قايتا ورالمايتىن ۋاقىت سەكىلدى تاريح تا توقتامايدى. بۇگىنگى سەرپىلىس جاسار جاۋاپتى كەزەڭدە بىزگە باسشىلىق ەتۋ قاسىم-جومارت كەمەل ۇلىنا جۇكتەلىپ وتىر.
ءبىراز جىلدان بەرى جۇمىس بابىندا, ادامدىق قارىم-قاتىناستا بولعان ازاماتتىڭ ءبىرى رەتىندە پرەزيدەنتتىڭ ۇستامدى مىنەزى, ءار سوزىنە, وزىنە ۇلكەن جاۋاپكەرشىلىكپەن قارايتىنى, ءبىز تانىسقالى وتكەن بەس لاۋازىمىندا ەش وزگەرمەگەنى ەرەكشە قاسيەتتەر دەر ەدىم.
سوندىقتان پرەزيدەنتىمىزدىڭ بەرگەن ۋادەلەرى, باعىت-باعدارلامالارى, باستامالارى جاڭاعىداي قاسيەتتەر مەن دۇنيەجۇزىلىك ساياسات باسىندا بولعان تاجىريبەلەرىنەن, ەلىمىزدەگى وسى كەزەڭدەگى قاجەتتىلىكتەن تۋىنداعان دەپ ويلايمىن.
وتىز جىلدا قول جەتكىزگەن جەتىستىكتەرىمىزدى ەلەكتەن وتكىزىپ, كەمشىلىكتەرىمىزدى توقتاتىپ, قايتالاماۋعا شاقىرىپ, جاڭا كەزەڭگە جول باستاعان پرەزيدەنتىمىزگە قولداۋ كورسەتىپ, وزىمىزگە دە جاۋاپكەرشىلىكپەن قاراپ, بوي تۇزەيتىن كۇندەردە ءومىر ءسۇرىپ جاتىرمىز.
ەل ارداگەرلەرى حالقىمىزدىڭ, اسىرەسە جاستاردىڭ عاسىرلار بويى قالىپتاسقان رۋحاني قۇندىلىقتاردى, ەلگە, جەرگە دەگەن سۇيىسپەنشىلىكتى قاستەرلەپ, ءبىلىمدى, تاربيەلى, ەڭبەكقور بولىپ قالىپتاسۋىنا جۇيەلى ىقپال ەتۋدە.
الەمدىك جاھاندانۋ داۋىرىندە, كەرەكتى باعىتتاردى يگەرۋمەن قاتار, ءتىلىمىز بەن ءدىنىمىزدى, ادەبيەتىمىز بەن مادەنيەتىمىزدى, تاريحىمىزدى, ۇلتتىق ادەت-عۇرپىمىزدى ساقتاۋ ۇلكەن سىن.
ەكىنشى دۇنيەجۇزىلىك سوعىستاعى جەڭىستىڭ 75 جىلدىعى قارساڭىندا 2020 جىلدىڭ مامىر ايىندا شىققان «ارداگەرلەر تۋرالى» زاڭ ءۇشىن ەل ارداگەرلەرى ريزا. سونان بەرى دە ەكى زاڭدا وزگەرىستەر مەن تولىقتىرۋلاردا ارداگەرلەر ءۇشىن قوسىمشا باپتار قاراستىرىلىپ, ءبىر زاڭ كۇشىنە ەندى.
سوڭعى جىلدارى ارداگەرلەر «دانەكەر» قاناتقاقتى جوباسىن جۇزەگە اسىرىپ, ءار ايماقتا جۇزدەگەن داۋلى ماسەلەنى سوتقا جەتكىزبەي بىتىمگەرشىلىكپەن كەلىسىمگە كەلتىرۋدە. بۇل جۇمىس ءبىر جاعىنان, سوت جۇيەسىنىڭ جۇمىسىن جەڭىلدەتسە, ەكىنشىدەن, ادامدار اراسىنداعى قارىم-قاتىناستى وڭالتۋعا سەپتىگىن تيگىزۋدە.
بۇل ماسەلەنى جانە ارداگەرلەر ۇيىمدارى جاساپ جاتقان باسقا دا جۇمىستاردى قاسىم-جومارت كەمەل ۇلىنىڭ قابىلداۋىندا بولعانىمدا بايانداپ, پرەزيدەنتىمىزدىڭ قولداۋىن الدىق.
ارداگەرلەر قازىرگى جاڭا باعىتتا جاسالىپ جاتقان جۇمىستارعا ۇلكەن سەنىممەن قاراپ, ءوز تاراپتارىنان قىزمەت ەتۋدە.
ەلۋ جىلدان استام ۋاقىت ەلدە, ءبىراز جىل شەتەلدە وندىرىستە, عىلىمي ورتادا, ۇكىمەتتە, اتقارۋشى, زاڭ شىعارۋشى ورىنداردا قىزمەت اتقارىپ, ءبىر بولەك ءومىر كورگەن ازامات رەتىندە ايتارىم, ءبىز بولاشاقتى تەك ءوزىمىز عانا جاسايمىز.
ولاي بولسا, ىشتەن, سىرتتان ءوز جاعدايلارىنا ريزا بولماي, ءوز ىسىنە, ءوز باسىنا جاۋاپ بەرۋدىڭ ورنىنا جاۋ ىزدەپ, سۇرقيا نيەتىنە بەت بۇرىپ, حالىق اراسىنا ىرىتكى سالىپ, ەل تىنىشتىعىن بۇزۋعا شاقىرعانداردان ساقتانا ءبىلۋىمىز كەرەك. ونى كەشەگى قاڭتار وقيعاسى ايقىن كورسەتتى. كوپتەگەن كەمشىلىگىمىزدىڭ دە بەتى اشىلدى. اششى دا بولسا ساباق العانىمىزدى مويىنداۋىمىز كەرەك.
سوندىقتان «قالاي ەكەنىن بىلمەيمىن, بىراق ولاي ەمەس» دەگەن پىكىردەن بوساپ, ءار قازاقستاندىق ءوز پىكىرىن ويلانىپ, ورتاعا سالىپ, بىزگە تاريح پەن تاعدىردىڭ ءناسىپ ەتكەن كەزەڭىندە باسشىمىز قاسىم-جومارت كەمەل ۇلىنىڭ جاڭا باستامالارىنا تەرەڭ تۇسىنىكپەن قاراپ, ءوز ۇلەسىمىزدى قوسۋىمىز كەرەك. بۇل – زامان تالابى.
باقتىقوجا ىزمۇحامبەتوۆ,
مەملەكەت جانە قوعام قايراتكەرى,
قازاقستان رەسپۋبليكاسى «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ توراعاسى
