ەسەسىنە بەيىمبەت مايلين اۋدانىنىڭ ورتالىعى ايەت اۋىلىندا سالىنعان توبەشىك سىرعاناق جەرگىلىكتى جۇرتتىڭ رەنىشىن تۋعىزىپ, ونىڭ سوڭى ۇلكەن داۋعا اينالدى. بىلتىر اكىمدىك جاريالاعان كونكۋرستى ۇتىپ العان مەردىگەر 2 ملن تەڭگەدەي بيۋدجەت قارجىسىنا ورتالىق الاڭعا سىرعاناق ورناتىپ, جانىنا بىرنەشە مۇز ءمۇسىن جاساپ بەرۋدى موينىنا العان. الايدا اۋىل تۇرعىندارى سىرعاناقتىڭ ساپاسىز ەكەنىن ءارى جاڭا جىل مەرەكەسى ءوتىپ كەتكەننەن كەيىن سالىنعانىن ايتادى.
– بىلتىر 31 جەلتوقسانعا دەيىن اۋىلدا سىرعاناق تۇرعىزادى دەگەندى ەستىدىك. وعان جەرگىلىكتى بيۋدجەتتەن قوماقتى قارجى قاراستىرىلعانىن دا بىلەمىز. جاڭا جىل قارساڭىندا اعاش سىرعاناقتى اكەلىپ قويدى. بىراق باسپالداقتارى قيسىق, تاقتايى سۇرگىلەنبەگەن, بالالار ءبىر جەرىن جاراقاتتاپ الا ما دەپ قورقامىز. بۇل سىرعاناققا وتىرعان بالانى سۇيرەپ تۇسىرمەسەڭ, كەدىر-بۇدىر تاقتايدىڭ ۇستىندە وزدىگىنەن سىرعاناي المايدى. ءتىپتى بولماعان سوڭ, جۇرت مۇنىڭ جانىنا قاردان تاعى ءبىر توبەشىك جاسالادى ەكەن دەدى. ءسويتىپ جۇرگەندە جاڭا جىل مەرەكەسى ءوتىپ كەتتى. بىراق ەشقايسىمىز اعاشتان جاسالعان ساپاسىز سىرعاناقتان وزگە سىرعاناقتى كورە المادىق, – دەيدى اۋىل تۇرعىنى گالينا فيرۋس.
تۇرعىندار مەملەكەتتىك ساتىپ الۋ سايتى ارقىلى جاڭا جىل قارساڭىندا اۋىلدى بەزەندىرۋگە قانشا قارجى بولىنگەنىن ىزدەستىرىپ كورەدى. سايتتاعى مالىمەت بويىنشا, اۋىل اكىمدىگى جەكە كاسىپكەرلىكپەن اينالىساتىن «مارتين» دەگەن مەكەمەمەن ءۇش بىردەي كەلىسىمشارتقا وتىرىپتى. ءبىرىنشى شارتتا مەردىگەردىڭ ىلعال وتكىزبەيتىن سۇرىلگەن اعاشتان سىرعاناق جاسايتىنى تۋرالى ايتىلعان. وعان 1 ملن 450 مىڭ تەڭگە قاراستىرىلىپتى. ودان كەيىنگىسىندە مەردىگەرگە 104 مىڭ 150 تەڭگەگە بيىكتىگى ءبىر جارىم مەتر بولاتىن بىرنەشە مۇز ءمۇسىن جاساۋ جۇكتەلگەن. ال ءۇشىنشى شارتتا قاردان بيىكتىگى 1,5 مەتر, ۇزىندىعى 5 مەتر, ەنى 2 مەتر بولاتىن تاعى ءبىر سىرعاناق جاساۋ ءۇشىن 248 مىڭ تەڭگە ءبولىنىپتى.
– ەكى سىرعاناق پەن مۇز مۇسىندەردى قوسقاندا بارلىعى 2 ملن تەڭگەگە جۋىق قاراجات بولىنگەن. بىراق قار سىرعاناق 13 قاڭتاردا عانا سالىندى. ال مۇز مۇسىندەردىڭ ورنىندا ءتورت بۇرىشتى كەسەك قانا جاتىر. اۋىل تۇرعىندارى بيۋدجەتتىڭ اقشاسىن ىزدەستىرمەگەندە, بۇل سىرعاناقتىڭ سالىنۋى دا نەعايبىل ەدى. مەردىگەر قاردى قالاي بولسا سولاي ۇيە سالىپتى. قاردان جاسالعان مۇز سىرعاناعىنىڭ ءتۇرى وسى. مۇندايىن بىلگەندە, اۋىل تۇرعىندارى جابىلىپ كوك تيىن شىعىنداماي-اق سىرعاناقتى قولدان جاساپ الار ەدىك. اكىمگە ء«ۇيىلىپ جاتقان بورپىلداق قاردىڭ ۇستىمەن بالالار قايتىپ سىرعانايدى» دەپ ەدىك, ايتەۋىر ءبىر كۇننەن كەيىن سۋ قۇيىپ, قاتىرىپ قويىپتى. مەنىڭ بەس نەمەرەم بار. بەسەۋى دە مۇندا كەلمەيدى, پيونەر كوشەسىندەگى اۋىل تۇرعىندارى وزدەرى جاساپ العان مۇز تومپەشىككە بارادى. ول الاسالاۋ بولسا دا, بيۋدجەتتىڭ اقشاسىنا جاسالعان سىرعاناقتان الدەقايدا جاقسى, – دەيدى اۋىل تۇرعىنى جانات ماقۇموۆا.
مەردىگەر دەنيس مارتين 31 جەلتوقسانعا دەيىن ايەت اۋىلىندا قار قالىڭ بولماعانىن, وسى سەبەپتى سىرعاناق تۇرعىزۋعا جەتەتىن قار تابا الماعانىن ايتادى.
– مەن اكىمدىككە كەپىلدىك حات جازىپ, سىرعاناقتى قار جەتكىلىكتى مولشەردە تۇسكەننەن كەيىن تۇرعىزاتىنىمدى حابارلادىم. ال سىرعاناقتى ساپاسىز دەگەندەرگە ايتارىم, ءبىز بۇعان اپتا سايىن سۋ قۇيىپ, رەتكە كەلتىرىپ وتىرامىز. بالكىم بالالار ءبىر جەتىنىڭ ىشىندە وسىنداي جاعدايعا جەتكىزگەن بولار. جۇرتتىڭ رەنىشىن ەستىپ جاتىرمىن. مۇز مۇسىندەردىڭ بىرەۋىن ورناتىپ قويعام, بىراق ونى توتەنشە جاعداي رەجىمىنە بايلانىستى قايتا بۇزىپ تاستادىق, – دەيدى مەردىگەر.
اۋىلدىق وكرۋگ اكىمدىگى مەردىگەردىڭ ەشبىر ايىبى جوق ەكەنىن ايتىپ وتىر. ال ايەتتىڭ بەلسەندى تۇرعىندارى پروكۋراتۋرا مەن سىبايلاس جەمقورلىققا قارسى ءىس-قيمىل قىزمەتىنە شاعىمدانىپ, سىرعاناققا قاتىستى تەكسەرۋ جۇرگىزۋدى تالاپ ەتپەك.
قوستاناي وبلىسى
