مۇگەدەكتەرگە – مۇمكىندىك

سال اۋرۋلارىنا شالدىققان ازاماتتاردى قولداۋ ورتالىعى «پاراساتتى ءومىر» باعدارلاما­سىنىڭ تۇساۋىن كەستى. باعدارلاما اياسىندا ورتالىق ءتورت بولمە اشقان. ەمدەۋ-شىنىقتىرۋ بولمەلەرىندە مۇمكىندىگى شەكتەۋلى ازاماتتار تاعدىرلاس ادامدارىمەن پىكىرلەسىپ, اڭگىمەلەسەدى. بۇل بولمەلەردە ارنايى دارىگەر-رەابيليتولوگ, دارىگەر-نەۆراپوتولوگ قىزمەت كور­سەتەدى. رەلاكساتسيا بولمەسى جۇيكە جۇيەسىن تىنىشتاندىراتىن زاماناۋي قۇرالدارمەن, سپورتتىق-دەنەشىنىقتىرۋ ءبو­ل­مەسى ەلەكترلى ۆەلوترەناجەر, ۆەرتيكاليزاتورمەن جابدىقتالعان. ورتالىقتا ينۆاتاكسي قىزمەتى جۇمىس ىستەيدى. قازىر ەكى كولىك بار. ينۆاتاكسي قىزمەتى مۇمكىندىگى شەكتەۋلى جانداردىڭ قالا ىشىندە ءجۇرىپ-تۇرۋىنا قولايلى. ورتالىق قىزمەتكەرلەرى وسىنداي ارنايى جابدىقتالعان تاعى ءبىر كولىك بولسا دەيدى. سوندا بۇل كولىكتىڭ قىزمەتىن پايدالانۋشىلاردىڭ سۇرانىسىن اناعۇرلىم قامتاماسىز ەتۋگە مۇمكىندىك تۋماق. بۇل جەردە جاتتىعۋ تەگىن. سونىمەن بىرگە, ورتالىقتا قوعامدىق قابىلداۋ, الەۋمەتتىك قىزمەتتەر ءبولىمى, «د.ا.ر» ەرىكتىلەر كلۋبى جۇمىس ىستەيدى. قاجەت بولسا لوگوپەد, زاڭگەر, پسيحولوگ قىزمەتتەرى دە ۇيىمداستىرىلادى. اقتوبە قالالىق سال اۋرۋلاردى قولداۋ قوعامى ديرەكتورىنىڭ ورىنباسارى گۇلميرام سراجوۆانىڭ ايتۋىنشا, اتالعان باعدارلاما مۇمكىندىگى شەكتەۋلى ازاماتتاردى وڭالتۋعا, ومىرگە قايتا ورالۋىنا باعىتتالىپ وتىرعان كورىنەدى. ساتىبالدى ءساۋىرباي,  «ەگەمەن قازاقستان». اقتوبە وبلىسى.