دوستىق. قانداي قاسيەتتى ءسوز. قاي حالىقتىڭ دا ماقال-ماتەلدەرىندە دوستىق تۋرالى كوپ ايتىلادى, تاماشا ايتىلادى. بىرلىكتى بارلىق, بايلىق, باقىت دەپ بىلەمىز ءبىز. بىرلەسپەگەن ەلدىڭ بىلەگى ءالسىز كەلەدى. «بىرىككەن ەكى بىرلىگى جوق جەتىنى جەڭەدى» دەگەندى دە قازاق ايتقان. دوستىقتى, تۋىسقاندىقتى تۋ ەتىپ ۇستاعاندىقتان دا قازاقستان حالقى كوپەتنوستى مەملەكەتتىڭ مىعىمدىعىنىڭ ۇيرەنەرلىك ۇلگىسى بولىپ وتىر. ەلباسىمىز – قازاقستان حالقى اسسامبلەياسىنىڭ توراعاسى نۇرسۇلتان نازارباەۆ تاۋەلسىزدىكتىڭ ءتاڭسارى شاعىندا, ەگەمەندىكتىڭ ەلەڭ-الاڭىندا-اق ءبىزدىڭ ەلىمىزدىڭ بولاشاعى تەك قانا بىرلىككە بايلانىستى ەكەنىن باسىن اشىپ ايتتى. جاس مەملەكەتتىڭ العاشقى قادامدارىنان باستاپ ۇلتتىق ساياساتتى سارابدال جۇرگىزە ءبىلدى. ادامداردى ناسىلىنە, تەگىنە, ۇلتىنا قاراپ بولۋگە ەشقانداي جول بەرىلمەيتىنىن سالعان بەتتەن اڭعارتتى, قازاقستاندا ءار
ادام ءوزىنىڭ ىسكەرلىگىنە, بىلىكتىلىگىنە, پاراساتتىلىعىنا عانا قاراپ باعالاناتىنىن مالىمدەدى. ءىس جۇزىندە ءدال سولاي بولدى دا. سوندىقتان ءبىزدىڭ ەلىمىزدەگى قانداي ەتنوستىڭ وكىلى دە ءوزىن قازاقستاننىڭ ءتول پەرزەنتى, پاتريوتى سانايدى. وسى ەلدىڭ قىزىعىن بىرگە قىزىقتايدى, قيىندىقتارىن بىرگە ەڭسەرەدى, تابىستارىنا بىرگە قۋانادى.
پرەزيدەنت نۇرسۇلتان نازارباەۆتىڭ باستاماشىلدىعىمەن قۇرىلعان قازاقستان حالقى اسسامبلەياسى – جەر جۇزىندە بۇرىن-سوڭدى بولماعان بىرەگەي ۇيىم. ورتاق ۇيىمىزدە تاتۋلىق پەن كەلىسىم بولسىن, وسىندا ءومىر ءسۇرىپ جاتقان بارشا ەتنوستىڭ جانە بۇكىل قازاقستان حالقىنىڭ بولاشاعى ءۇشىن ماڭىزدى ماسەلەلەر تالقىلاناتىن الاڭعا اينالسىن دەپ قۇرىلعان اسسامبلەيا وتكەن جولعا جانە بولىپ جاتقان قوعامدىق-ساياسي ۇدەرىستەرگە تالداۋ جاساۋ, ۇلتتىق ساياساتتى جۇزەگە اسىرۋدىڭ وڭتايلى جولدارىن بەلگىلەۋ ءۇشىن تاپتىرماس مىنبەر ەكەنىن العاشقى جىلداردىڭ وزىندە كورسەتىپ ءۇلگەردى. قوعامدىق تۇراقتىلىقتى قالاي ساقتاپ, نىعايتۋ كەرەك, ەل ءومىرىن رەفورمالاۋدى قالاي تەزدەتۋ كەرەك دەگەن ماسەلەلەردى اسسامبلەيا مۇشەلەرى شىن جاناشىرلىقپەن تالقىلاي باستادى. مۇنىڭ ناقتى ناتيجەسىن قازىر كورىپ تە وتىرمىز.
