بۇل ورايدا وبلىس اكىمى ومىرزاق شوكەەۆ جاڭا جۇمىس ورىندارىن اشۋ اسا ماڭىزدى ءارى باستى ماسەلە ەكەنىنە توقتالىپ, باعدارلامالاردى ساپالى جۇزەگە اسىرۋدى تاپسىردى. وڭىردە وتكەن جىلى مەملەكەتتىك جانە سالالىق باعدارلامالار اياسىندا 40,1 مىڭ جاڭا جۇمىس ورىندارىن قۇرۋ جوسپارلانىپ, ناقتى 54,2 مىڭ جۇمىس ورنى اشىلعان. ونىڭ 20,3 مىڭى تۇراقتى بولسا, 34 مىڭى – ۋاقىتشا جۇمىس ورىندارى. وسىلايشا, بەكىتىلگەن جوسپار 135,2 پايىزعا ورىندالدى. وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءاسيا تەمىرباەۆانىڭ ايتۋىنا قاراعاندا, بىلتىر «ەڭبەك» مەملەكەتتىك باعدارلاماسى ارقىلى 101 مىڭ ادامدى جۇمىسپەن قامتۋ شارالارىنا جولداۋ جوسپارلانىپ, 102 609 ادام قاتىستى. باعدارلاما شەڭبەرىندە 900 ادام قىسقامەرزىمدى وقۋدى اياقتاپ, ونىڭ 90 پايىزى تۇراقتى جۇمىسقا ورنالاسقان. اتالعان باعدارلاما اياسىندا 1 276 ازامات 6 ملرد 089,9 ملن تەڭگەنىڭ شاعىن نەسيەسىن الدى. شاعىن نەسيە الۋشىلار تاراپىنان 1 402 جاڭا جۇمىس ورنى اشىلدى. تۇزىلگەن كەلىسىمشارتتارعا سايكەس شاعىن نەسيەلەۋ جۇمىستارى 2022 جىلدىڭ ناۋرىز ايىنا دەيىن جالعاسادى. جۇمىسقا ورنالاسقانداردىڭ 83,8 پايىزىنا مىندەتتى زەينەتاقى جارناسى اۋدارىلعان. جىل باسىنداعى جاعداي بويىنشا 42,3 مىڭ وتباسى نەمەسە 237,5 مىڭ ادامعا 12,3 ملرد تەڭگەگە ااك تاعايىندالدى, ولاردىڭ ىشىندە ەڭبەككە جارامدى 68 367 ادامنىڭ 52,6 مىڭى جۇمىسپەن قامتىلعان. وبلىس اكىمىنىڭ تاپسىرماسىمەن قولعا الىنعان «قامقورلىق» باعدارلاماسى شەڭبەرىندە تۇرمىستىق قيىن جاعدايعا تاپ بولعان 1 036 وتباسىنا 308,5 ملن تەڭگەگە دەمەۋشىلىك قولداۋ كورسەتىلدى, 33 وتباسى تۇرعىن ۇيمەن قامتاماسىز ەتىلگەن. سونداي-اق وبلىستا «ەڭبەك» مەملەكەتتىك باعدارلاماسى اياسىندا 3 370 مۇمكىندىگى شەكتەۋلى ازامات جۇمىسقا ورنالاسقان. بۇدان بولەك پروباتسيا قىزمەتىندە ەسەپتە تۇرعان 259 ازاماتقا كۆوتا بەرىلگەن. مىسالى, كەلەس اۋدانىندا بىلتىر 4 500 ادام تۇراقتى جۇمىسپەن قامتىلعان. ونىڭ ىشىندە پروباتسيا قىزمەتىندە ەسەپتە تۇرعان 21 جانە 200 مۇمكىندىگى شەكتەۋلى ازامات بار. وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ دەرەگىنشە, مۇگەدەكتىگى بار ازاماتتاردى جۇمىسپەن قامتۋ شارالارىنا بيىل 3 مىڭ ورىن بەكىتىلگەن. «ەڭبەك» مەملەكەتتىك باعدارلاماسىنىڭ تالابىنا سايكەس بيىل 2 800 ازاماتتى كاسىپتىك وقىتۋ جوسپارلانعان. مامانداردىڭ ايتۋىنشا, وبلىستا 96 مىڭ مۇمكىندىگى شەكتەۋلى ازامات بار, ونىڭ 58 مىڭى ەڭبەككە قابىلەتتى, قازىر 19 مىڭنان استامى تۇراقتى جۇمىسپەن قامتىلعان.
