– ورتالىقتا جىل سايىن 6 مىڭعا جۋىق جۇكتى ايەل بوسانادى. ءبىز جاڭا تۋعان نارەستەلەرگە, جاس بوسانعان انالارعا جان-جاقتى مەديتسينالىق كومەك كورسەتەمىز. اسىرەسە, سالماعى وتە تومەن نارەستەلەردى ەمدەۋگە كوپ كوڭىل بولىنەدى. ءبىزدىڭ رەانيماتسيا 10 ورىنعا شاقتالعان, مۇندا جىلىنا 600-گە جۋىق شالا تۋعان بالا قارقىندى تەراپياعا ارنالعان ينكۋباتورلاردا دارىگەرلەردىڭ كومەگىمەن جەتىلەدى. نەوناتالدى پۋلسوكسيمەترلەر جاڭا تۋعان نارەستەلەردىڭ ورتالىق جۇيكە جۇيەسىنىڭ ساقتالۋىنا تىكەلەي اسەر ەتەتىن قاننىڭ وتتەگىمەن قانىعۋ دەڭگەيىن ءدال جانە تەز انىقتاۋعا مۇمكىندىك بەرەدى. سوندىقتان بىزگە ناعىز كەرەك مەديتسينالىق قۇرالداردى تارتۋ ەتكەن قورعا جانە وسى قورعا قولداۋ كورسەتكەن كومپانياعا العىس بىلدىرەمىز, – دەيدى وبلىستىق اۋرۋحانانىڭ باس دارىگەرىنىڭ ورىنباسارى ارمان بايماعامبەتوۆ.
اتالعان قايىرىمدىلىق قورى 15 جىلدان بەرى ەلىمىزدەگى پەريناتالدىق ورتالىقتار مەن بالالار اۋرۋحانالارىنىڭ جانساقتاۋ بولىمدەرىن جابدىقتاۋ جۇمىستارىمەن اينالىسىپ كەلەدى. بىلتىر «ايالانىڭ» ء«ومىر سىيلايىق» جوباسى اياسىندا ەلىمىزدەگى پەرزەنتحانالار ءۇشىن 199 ملن تەڭگەگە 80 رەانيماتسيالىق مەديتسينالىق تەحنيكا ساتىپ الىنعان. قور باسشىسى ايدان سۇلەيمەنوۆانىڭ ايتۋىنشا, 2021 جىلى جينالعان قارجىعا بيىل قاڭتار ايىندا الماتىداعى اكۋشەرلىك, گينەكولوگيا جانە پەريناتولوگيا عىلىمي ورتالىعىنا ەكى جاساندى تىنىس الۋ اپپاراتى مەن ەكى فوتوتەراپيا شامى ورناتىلعان.
قوستاناي وبلىسى
