سەناتور تەڭىز جانە قاشاعان كەن ورىندارىن يگەرۋدى بەلسەندى تۇردە ۇلعايتۋ, سونداي-اق اتىراۋ مۇناي-حيميا پاركىن دامىتۋ جانە گاز وڭدەۋ زاۋىتىن سالۋ تاياۋ بولاشاقتا سۋ تاپشىلىعىنىڭ ارتۋىنا الىپ كەلەدى دەپ سانايدى. ول اسىرەسە اتىراۋ وبلىسىنىڭ يساتاي, جىلوي اۋداندارى مەن قۇلسارى قالاسىنىڭ تۇرعىندارىنا قاتىستى بولۋى ىقتيمال, مۇنداعى تۇرعىندار قازىرگى كەزدىڭ وزىندە جاز مەزگىلىندە سۋدى ساعات بويىنشا الادى.
بۇل ماسەلەنى شەشۋگە «كوكجيدە» تۇششى سۋ ەرەكشە كەن ورنى كومەكتەسە الار ەدى. ول اقتوبە جانە اتىراۋ وبلىستارىنىڭ شەكاراسىندا مۇعالجار اۋدانىندا ورنالاسقان باتىس وڭىردەگى ەڭ ءىرى تۇششى سۋ كوزى. الايدا, سەناتور جەر قويناۋىن پايدالانۋشىلار وسى كەن ورنى اۋماعى مەن ءدال جانىنان ۇڭعىما قازىپ, ىزدەستىرۋ جۇمىستارىن جۇرگىزىپ جەر استى سۋىنىڭ لاستانۋىنا اكەلۋى مۇمكىن دەپ الاڭداپ وتىر. ال تازا سۋ كوزى لاستانعان جاعدايدا تۋىندايتىن شىعىن جەر قويناۋىن پايدالانۋشىلاردان تۇسەتىن كىرىستەرمەن سالىستىرۋعا كەلمەيدى.
«وسى گيدروگەولوگيالىق وبەكتىدەگى جەراستى سۋىنىڭ جاي-كۇيىنە تۇراقتى مونيتورينگ جۇرگىزۋ ءۇشىن بىرىڭعاي وپەراتوردى ايقىنداۋ ماسەلەسىن قاراۋدى سۇرايمىز. كوكجيدە مەكەنىندە ەكولوگيالىق جاعدايدىڭ ناشارلاۋىنا جانە جەر استى سۋىنىڭ لاستانۋىنا جول بەرمەۋ ءۇشىن قولدانىستاعى مۇناي وندىرۋگە ارنالعان كەلىسىمشارتتاردى زەردەلەۋ كەرەك. قاجەت بولعان جاعدايدا, مۇناي كومپانيالارىنا ودان ءارى ىزدەستىرۋ جۇمىستارىن جۇرگىزۋگە تىيىم سالۋ جانە كەلىسىمشارتتاردى ۇزارتپاۋ كەرەك. اقتوبە وبلىسىنىڭ اۋماعىندا ورنالاسقان كوكجيدە جەر استى تۇششى سۋ كەن ورنىنان اتىراۋ وبلىسىنىڭ اۋداندارىنا سۋ تارتۋعا بايلانىستى جوبانى ىسكە اسىرۋ جونىندە شارالار قابىلدانسىن», دەپ اتاپ ءوتتى سەناتور.
