باس پروكۋراتۋرا وكىلى ەلىمىزدىڭ ءار وڭىرىندە بۇرق ەتە قالعان «گيبريدتى شابۋىلدارعا» قارۋلى دەسترۋكتيۆتى جانە قىلمىستىق توپتاردىڭ جۇمىلدىرىلعانىن العا تارتتى. ر.وجاروۆ قاڭتار وقيعالارى كەزىندە ەلىمىزدىڭ «گيبريدتى» شابۋىلعا تاپ بولعانىن ايتا كەلىپ, قازىرگى تاڭدا ۇيىمداسقان قىلمىستىق توپتاردىڭ 18 مۇشەسى ۇستالىپ, ادام ءولتىرۋ, ۇرلىق, توناۋ جانە قاراقشىلىق جاساعانى ءۇشىن بۇرىن سوتتى بولعان 21 ادامنىڭ تۇتقىندالعانى جونىندە مالىمدەدى. «ۇستالعانداردىڭ اراسىندا «ديكي ارمان» لاقاپ اتىمەن بەلگىلى جۇماگەلديەۆ جانە ونىڭ توپ مۇشەلەرى بار. «ديكي ارماننىڭ» قارۋلانعان ادامدارى كەزدەيسوق ءوتىپ بارا جاتقان 24 بەيبىت تۇرعىندى ۇرلاپ, كۇشتەپ ۇستاعان. ولاردى ءبىر جەردەن ەكىنشى جەرگە اپارىپ, ۇرىپ-سوققان. اۋىر سوققىنىڭ سالدارىنان ءبىر ادام قازا بولعان. بۇدان بولەك, قاراقشىلار 12-قالالىق اۋرۋحانادا پوليتسيا قىزمەتكەرىن سوققىنىڭ استىنا الىپ, قىزمەتتىك قارۋىن تارتىپ العان. قازىرگى تاڭدا وسى فاكتىلەر بويىنشا تىركەلگەن قىلمىستىق ىستەر جان-جاقتى تەرگەلۋدە», دەدى ول.
الەۋمەتتىك جەلىلەر مەن مەسسەندجەرلەردە «ديكي ارماندى» بوساتىپتى نەمەسە ونى بەلگىسىز ءبىر جاققا الىپ كەتىپتى دەگەن ءتۇرلى بولجامدار مەن جالعان اقپاراتتاردىڭ تاراپ كەتكەنى راس. وسىعان وراي ارنايى پروكۋرورلار قىزمەتىنىڭ باسشىسى ر.وجاروۆ «باسىندا بۇل ازاماتتى پوليتسيا اتىس قارۋىن زاڭسىز ساقتاعانى ءۇشىن ۇستاسا, قازىر ونىڭ جاپپاي تارتىپسىزدىكتەر بويىنشا تەرگەلىپ جاتقانىن» رەسمي تۇردە حابارلادى. قازىرگى كەزدە ارنايى پروكۋرورلار ەكى قىلمىستىق ءىستى بىرىكتىرىپ, ءوز تەرگەۋىنە العان. وسىعان وراي جۇماگەلديەۆ ۇقك-ءتىڭ تەرگەۋ يزولياتورىنا اۋىستىرىلدى. ر.وجاروۆتىڭ ايتۋىنشا, قاڭتار وقيعالارى كەزىندە بەلسەندىلىك تانىتقان باسقا دا ۇيىمداسقان توپتار انىقتالعان. ماسەلەن, جاقىندا عانا الماتى وبلىسىنىڭ ەڭبەكشىقازاق اۋدانىندا ۇقك قىزمەتكەرلەرى «كازاحستانسكي» دەپ اتالاتىن ۇيىمداسقان قىلمىستىق توپ جەتەكشىلەرىن قولعا تۇسىرگەن.
«ولاردان 15 اتىس قارۋى تاركىلەندى. قازىر بۇل ۇيىمداسقان توپتىڭ اشىلماعان باسقا دا قىلمىستارعا قاتىستىلىعى تەكسەرىلۋدە», دەگەن باس پروكۋراتۋرا وكىلى قاڭتار وقيعالارىنىڭ سەبەپ-سالدارلارىن تەرگەۋ بارىسىندا ساياسي ەكسترەميزمنىڭ ايقىن بەلگىلەرى انىقتالعانىن دا العا تارتتى. ونىڭ ايتۋىنشا, كەيبىر «قوعام» جانە «ازاماتتىق بەلسەندىلەر» دە نارازىلىقتاردىڭ باستاپقى كەزەڭىن پايدالانىپ, تىزگىندى ءوز قولدارىنا الۋعا تىرىسقان. «تىيىم سالىنعان «قدت/كوشە» اتتى ەكسترەميستىك ۇيىمىنىڭ مۇشەلەرى وزگەلەردى جاپپاي تارتىپسىزدىكتەرگە بەلسەنە يتەرمەلەگەن. جالپى ۇستالعاندار اراسىندا تىيىم سالىنعان ەكسترەميستىك اعىمداردىڭ 35 مۇشەسى انىقتالدى. مىسالى, الماتىدا قىلمىستىق باعىتتاعى دەسترۋكتيۆتى ءدىني اعىمنىڭ ءبىر توپ مۇشەسى ۇستالدى. ولاردان قولدانۋعا دايىن قارۋ-جاراق تاركىلەندى. توپتاعى ءار ادامنىڭ ءىس-ارەكەتى ۇيلەستىرىلىپ وتىرعان. ماسەلەن, ولاردىڭ ءبىر بولىگى الاڭدا جۇرسە, ەكىنشىسى قالانىڭ تومەنگى جاعىندا بارريكادالاردا وتىرعان», دەدى ول.