بۇگىندە قازاقستان رەسپۋبليكاسى ەكونوميكاسى قۋاتتى, ساياساتى سارابدال, ىشكى تۇراقتىلىعى مىقتى مەملەكەت رەتىندە الىسقا دا, جاقىنعا دا بىردەي قادىرلى. ەلىمىزدىڭ ەۋروپاداعى قاۋىپسىزدىك پەن ىنتىماقتاستىق ۇيىمىنا توراعالىققا سايلانۋى مۇنىڭ ايشىقتى ايعاعى. بىزگە وسىنداي سەنىم كورسەتۋ ەڭ الدىمەن قازاقستانداعى ۇلتارالىق تاتۋلىقتىڭ ارقاسى. نۇرسۇلتان نازارباەۆ وزگە ەلدەردە كەمشىلىك دەپ سانالىپ كەلگەن كوپەتنوستىلىقتى مەملەكەتتىڭ ارتىقشىلىعىنا اينالدىرا ءبىلدى. بۇل قانداي قادامىن دا الىستان ويلاستىراتىن, كەمەڭگەر ساياساتكەرگە ءتان بەلگى.
مەن – تۇرىك حالقىنىڭ وكىلىمىن. استاناداعى قالالىق تۇرىك ەتنومادەني بىرلەستىگىنىڭ توراعاسىمىن. قازاقستان حالقى اسسامبلەياسىنىڭ مۇشەسى رەتىندە ەلىمىزدەگى تاتۋلىققا, بىرلىككە, دوستىققا, ىنتىماققا قولىمنان كەلگەنشە ۇلەس قوسىپ ءجۇرمىن. بىزگە ءوزىمىزدىڭ ءتول مادەنيەتىمىزبەن سۋسىنداۋعا دا بارلىق جاعداي جاسالعان. وسى جاقىندا عانا استانادا, بەيبىتشىلىك جانە كەلىسىم سارايىندا تۇرىك رەسپۋبليكاسىنىڭ مەملەكەتتىك «حالىق ءبيى» ءانسامبلى ءوز ونەرىن كورسەتتى.
تاياۋ كۇندەردە قازاقستان حالقىنا ورتاق مەرەكەنى – ناۋرىزدى تويلايمىز. ءبىر-بىرىمىزگە قۇتتى بولسىن ايتامىز, جاقسى تىلەكتەر تىلەيمىز. نۇرسۇلتان ءابىش ۇلى نازارباەۆ سياقتى بۇكىل الەم تانىعان, مويىنداعان ەلباسىمىز بار, تاتۋ-ءتاتتى حالقىمىز بار, ەڭبەكقور ەلىمىز بار, جەردىڭ استىن دا, ءۇستىن دە تولتىرعان بايلىعىمىز بار, ىرىس قونعان جۇرتپىز. وسى ىنتىماعىمىزدى, وسى بىرلىگىمىزدى كوزدىڭ قاراشىعىنداي ساقتاۋىمىز, بالالارىمىزعا, نەمەرەلەرىمىزگە, شوبەرەلەرىمىزگە ۇلگى ەتىپ, ونەگە ەتىپ ايتۋىمىز, اماناتقا قالدىرۋىمىز كەرەك. سولاي ەتۋ ارقىلى ءبىز ەلدەگى الەۋمەتتىك-ەكونوميكالىق رەفورمالاردىڭ ويداعىداي جۇزەگە اسىرىلۋىنا جاعداي جاسايمىز, ءوزىمىزدىڭ بەرىك تە باياندى بولاشاعىمىزدى قامدايمىز.
اسكەر پيريەۆ,
قازاقستان حالقى
اسسامبلەياسىنىڭ مۇشەسى,
استانا قالالىق تۇرىك ەتنومادەني بىرلەستىگىنىڭ توراعاسى.
