جۇمادا جەرلەستەرىمىز سپورتتىڭ ءتورت ءتۇرى بويىنشا سايىسقا ءتۇستى. سولاردىڭ اراسىنان شورت-ترەك شەبەرلەرى عانا ءتاۋىر ناتيجە كورسەتتى. ەرلەردىڭ 500 مەترلىك باسەكەسىندە باق سىناعان دەنيس نيكيشا, ءادىل عالياحمەتوۆ جانە ابزال اجىعاليەۆ سىندى سايىپقىراندار ىرىكتەۋ سىنىنان ىركىلمەي ءوتىپ, شيرەك فينالعا جولداما الدى. وسى ورايدا ءوز توبىندا دەنيس پەن ابزال ءبىرىنشى ورىن السا, ءادىل مارە سىزىعىن ەكىنشى بولىپ قيىپ وتكەنىن ايتا كەتكەن ءجون.
شاڭعىشىلار كلاسسيكالىق ادىسپەن 15 شاقىرىمعا جۇگىردى. بۇل قاشىقتىقتا 30 جاستاعى فينليانديالىق سپورتشى يۆو حەنريك نيسكانەنگە تەڭ كەلەر ەشكىم تابىلمادى. وسىلايشا, سۋومي ەلىنىڭ وكىلى قاتارىنان ءۇش بىردەي وليمپيا ويىندارىندا باس جۇلدەنى ولجالادى. بۇعان دەيىن نيسكانەن 2014 جىلى سوچي جانە 2018 جىلى پحەنچحانداعى ويىنداردا اتوي سالعان. كۇمىس مەدالدى رەسەيلىك الەكساندر بولشۋنوۆ يەلەنسە, نورۆەگيالىق يوحاننەس حەسفلوت كلەبو قولاعا قول سوزدى. وسى جارىستا سىنعا تۇسكەن قازاقستاننىڭ قوس شاڭعىشىسىنىڭ ونەرى كوڭىلدەن شىقپادى. ۆيتالي پۋحكالو 25-ورىندى ەنشىلەسە, ەۆگەني ۆەليچكو 40-ورىندا قالىپ قويدى.
بياتلونشىلاردىڭ سپرينتىندە نەگىزگى باسەكەلەستىك سكانديناۆيا تۇبەگىنىڭ قوس سۇلۋى – 31 جاستاعى نورۆەگيالىق مارتە ولسبيۋ-رويسەلانن مەن 22 جاسار شۆەتسيالىق ەلۆيرا ەبەرگ اراسىندا ءوربىدى. ەكەۋى بىرازعا دەيىن تارتىستى. ناتيجەسىندە, تاجىريبەلى ولسبيۋ-رويسەلانن كوزدەگەن ماقساتىنا قول جەتكىزىپ, التىننان القا تاقتى. ەدبەرگ ەكىنشى ورىندى قاناعات تۇتسا, يتاليالىق دوروتەيا ۆيرەر ءۇشىنشى ساتىعا تابان تىرەدى. وتانداستارىمىز اراسىنان تەك گالينا ۆيشنەۆسكايا-شەپورەنكو جارىس جولىنا شىقتى. ول 52-ورىنعا تۇراقتادى.
شاڭعىمەن ترامپليننەن سەكىرۋشىلەرىمىز دە سەنىم ۇدەسىنەن شىعا المادى. ەرەجەگە ساي جارىستىڭ فينالدىق بولىگىنە تەك ۇزدىك 50 سپورتشى عانا جولداما الادى. وكىنىشكە قاراي, جەرلەستەرىمىز بەلگىلەنگەن مەجەدەن كورىنە المادى. بۇل باسەكەدە دانيل ۆاسيلەۆ 51-ساتىعا جايعاسسا, سەرگەي تكاچەنكو 54-ورىندا تۇراقتادى.
سەنبىدە التى جۇلدە جيىنتىعى ساراپقا سالىندى. قازاقستان قۇراما كومانداسىنىڭ مۇشەلەرى ءۇش سپورت تۇرىنەن سىنعا ءتۇستى. شاڭعىشىلاردىڭ 4ح5 شاقىرىمدىق ەستافەتاسىندا قۇرامىندا نادەجدا ستەپاشكينا, كسەنيا شالىگينا, انگەلينا شۋرىگا جانە ۆالەريا تيۋلەنەۆا بار وتانداستارىمىز جارىستى 15-ورىنمەن قورىتىندىلادى. بۇل باسەكەدە رەسەيدىڭ ەكپىنىنە ەشكىم شىداي المادى. ەكىنشى جانە ءۇشىنشى ورىنداردى گەرمانيا مەن شۆەتسيا يەمدەندى.
كونكيشىلەر باسەكەسىن جەرگىلىكتى جانكۇيەرلەر تاعاتسىزدانا كۇتتى. سەبەبى سول جارىستا كۇللى قىتايدىڭ ماقتانىشى گاو تينيۋ باق سىنادى. بۇل سپورتشىعا بەكەر سەنىم ارتىلماعان ەكەن. 500 مەترلىك قاشىقتىقتى 34,32 سەكۋندتا جۇگىرىپ وتكەن ول باس جۇلدەنى ولجالاۋمەن قاتار, وليمپيادالىق رەكوردتى جاڭارتتى. كورەيالىق چا مين كيۋ كۇمىس مەدالدى موينىندا جارقىراتسا, جاپونيالىق موريسيگە ۆاتارۋ قولا جۇلدەنى ەنشىلەدى. وسى جايتتىڭ ءوزى قىسقا قاشىقتىقتا ازيا قۇرلىعى وكىلدەرىنىڭ الدىنا ەشكىم تۇسە المايتىنىن اڭعارتتى. ءبىزدىڭ يۆان ارجاننيكوۆ 35.82 سەكۋندتىق كورسەتكىشپەن 28-ورىنعا تابان تىرەدى.