ر.وجاروۆ سونداي-اق تەرگەۋ بارىسىندا WhatsApp جانە Telegram ارقىلى تارتىپسىزدىكتەرگە قاتىسۋشىلاردىڭ جينالۋ ورىندارىن, قوزعالۋ باعىتتارىن ۇيلەستىرگەن قازاقستاندىق چاتتاردىڭ اشكەرەلەنگەنىن دە ايتتى. «مىسالى, الماتىدا ساناۋلى ساعاتتىڭ ىشىندە ءبىر مەسسەندجەرگە قوسىلعاندار سانى 140-تان 5,5 مىڭعا دەيىن وسكەن. جامبىل وبلىسىندا دا ءبىر چاتقا قاتىسۋشىلار سانى 4 مىڭعا دەيىن جەتكەن. ءسويتىپ قىسقا ۋاقىت ىشىندە جينالعان ادامدار باسقىنشى توپتارعا اينالعان. ۇيىمداسقان توپتار زورلىق-زومبىلىق جاساۋ كەزەڭىنە ەلىمىزدىڭ ءار ايماقتارىندا ءبىر مەزگىلدە كوشكەن. ءبىرازى دۇكەندەردى تالقانداپ, توناۋمەن اينالىسقان. ولار ءتىپتى تۇرعىن ۇيلەردىڭ ءبىرىنشى قاباتتارىندا ورنالاسقان ءۇي-جايلاردى ورتەپ جىبەرمەك بولعان. تەك تۇرعىنداردىڭ جانقيارلىق تويتارىس بەرۋ ارەكەتتەرى عانا بۇدان دا اۋىر زارداپتار مەن كوپتەگەن قۇربانداردىڭ الدىن العان», دەپ مالىمدەگەن ر.وجاروۆ لاڭكەستىك شابۋىلدىڭ قالاي جاسالعانىنا دا سيپاتتاما بەرىپ ءوتتى. ونىڭ ايتۋىنشا, الاڭعا جينالعاندارعا ارماتۋرا, تاياق, كىرپىش, تاس جانە «مولوتوۆ كوكتەيلدەرىن» تاراتقاندار دا بولعان. ولارعا ءتىپتى عيماراتتاردى ورتەۋ ءۇشىن اۆتوموبيل دوڭگەلەكتەرى مەن بەنزين دە جەتكىزىلگەن.
«ودان كەيىن حالىقتىڭ كوپ جينالعانىن ۇتىمدى پايدالانىپ كەتكەن ولار قورشاۋلاردى بۇزىپ, وڭىرلەردەگى اكىمدىك عيماراتتارىن باسىپ الۋعا كىرىسكەن. ولار قارۋ-جاراق قويمالارىن باسىپ الىپ, قارۋعا قول جەتكىزۋ ءۇشىن پوليتسيا عيماراتتارىنا شابۋىل جاساپ, قاۋىپسىزدىك كۇشتەرىنەن تارتىپ العان ارنايى تەحنيكا مەن كولىكتەردى, باسقا دا قۇرالداردى پايدالانعان. ۇرلانعان قارۋ-جاراقتى, ازىق-ت ۇلىك پەن اۋىز سۋدى ب ۇلىكشىلەرگە جەتكىزۋ جانە تاراتۋ امالدارىن ۇيىمداستىرعان. قارۋ-جاراقتىڭ ب ۇلىكشىلەرگە قالاي جەتكىزىلگەنىن الەۋمەتتىك جەلىلەردە كەڭىنەن تاراعان ۆيدەولاردان دا كورۋگە بولادى», دەدى سپيكەر.
