ماسەلەن, قوستاناي وبلىسىنىڭ تۇرعىندارى بىلتىر ماۋسىم ايىنان بەرى ىسكە اسىرىلا باستاعان مەملەكەتتىك شىعارماشىلىق تاپسىرىس جوباسىنىڭ يگىلىگىن كورىپ وتىر. جوباعا ءاۋ باستا اتا-انا دا, بالا دا ونشا ىنتا بىلدىرە قويماپ ەدى, جىل سوڭىنا قاراي سان ءتۇرلى ونەرگە باۋليتىن تەگىن ۇيىرمەلەرگە بارىپ, تالابىن ۇشتاپ جۇرگەن بالعىنداردىڭ سانى 2 مىڭعا جەتتى. بيىل ايتۋلى جوبانىڭ اۋقىمى بۇدان دا كەڭەيە تۇسەتىن سىڭايلى.
– بىلتىر تەگىن ۇيىرمەلەردىڭ جۇمىسىن قامتاماسىز ەتۋگە وبلىستىق بيۋدجەتتەن 77 ملن تەڭگە قارجى جۇمسالدى. بۇل – كوپشىلىكتىڭ تەگىن ۇيىرمەلەردىڭ اشىلىپ جاتقانىنان ءالى حاباردار بولا قويماعان كەزى. ەسەسىنە بيىل مەملەكەت قارجىلاندىراتىن شىعارماشىلىق ورتالىقتارعا دەگەن سۇرانىس ەداۋىر ارتتى. وسىعان وراي, 600 ملن تەڭگەگە تاپسىرىپ بەردىك. جىل باسىندا 300 ملن تەڭگە ءبولىندى. ەندى ەل سۇرانىسىن ەسكەرە وتىرىپ, الداعى ۋاقىتتا تاعى دا تاپسىرىس بەرىلەدى. وعان وبلىس بيۋدجەتىنىڭ مۇمكىندىگى جەتەدى, – دەدى وبلىستىق مادەنيەت باسقارماسىنىڭ باسشىسى ەرلان قالماقوۆ.
باسقارما باسشىسىنىڭ ايتۋىنشا, بالانى شىعارماشىلىق ۇيىرمەگە بەرگىسى كەلگەن اتا-انالار artsport.edu.kz بىرىڭعاي پورتالى ارقىلى وزدەرى تۇرىپ جاتقان مەكەنجايعا جاقىن ءارى ىڭعايلى ۇيىرمەنىڭ باعىتىن, ورنىن انىقتاپ, وعان ەلەكتروندى تۇردە ءوتىنىم بەرە الادى.
بۇگىندە وڭىردە شىعارماشىلىق مەملەكەتتىك تاپسىرىس اياسىندا بەس مىڭعا جۋىق بالا تەگىن ۇيىرمەگە بارىپ ءجۇر. مىسالى, وبلىس ورتالىعىنىڭ وزىندە عانا 3243 بالا تەگىن ۇيىرمەدە تالابىن ۇشتاۋعا مۇمكىندىك الىپ وتىر. ال ارقالىقتا – 591, ليساكوۆتا – 156, توبىلدا – 154, رۋدنىيدا – 179, جىتىقارادا – 227, قارابالىقتا 93 بالا مەملەكەت قارجىلاندىراتىن ۇيىرمەلەرگە بارىپ ءجۇر.
الداعى ۋاقىتتا, اسىرەسە, اۋىل بالالارىن شىعارماشىلىققا كوپتەپ تارتۋ ماقساتىندا قوستاناي, التىنسارين, ناۋىرزىم اۋداندارىنداعى مادەنيەت وشاقتارىندا ۇلتتىق ونەر ورتالىقتارىنىڭ جۇمىسىن جانداندىرۋ قولعا الىنباق.
قوستاناي وبلىسى