بياتلونشىلاردىڭ 10 شاقىرىمدىق سپرينتىندە قازاقستاننىڭ نامىسىن ۆلاديسلاۆ كيرەەۆ پەن الەكساندر مۋحين قورعادى. بىراق ەكەۋىنەن دە قايىر بولمادى. مۋحين 49-ورىن السا, كيرەەۆ 77-ساتىعا جايعاستى. سپورتتىڭ بۇل تۇرىندە اعايىندى بەلەردىڭ باعى جاندى. 28 جاستاعى يوحاننەس وسى وليمپيادادا ەكىنشى مارتە جەڭىس تۇعىرىنىڭ ەڭ بيىك ساتىسىنا كوتەرىلسە, ونىڭ تۋعان اعاسى تارەي قولا مەدالدى يەلەندى. 33 جاستاعى نورۆەگيالىق سپورتشى عالامدىق دودانىڭ العاشقى التىنىنا وسىدان 12 جىل بۇرىن ۆانكۋۆەردە قول جەتكىزگەن بولاتىن. ودان بولەك, تارەي بەنىڭ قورجىنىندا الەم چەمپيوناتىنىڭ 11 التىنى, 2 كۇمىسى جانە 8 قولاسى بار. ەندى اعاسىنىڭ جەڭىستى جولىن جالعاستىرۋعا يوحاننەس ەرەكشە قۇلشىنىسپەن كىرىستى. فرانتسيانىڭ بەتكەۇستارى كەنتەن فيون مايە قولا جۇلدەنى قانجىعاسىنا بايلادى.
ءسوز ورايى كەلگەندە, سەمەن ەليستراتوۆ جايىندا ءبىر-ەكى اۋىز ءسوز ايتا كەتسەك, ەش ايىبى جوق دەپ ويلايمىز. 31 جاستاعى رەسەيدىڭ شورت-ترەك شەبەرى 1500 مەترلىك قاشىقتىقتا قولا مەدالدى يەلەندى. ول سوڭعى كەزدەرى ءوزىنىڭ جەكە جاتتىقتىرۋشىسى, بۇل كۇندەرى قازاقستان ۇلتتىق قۇراماسىنىڭ كەڭەسشى-باپكەرى قىزمەتىن اتقارىپ وتىرعان اندرەي ماكسيموۆپەن بىرگە ءبىزدىڭ ەلدە جاتتىعىپ ءجۇر. بەيجىڭدەگى باسەكەدەن كەيىن ول باق وكىلدەرىنە بەرگەن سۇحباتىندا «مەن قوناقجاي قازاق حالقىنا باسىمدى ءيىپ تۇرىپ, العىس ايتقىم كەلەدى. وليمپيا ويىندارى قارساڭىندا ولار ءبىزدىڭ ەش الاڭسىز جاتتىعۋىمىز ءۇشىن قولايلى جاعدايدىڭ بارلىعىن جاسادى. ۇلتتىق وليمپيادا كوميتەتىنە دە ريزاشىلىعىم شەكسىز. سول سەبەپتى دە مەنىڭ بەيجىڭدەگى مەدالىم بارلىعىمىزعا ورتاق. شورت-ترەك سپورتى قازاقستاندا دا قارىشتاپ دامىپ كەلەدى. سوعان مەن قاتتى قۋانىپ وتىرمىن. اسىرەسە ءادىل عالياحمەتوۆكە ريزامىن. بۇل – ونىڭ العاشقى وليمپياداسى. مەن وعان ء«ادىل, ەرىنبەي ەڭبەكتەن, سوندا سەن دە جەڭىس تۇعىرىنا كوتەرىلەسىڭ. سەن جاسسىڭ, كەلەشەكتە ءالى تالاي بەلەستەردى باعىندىراسىڭ. بارلىعى دا ەڭبەك پەن تاباندىلىق ارقىلى كەلەدى», دەپ سان قايتالاۋدان جالىققان ەمەسپىن. باسقا دا جىگىتتەردىڭ اياقالىسى قۋانتادى. ءدال وسى كوماندا كەلەشەكتە تولاعاي تابىستارعا قول جەتكىزەتىنىنە سەنىمدىمىن», دەپ سەمەن اقتارىلا سويلەدى.
جەكسەنبىگە دەيىنگى جاعدايعا كەلسەك, گەرمانيا مەن نورۆەگيا قۇرامالارى جالپىكوماندالىق ەسەپتە كوش باسىندا قاتار كەلەدى. نەمىستەر 8 التىن, 5 كۇمىس جانە 1 قولانى ولجالاسا, سكانديناۆيالىقتار 8 التىن, 3 كۇمىس جانە 6 قولانى ەنشىلەدى. وسى قوس مەملەكەت وكىلدەرىنىڭ قايسى سۋرىلىپ شىعاتىنى الداعى كۇندەرى بەلگىلى بولادى. ءۇشىنشى ورىنداعى اقش سپورتشىلارىنىڭ 13 (5 التىن+5 كۇمىس+1 قولا) جۇلدەسى بار. ءتورتىنشى جانە بەسىنشى ساتىلارعا نيدەرلاند (5+4+2) پەن شۆەتسيانىڭ (5+2+3) ورەندەرى جايعاستى. سونداي-اق «توپ-10» كوماندانىڭ قاتارىندا اۋستريا (4+6+4), قىتاي (4+3+1), رەسەي (3+4+6), يتاليا (2+5+4) جانە جاپونيا (2+3+5) قۇرامالارى بار.