ەستەرىڭىزگە سالا كەتەيىك, قازىرگى تاڭدا ەلىمىزدىڭ 8 وڭىرىندە – الماتى, شىمكەنت قالالارىندا جانە الماتى, جامبىل, قىزىلوردا, شىعىس قازاقستان, اقتوبە جانە اتىراۋ وبلىستارىندا تەرروريزم اكتىلەرى مەن جاپپاي تارتىپسىزدىكتەردى تەرگەۋ جۇمىستارى جۇرگىزىلۋدە. ءبىر ايدىڭ ىشىندە «ستوپتەرروريزم» سايتىنا 1 672 فايل جۇكتەلگەن. ولاردىڭ دەنى قاڭتار وقيعاسى بويىنشا ۆيدەو جانە فوتوسۋرەتتەر. تەرگەۋگە قاراپايىم تۇرعىنداردان بولەك, بيزنەس وكىلدەرى دە كومەكتەسۋدە. جاپپاي تارتىپسىزدىكتەردى ۇيىمداستىرۋ مەن وعان قاتىسۋ جانە تەرروريزم اكتىسىن جاساۋعا قاتىستى 467 ادام قاماۋعا الىنعان. ولاردىڭ جەكە باسى, وتباسىلىق جاعدايى, جاسى, دەنساۋلىق جاعدايىن, قاتىسۋ دارەجەسى, ءوز ىستەرىنە دەگەن كوزقاراسى جانە باسقا دا سيپاتتايتىن دەرەكتەردى زەردەلەي كەلە ارنايى پروكۋرورلار 76 كۇدىكتىنى تەرگەۋ يزولياتورلارىنان بوساتقان. «قاماۋعا تەك اۋىر جانە اسا اۋىر قىلمىستار جاساعانى تۋرالى ناقتى ايعاقتار بار ادامدار عانا الىندى», دەگەن سپيكەر «تەرگەۋ يزولياتورلارىندا كەزدەيسوق قامالعان ادامدار جوق ەكەنىن» مالىمدەدى.
ءىىم وكىلى س.ءادىلوۆ بريفينگتە ىشكى ىستەر ورگاندارىنىڭ تەرگەۋشىلەرى ارنايى پروكۋرورلارمەن تىعىز ءىس-قيمىل جاساي وتىرىپ, قاڭتار وقيعالارىنىڭ سەبەپتەرىن انىقتاۋ, قىلمىس ىزدەرىن الۋ جانە بەكىتۋ, سونداي-اق قاجەتتى دالەلدەمەلەر بازاسىن جيناۋ جۇمىستارى جالعاسىپ جاتقانىن ايتا كەلىپ, «قازىرگى ۋاقىتتا بارلىق زاقىمدانعان نىساندى تەكسەرۋ اياقتالدى. ولاردىڭ سانى 1,5 مىڭنان اسادى جانە 760-تان استام اۆتوكولىك بار», دەدى. ونىڭ اتاپ وتۋىنشە, 1,7 مىڭنان استام سوت ساراپتاماسى تاعايىندالدى. كۋاگەرلەر مەن جابىرلەنۋشىلەر رەتىندە 10,5 مىڭ ادامنان جاۋاپ الىندى. «جۇرگىزىلىپ جاتقان جۇمىستاردىڭ ناتيجەسىندە قىلمىسكەرلەر مەن جاسىرۋ ورىندارىنان 828 بىرلىك قارۋ, 18 مىڭنان استام وق-ءدارى جانە 286 ارنايى قۇرال تاركىلەندى. سونىمەن قاتار 65 دانا قارۋ ەرىكتى تۇردە تاپسىرىلدى», دەدى س.ءادىلوۆ.
سونداي-اق ءىىم وكىلى: «قازىر اقپاراتتىق كەڭىستىكتە وتكەن وقيعالاردىڭ بۇرمالانىپ وتىرعانىنا كۋا بولىپ وتىرمىز. ميتينگىلەردىڭ بەيبىت سيپاتى جانە قۇقىق قورعاۋ كۇشتەرىنىڭ زاڭسىز ارەكەتى تۋرالى ايتىلادى. مۇنىڭ ءبارى بيلىك قابىلداعان شەشىمدەردىڭ بەدەلىن ءتۇسىرۋ, ەڭ باستىسى – جاپپاي تارتىپسىزدىكتەردىڭ ۇيىمداستىرۋشىلارى مەن قاتىسۋشىلارى جاۋاپكەرشىلىكتەن بوي تاسالاۋى ءۇشىن جاسالادى. قازاقستاندىقتار مۇنىڭ قوعامدىق سانانى ايلا-شارعى جاساۋ جونىندەگى ماقساتتى اقپاراتتىق ناۋقان ەكەنىن تۇسىنۋگە ءتيىس. وسىعان بايلانىستى ازاماتتاردان تەك رەسمي, تەكسەرىلگەن اقپارات كوزدەرىنە سەنۋدى سۇرايمىن», دەدى س.ءادىلوۆ
