىنىڭ جەتىسپەۋشىلىگى بايقالادى, ولاردىڭ ۇلەسى تەك 14,7%-دى قۇرايدى», دەدى قر مادەنيەت جانە سپورت ءمينيسترى داۋرەن اباەۆ ۆەدومستۆونىڭ كەڭەيتىلگەن وتىرىسىندا.
ءمينيستردىڭ ايتۋىنشا, جۇرگىزىلگەن تالداۋ رەسپۋبليكا بويىنشا 128 نىسان سالۋ قاجەتتىگىن انىقتادى.
ول جەتەكشىلىك ەتەتىن ۆيتسە-مينيسترگە جەرگىلىكتى اتقارۋشى ورگاندارمەن بىرلەسىپ مۇراعات قويمالارىنىڭ كولەمىن ۇلعايتۋ ماسەلەسىن پىسىقتاۋدى تاپسىردى.
«سونىمەن قاتار, نەگىزگى سەرۆەر ىستەن شىققان جاعدايدا «ە-مۇراعاتتى» رەزەرۆتىك سەرۆەرلەرمەن قامتاماسىز ەتۋ ماسەلەسىن باقىلاۋعا الۋ قاجەت. سونداي-اق مەملەكەتتىك ورگانداردىڭ ۇلتتىق جانە وڭىرلىك مۇراعاتتارمەن ءوزارا ءىس-قيمىل پروبلەماسى بار. جۇيەلەردى بىرىكتىرۋ رەسمي تۇردە جۇزەگە اسىرىلدى, بىراق ءىس جۇزىندە ول تولىق جۇمىس ىستەمەيدى. بۇل ۇلتتىق قاۋىپسىزدىك ماسەلەسى. مەن ونى جەكە باقىلاۋىمدا ۇستايمىن», دەدى داۋرەن اباەۆ.
