اۋىلدى اسىل قازىنا, بايلىعىمىز, ۇلتتىق قۇندىلىقتارىمىزدىڭ ساقتالاتىن قاسيەتتى مەكەنى رەتىندە عانا قابىلداۋمەن قاتار ونىڭ تۇگەل ەلدىڭ دامۋىنا ەلەۋلى اسەر ەتەتىن درايۆەر رەتىندە دە ورنىن ءبىلۋىمىز كەرەك. اۋىل شارۋاشىلىعى سالاسىنا ەرەكشە مəن بەرىپ, ونى جان-جاقتى دامىتۋعا, ءسويتىپ اۋىلداردى ساقتاپ قالۋعا كۇش سالاتىن كەز الدەقاشان كەلدى.
حالىقتىڭ, əسىرەسە اۋىل جاستارىنىڭ اتا كəسىپكە بەت بۇرىپ, شىن ىقىلاسپەن جۇمىس ىستەپ, ءوز كəسىبىن اشىپ, ەڭبەگىنىڭ نəتيجەسىن كورۋگە ىنتا-جىگەرىن ارتتىرۋ ءۇشىن دە مەملەكەت تاراپىنان قارجىلىق, مورالدىق, كəسىبي تۇرعىدا قولداۋ جاساۋ كەرەك. اۋىل شارۋاشىلىعى سالاسىن, ونىڭ ىشىندە مال, ەگىن شارۋاشىلىعىن ءىس جۇزىندە دامىتامىز دەسەك, مەملەكەتتىك قولداۋ, دامىتۋ باعىتىندا ناقتى رەفورمالار جاساۋ ماڭىزدى.
پرەزيدەنت قاسىم-جومارت توقاەۆ جاڭا قازاقستاندى قۇرۋعا قاتىستى ۇندەۋىندە دە, كەشەگى ۇكىمەت وتىرىسىنداعى بايانداماسىندا دا اۋىلداردى دامىتۋدىڭ ەلدەگى مەملەكەتتىك باسقارۋدىڭ جاڭا جولدارىن اتاپ ءوتتى. ونىڭ ايتۋىنشا, سوڭعى 5 جىلدا اۋىل شارۋاشىلىعىن دامىتۋعا 2 ترلن تەڭگەدەن استام قارجى بولىنگەن. دەگەنمەن سۋبسيديا كولەمى قانشا وسسە دە, بۇل سالادا اۋىز تولتىرىپ ايتاتىن وزگەرىس بولعان جوق. پرەزيدەنت بۇل ماسەلەنى اۋىل شارۋاشىلىعى مينيسترلىگى مەن اكىمدىكتەر سۋبسيديانى تاراتىپ بەرۋمەن عانا اينالىسقانىمەن بايلانىستىرىپ وتىر. ەلىمىزدە بۇل سالادا ەشقانداي تالداۋ جاسالمادى, قارجىنىڭ ءتيىستى ماقساتقا جۇمسالۋىن دا ەشكىم باقىلاۋعا الماعان. سوندىقتان دا سۋبسيديا تۇپكى يەسىنە جەتپەگەن. پرەزيدەنت بۇل ماسەلەنى ۇكىمەت وتىرىسىندا اتاپ ءوتىپ, شارا قابىلدايتىن كەز كەلگەنىن انىق ايتتى. ويتكەنى اۋىل شارۋاشىلىعىنا ەش قاتىسى جوق سالالار دا ونىڭ قىزىعىن كورىپ جاتىر. بۇعان سىبايلاس جەمقورلىققا قارسى ءىس-قيمىل اگەنتتىگى سوڭعى جىلدارى تەرگەۋگە العان 960 قىلمىستىق ءىس دالەل. جوعارىدا ايتىپ وتكەنىمدەي, اۋىلعا تەك رۋحاني قۇندىلىقتاردىڭ بەسىگى رەتىندە عانا قاراماۋ كەرەك. بۇل سالاعا ءتيىستى كوڭىل بولمەسەك, اگروونەركاسىپ كەشەنى شيكىزات وندىرۋدەن ارى اسا الماي قالادى. ال شيكىزات ءوندىرۋ دە شەكتەۋلى ەكەنىن بىلەمىز. سوندىقتان اۋىلدارعا باعىتتالعان سۋبسيديانى باقىلايتىن بىرىڭعاي اقپاراتتىق جۇيە قاجەت. اۋىل شارۋاشىلىعىنا جاستاردى دا جۇمىلدىرىپ, بۇل سالادا جەتىستىككە جەتۋگە بولاتىنىن كورسەتۋ ماڭىزدى.
اۋىل حالقىنىڭ تۇرمىس جاعدايىن ارتتىرۋ سول ەلدى مەكەن اكىمىنىڭ باستى ماقساتى بولۋعا ءتيىس. ايماقتاعى جۇمىس ورىندارىنىڭ اشىلۋى, كəسىپپەن اينالىساتىن كəسىپكەرلەردى تابۋ, ول كəسىپتىڭ اياققا تۇرۋىن تىكەلەي باقىلاپ, قولداۋ كورسەتۋ اكىمدىكتەرگە ۇكىمەت تاراپىنان زاڭ جۇزىندە مىندەتتەلگەنى ءجون. بۇل زاڭ جۇزىندە بەكىتىلگەن مەحانيزمدەرمەن قاتار ولارعا جاۋاپتىلىق جۇكتەلگەنى دۇرىس دەپ ويلايمىن.
نۇرباتەس توباعابىلوۆا,
قوعام بەلسەندىسى
اقتوبە
