قما تۇسىندىرگەندەي, اۋديتورلىق ۇيىمدار ءوز قىزمەتتەرىن كورسەتە وتىرىپ, كليەنتتەردىڭ جۇمىسىنداعى ولقىلىقتاردى انىقتاۋ ءۇشىن ولاردىڭ قارجىلىق قىزمەتىن تەكسەرەدى, سالىق سالۋ, كاسىپورىننىڭ ەسەپ ساياساتى جانە ت.ب. ماسەلەلەرى بويىنشا كەڭەس بەرەدى, سوندىقتان ولار كولەڭكەلى سحەمالاردىڭ بەلگىلى ءبىر بەلگىلەرىن, اتاپ ايتقاندا سالىق سالۋدان جالتارۋدى, بيۋدجەت قاراجاتىن ۇرلاۋدى, قاراجاتتى زاڭسىز شىعارۋدى جانە وففشورعا اۋدارۋدى ۋاقتىلى انىقتاي الادى.
«وسىعان بايلانىستى اۋديتورلىق ۇيىمدار قارجى مونيتورينگى سۋبەكتىلەرىنىڭ تىزبەسىنە ەنگىزىلگەن جانە ولارعا كىرىستەردى جىلىستاتۋعا جانە تەرروريزمدى قارجىلاندىرۋعا قارسى ءىس-قيمىل تۋرالى زاڭنىڭ بارلىق تالاپتارى قولدانىلادى», دەپ جازادى اگەنتتىكتىڭ ءباسپاسوز قىزمەتى.
قازاقستاندا 484 اۋديتورلىق ۇيىم جۇمىس ىستەيدى جانە ولاردىڭ 418-ءى قارجى مونيتورينگى اگەنتتىگىنىڭ قارجى وپەراتسيالارى تۋرالى دەرەكتەردى جيناۋ جۇيەسىندە تىركەلگەن.
ۆەدومستۆو اتاپ وتكەندەي, دەرەكتەردى جيناۋ جۇيەسىندە تىركەلگەن اۋديتورلىق ۇيىمداردىڭ از بولىگى عانا شەكتى جانە كۇدىكتى وپەراتسيالار تۋرالى حابارلامالار جىبەرەدى.
اگەنتتىك ءوز كەزەگىندە جوعارىدا كورسەتىلگەن مالىمەتتەردى كەيىننەن تەكسەرۋ جانە قاجەتتى شارالار قابىلداۋ ءۇشىن اۋديتورلىق ۇيىمداردىڭ رەتتەۋشىسى - ىشكى مەملەكەتتىك اۋديت كوميتەتىنە جىبەرەدى.
تەكسەرۋ قورىتىندىسى بويىنشا كىرىستەردى جىلىستاتۋعا جانە تەرروريزمدى قارجىلاندىرۋعا قارسى ءىس-قيمىل تۋرالى زاڭ تالاپتارىنىڭ ساقتالماۋ فاكتىلەرىنىڭ انىقتالۋى وسىنداي اۋديتورلىق كومپانيالاردىڭ ىسكەرلىك بەدەلىنە ەلەۋلى نۇقسان كەلتىرەدى, دەپ اتاپ ءوتتى اگەنتتىكتە.
ءوز كەزەگىندە افم قىلمىستىق اقشانى زاڭداستىرۋعا قارسى ءىس-قيمىلدا اۋديتورلىق ۇيىمدارمەن ديالوگ جۇرگىزۋگە دايىن ەكەندىگىن ءبىلدىردى.
