سقو بويىنشا قىلمىستىق اتقارۋ جۇيەسى دەپارتامەنتى ءباسپاسوز قىزمەتىنىڭ مالىمەتىنشە, پەتروپاۆل قالاسىنىڭ پروباتسيا قىزمەتى بولىمىنە جازاسىن وتەۋ ءۇشىن ك. ەسىمدى سوتتالۋشى جىبەرىلگەن. وعان قر قك 296-بابى 2-بولىگى «ەسىرتكى قۇرالدارىن, پسيحوتروپتىق زاتتاردى, سول تەكتەستەردى وتكىزۋ ماقساتىنسىز زاڭسىز دايىنداۋ, قايتا وڭدەۋ, ساتىپ الۋ, ساقتاۋ, تاسىمالداۋ» بويىنشا 80 ساعاتتىق قوعامدىق جۇمىس تۇرىندە جازا كەسىلگەن.
الايدا پەتروپاۆل تۇرعىنى قوعامدىق جۇمىس ىستەۋدەن ءۇزىلدى-كەسىلدى باس تارتقان. جۇمىس كۇنىنىڭ سوڭىندا ساعات 19.00 شاماسىندا ول پروباتسيا قىزمەتى بولىمىنە كەلىپ, قوعامدىق جۇمىستى ورىنداۋدان بوساتىپ, وسى ماسەلەنى شەشۋدە كومەكتەسۋى ءۇشىن ينسپەكتورعا پارا ۇسىنعان. سوتتالعان پروبلەماسىن بىرنەشە رەت وسىلاي شەشۋگە تىرىسقاندىقتان, پروباتسيا قىزمەتى ءبولىمىنىڭ ينسپەكتورى ونىڭ ۇسىنىسىنا كەلىسكەندەي سىڭاي تانىتىپ, بۇل جايىندا دەپارتامەنتتىڭ وزىندىك قاۋىپسىزدىك توبىنا حابارلادى.
جەدەل ءىس-شارا بارىسىندا سوتتالعان كابينەتتە پروباتسيا قىزمەتىنىڭ ينسپەكتورىنا 30 مىڭ تەڭگە سوماسىندا پارا بەرىپ جاتقان جەرىندە ۇستالدى.
اتالعان فاكتى بويىنشا قىلمىستىق ءىس قوزعالدى.
قازىرگى ۋاقىتتا تەرگەۋ امالدارى جۇرگىزىلۋدە, سوتتالعان ك-عا پارانىڭ 20-30 ەسەلەنگەن مولشەرىندە ايىپپۇل سالىنباق نەمەسە بەس جىلعا دەيىنگى مەرزىمگە باس بوستاندىعىنان ايىرىلۋى مۇمكىن.
