وڭىردە ءتۇرلى ينفەكتسيالىق اۋرۋلارعا شالدىققان ناۋقاستارعا ارنالعان 1 350 توسەكتىك ورىن بار. ال ەمدەۋ مەكەمەلەرىندە جۇقپالى اۋرۋمەن كەلىپ تۇسكەن 300-دەن اسا ادام جاتىر. وبلىستا كوروناۆيرۋس جۇقتىرعان ناۋقاستار جاتاتىن 300 كارانتيندىك توسەكتىك ورىن جەكە جابدىقتالعان. وقشاۋداعى ەمدەۋ ورىندارىندا پتر-تەست قورىتىندىسىن كۇتىپ جاتقان 42 ادام بار.
وبلىستىق سانيتارلىق-ەپيدەميالىق باقىلاۋ دەپارتامەنتىنىڭ ءبولىم باسشىسى گ ۇلىم دوسىموۆانىڭ ايتۋىنشا, COVID-19-عا قوسا سوڭعى كەزدەرى وڭىردە تەز جۇعاتىن ءتۇرلى جۇقپالى اۋرۋلار دا بەلەڭ الىپ بارادى.
– قوستاناي وبلىسىندا بيىل جرۆي-مەن اۋىرعانداردىڭ سانى وتكەن جىلدىڭ وسى كەزەڭىمەن سالىستىرعاندا 2,5 ەسە كوپ. ماسەلەن, سوڭعى اپتانىڭ ىشىندە مۇنداي 5 مىڭنان اسا ناۋقاس تىركەلىپ وتىر. ولاردىڭ 60-70 پايىزى – 14 جاسقا دەيىنگى بالالار. سۋىق تيگىزىپ العان ناۋقاستاردىڭ بارىنە تۇماۋدى تاڭا بەرۋگە بولمايدى. الدىمەن ناۋقاستىڭ دەنە قىزۋىن ولشەپ, جوتەلىنىڭ قانداي ەكەنىن, تاماعىنىڭ ءىسىنۋ ەرەكشەلىگىن زەرتتەپ, تۇماۋ بەلگىلەرىن انىقتاپ الۋ كەرەك. تۇماۋ جۇقتىرعان ادامدارعا قازىرگى ناۋقاستار سياقتى ءارى-بەرى جۇرۋگە بولمايدى. مىندەتتى تۇردە جاتىپ ەمدەلۋ كەرەك. سوندىقتان قازىر اۋرۋلاردىڭ ارقايسىسىن ءجىتى زەرتتەپ, تالداپ, سوسىن بارىپ ناقتى ەم شارالارىن قابىلداۋ ماڭىزدى, – دەدى گ.دوسىموۆا.
دارىگەر-ماماندار تۇرعىندارعا ىندەتتى تەجەۋدىڭ جالعىز جولى ۆاكتسينا قابىلداۋ ەكەنىن قايتالاپ تۇسىندىرۋدە. وسىعان وراي وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى انجەلا بەكسۇلتانوۆا ارنايى ءباسپاسوز جيىنىن وتكىزىپ, قايتالاپ ەكپە الۋدىڭ اسا ماڭىزدى ەكەنىن تاعى ايتتى.
– ايماقتا «سپۋتنيك V» ءبىرىنشى كومپونەنتىنىڭ شامامەن 292 مىڭ دوزاسى جانە ەكىنشىسىنىڭ وسىنشا مولشەرى ساقتاۋلى تۇر. سونىمان قاتار 5 مىڭعا جۋىق «سپۋتنيك-لايت» دوزاسى اكەلىندى. بۇعان قوسا 400 مىڭ دوزا QazVac, 65 مىڭ دوزا Hayat, 28 مىڭ دوزا CoronaVac جانە 230 مىڭ Vero Cell ۆاكتسيناسى بار. Pfizer Comirnaty ۆاكتسيناسىنىڭ 112 مىڭ دوزاسى جەتكىزىلدى. بۇگىنگە دەيىن وبلىستا 353 065 ادام ءبىرىنشى كومپونەنتپەن, ال 334 مىڭنان اسا ادام ەكىنشى كومپونەنتپەن ۆاكتسينا الدى. بۇل حالىقتىڭ شامامەن 70%-ىنا جۋىقتايدى. سونداي-اق 70 803 ادام قايتا ۆاكتسينا قابىلدادى, – دەدى ا.بەكسۇلتانوۆا.
ايماقتا ەپيدەميالىق احۋالدىڭ كۇردەلەنە تۇسۋىنە قاراماستان, وڭىردە شاعىن جانە ورتا بيزنەس وكىلدەرىنە, Ashyq جوباسىنا قاتىساتىن وزگە دە مەكەمەلەرگە كارانتيندىك شەكتەۋ تالاپتارىنىڭ ءبىرشاما جەڭىلدەتىلگەنىن دە ايتا كەتكەن ءجون. ماسەلەن, «كوك» مارتەبەسى بار تۇرعىندار بۇعان دەيىن ءىرى ساۋدا ورىندارىنا دەمالىس جانە مەرەكە كۇندەرى كىرە المايتىن. ەندى مۇنداي ساۋدا نىساندارىنا «كوك» تە, «جاسىل» دا جىبەرىلەتىن بولدى.
جالپى, الەمدى قۇرساپ تاستاعان قاۋىپتى ىندەت باستالعان ەكى جىلعا جۋىق ۋاقىت ىشىندە وبلىستا COVID-19 جۇقتىرعان 48 مىڭعا جۋىق ادام انىقتالىپ, ونىڭ 42 مىڭنان استامى ەمدەلىپ شىققان.
قوستاناي وبلىسى
