باسقارما باسشىسى شىمكەنت قالاسىنىڭ 5 جىلدىق دامۋ جوسپارىنا سايكەس 2022 جىلى سالادا 76 جوبا جۇزەگە اسىرىلاتىنىن اتاپ ءوتتى. بۇل جوبالاردا اۋىز سۋ - 4, كارىز جۇيەسى – 14, ەلەكتر – 14, تابيعي گاز – 15, جىلۋ – 5, ينجەنەرلىك ينفراقۇرىلىم – 24 نىسان بار.
اتقارىلاتىن جۇمىستاردىڭ ناتيجەسىندە جىل سوڭىندا مەگاپوليستى اۋىز سۋمەن قامتۋ كورسەتكىشى 98%-دان 99%-عا, كارىز جۇيەسىمەن قامتۋ 54%-دان 60%-عا, ساپالى ەلەكترمەن قامتۋ دەڭگەيى 97%-دان 99%-عا, تابيعي گازبەن قامتىلۋ كورسەتكىشىن 93%-دان 94,7%-عا دەيىن كوتەرۋ جوسپارلانۋدا.
ال, جىلۋ جەلىلەرىنىڭ توزۋ دەڭگەيى 37-دەن 35%-عا تومەندەيدى. جوبالاردى جۇزەگە اسىرۋ بارىسىندا شالعاي ەلدىمەكەندەردە باسا نازار اۋدارىلادى.
قالا اكىمى حالىقتىڭ تىرشىلىك ەتۋىنە باستى قاجەتتىلىك ينفراقۇرىلىم جۇيەلەرى ەكەنىن ايتىپ, سالا باسشىسىنا بىرقاتار ناقتى تاپسىرمالار جۇكتەدى.
«اۋداندارداعى توزىعى جەتكەن ەلەكتر جەلىلەرىنىڭ بارلىعىن تەكسەرىپ, كەستەسىن جاساقتاپ, قاداعالاپ وتىرۋ قاجەت. ابدەن توزىعى جەتىپ, اۋماق جارىقسىز قالعان ساتتە ەمەس, الدىن الا باعامداپ, جوندەۋ جۇمىستارىن جاساپ وتىرۋ كەرەك, جەكەمەنشىك نىسانداعى ينفراقۇرىلىم جۇيەلەرىنىڭ ساپاسىنا دا ءمان بەرىپ, ولاردى تەكسەرەتىن مەحانيزمنىڭ جۇمىس ىستەۋىن قامتاماسىز ەتۋ قاجەت. جوبانىڭ ماڭىزدىلىعى - سانىندا ەمەس, حالىققا تيىمدىلىگىنىڭ جوعارى بولۋىندا», دەدى مۇرات ايتەنوۆ.
