ايتا كەتسەك, ءفيلمنىڭ رەجيسسەرى اتالعان كورسەتىلىمگە قاتىسا المادى, الايدا شەتەلدىك كورەرمەندەرگە وتاندىق تۋىندىنى پروديۋسەر يۋليا كيم جانە اكتريسا گۇلجان تۇزەلباەۆا تانىستىردى.
ء«فيلمنىڭ تۇساۋكەسەرىنە قاتىسىپ وتىرعانىمىزعا وتە قۋانىشتىمىز. ۇيىمداستىرۋشىلارعا العىسىمىز شەكسىز. رەجيسسەر دارەجان ومىرباەۆ بۇگىنگى بەلگىلى سەبەپتەرگە بايلانىستى كورسەتىلىمگە قاتىسا المادى. مەنىڭ ويىمشا شىنايى ونەرگە بەرىلگەن جاندار بۇل فيلمنەن وزدەرىن كورە الادى. مەن فيلمدەگى باستى كەيىپكەر وبرازىنان رەجيسسەردىڭ ءوزىن كورىپ تۇرعانداي بولامىن. وسى كينوتۋىندىنىڭ جارىق كورۋىنە اتسالىسۋعا مۇمكىندىك بەرگەن دارەجان ومىرباەۆقا العىسىمدى بىلدىرەمىن», دەدى كورسەتىلىم الدىندا يۋليا كيم.
قازاقستاندىق كينوتۋىندى بەرلين كينوفەستيۆالى كورەرمەندەرىنىڭ قىزىعۋشىلىعىن تۋدىرعانىن ايتا كەتۋ كەرەك. بۇل كورسەتىلىمگە بيلەتتەر بىرنەشە كۇن بۇرىن ساتىلىپ كەتكەن ەكەن. تۇساۋكەسەرگە كەلگەن قوناقتاردىڭ اراسىندا دارەجان ومىرباەۆتىڭ شىعارماشىلىعىمەن بۇرىننان تانىس كورەرمەندەر دە بولدى.
«اقىن» ءفيلمى تەحنولوگيالار دامىعان قازىرگى زاماندا ونەردىڭ قوعامدا الاتىن ورنى تۋرالى وي قوزعاپ, پوەزياعا سۇرانىس ازايعان داۋىردە اقىننىڭ كۇيىنىشى تۋرالى سىر شەرتەدى. قازاق حالقىنىڭ XIX عاسىرداعى ەڭ كورنەكتى اقىندارىنىڭ بىرى ماحامبەت وتەمىس ۇلىنىڭ قيلى تاعدىرى جايىندا ويعا باتقان باستى كەيىپكەر نازىك جۇرەكتى اقىنداردىڭ ءومىرى قاشان دا قيىن بولعانىن تۇسىنەدى. ءفيلمنىڭ ستسەناريى نەمىس جازۋشىسى گەرمان گەسسەنىڭ «اۆتورلىق كەش» اتتى اۆتوبيوگرافيالىق اڭگىمەسى جەلىسىمەن جازىلعان. فيلمدەگى باستى ءرولدى «جىگىتتەر» توبىنىڭ ءانشىسى ەردوس قاناەۆ سومدايدى.
ەسكە سالا كەتسەك, اتالعان فيلم توكيودا وتكەن حالىقارالىق كينوفەستيۆال شەڭبەرىندە العاش كورسەتىلىپ, دارەجان ومىرباەۆ «ۇزدىك رەجيسسەر» جۇلدەسىمەن ماراپاتتالعان بولاتىن.