وبلىس بيۋدجەتى ەسەبىنەن بىلتىر «العاشقى جۇمىس ورنى» باعدارلاماسىمەن – 229 ادام, ال «جاستار پراكتيكاسى» جوباسىمەن 5 500-دەن استام ازامات جۇمىسقا ورنالاستىرىلعان. «مەملەكەت باسشىسى ق.توقاەۆتىڭ تاپسىرماسى بويىنشا «جاستار پراكتيكاسى» باعدارلاماسىنىڭ مەرزىمى 12 ايعا ۇزارتىلىپ, ەڭبەكاقىسى 91 890 تەڭگەگە جەتتى. سونىمەن قاتار «العاشقى جۇمىس ورنى» جوباسىنىڭ مەرزىمى 18 ايعا دەيىن ۇزارتىلىپ, ايلىق مولشەرى 91 890 تەڭگەگە وسكەن. بيىل «2021-2025 جىلدارى كاسىپكەرلىكتى دامىتۋ» ۇلتتىق جوباسىنىڭ ىسكە اسىرىلۋى جاندانادى. اتالعان جوبانىڭ باستى ماقساتى – ازاماتتاردىڭ ءوز ءىسىن اشۋ مەن دامىتۋىنا جاعداي جاساۋ, سۋبسيديالاناتىن جۇمىس ورىندارىن ۇيىمداستىرۋ ارقىلى كاسىپكەرلەردى قولداۋ. ۇلتتىق جوبا 10 مىندەتتەن تۇرسا, ونىڭ 3-ءى حالىقتى جۇمىسپەن قامتۋ ءۇشىن جاردەمدەسۋگە باعىتتالعان», دەيدى باسقارما باسشىسى ءاسيا تەمىرباەۆا. جالپى, بيىل حالىقتى جۇمىسپەن قامتۋ شارالارىنا 70 مىڭ ادامدى تارتۋ جوسپارلانسا, 240 مىڭنان استام از قامتىلعان ازاماتتى قولداۋ كوزدەلگەن. حالىقتى جۇمىسپەن قامتۋ شارالارىنا 22,6 ملرد تەڭگە قارالعان. ونىڭ ىشىندە «جاستار پراكتيكاسىنا» 5 658 جاس تۇلەكتى قاتىستىرۋعا 6,2 ملرد تەڭگە, «العاشقى جۇمىس ورنىنا» 396 ادامدى تارتۋ ماقساتىندا 436,7 ملن تەڭگە قاراستىرىلعان. «سونداي-اق ءوز ءىسىن دامىتۋعا مەملەكەتتىك قولداۋ شارالارى اياسىندا مەملەكەتتىك گرانتتى 2 765 ادامعا ۇسىنۋعا 3,4 ملرد تەڭگە قاراستىرىلدى. اتالعان جۇمىستار اياسىندا 2022 جىلى جۇمىسسىزدىق دەڭگەيىن 5,2%, جاستار اراسىنداعى جۇمىسسىزدىقتى 3,6 پايىزدان اسىرماۋ كوزدەلۋدە. از قامتىلعان ازاماتتاردى قولداۋ بويىنشا اتاۋلى الەۋمەتتىك كومەك كورسەتۋ ءۇشىن 240,4 مىڭ ادامعا 18,8 ملرد تەڭگە قارالدى. ال اتاۋلى الەۋمەتتىك كومەك الۋشىلاردىڭ ىشىنەن جۇمىسپەن قامتىلۋى ءتيىس ازاماتتاردىڭ ۇلەس سالماعىن 74,7 پايىزعا جەتكىزۋ, سايكەسىنشە كەدەيلىك دەڭگەيىن 12,4 پايىزدان اسىرماۋ بەلگىلەندى», دەيدى ءاسيا قۇرالقىزى.
وبلىستا بۇگىندە كوپشىلىكتى جۇمىسپەن قامتىپ وتىرعان 142 مىڭعا جۋىق, ال تۇركىستان قالاسىنىڭ وزىندە 13 مىڭنان استام شاعىن جانە ورتا بيزنەس سۋبەكتىلەرى جۇمىس ىستەيدى.
تۇركىستان وبلىسى
