اكىمدىك عيماراتىنداعى مۇنداي كەزدەسۋ الدىڭعى اپتادا قاراتاۋ اۋدانىنىڭ بەلسەندىلەرىمەن وتكەن بولاتىن. قالا اكىمى ەلدى مەكەندەردى ارالاپ, وندا تۇرعىندارمەن كەزدەسۋدەن بولەك, بەلسەندىلەرمەن قوعامدىق قابىلداۋلار وتكىزۋدى جۇيەلى تۇردە جالعاستىرماق.
بۇگىنگى جيىن بارىسىندا اباي اۋدانىنا قاتىستى سالالار بويىنشا ماسەلە كوتەرىلدى. قالا باسشىسى ءار بەلسەندى قوزعاعان ماسەلەنى مۇقيات تىڭداپ, سۇراقتارعا جاۋاپ بەردى.
التىنتوبە تۇرعىندارى اعىن سۋ, ايالداما, جەردى راسىمدەۋ قۇجاتتارى, تابيعي گاز ماسەلەسىن كوتەرسە, قالا اكىمى ءبورجار سۋ قويماسىنان التىنتوبە تۇرعىن الابىنا دەيىن سۋ ارناسىن سالۋ بويىنشا جسق ازىرلەنۋدە, شىمكەنت-بادام تاس جولىنا 2 ايالداما ورناتىلاتىنىن, ال تابيعي گاز ماسەلەسى وسى كوكتەمدە شەشىلەتىنىن ءتۇسىندىرىپ ءوتتى.
قىزىلجار تۇرعىندارى تەمىرلان تاس جولى بويىنا (الاش بازارى تۇسىنا) جاياۋ جۇرگىنشىلەرگە ارنالعان جەر استى وتكەلىن سوعۋ, ينفراقۇرىلىم ماسەلەسىن شەشۋدى سۇرادى. مۇندا جەر استى وتكەلىن سوعۋعا جسق ازىرلەنىپ, مەملەكەتتىك ساراپتاماعا جولدانعانى ايتىلىپ, جاڭاقۇرىلىس اۋماعىنا 210 ۇيگە ينفراقۇرىلىم جۇيەلەرىن جۇرگىزۋ ماقساتىندا بيىل جسق ازىرلەنەتىندىگى ايتىلدى.
كەزدەسۋدە مەكتەپ, ينتەرنەت, جول سالۋ, مازارات قورشاۋ سەكىلدى ماسەلەلەر دە كوتەرىلدى. ءاربىر اتقارىلار جۇمىستى تۇرعىندارعا ءتۇسىندىرىپ, كەيبىر تۇستا سالا باسشىلارىنا ەسكەرتۋلەر ايتتى.
م.ايتەنوۆ ماسەلەنىڭ بارلىعى كەزەگىمەن, جۇيەلى تۇردە ىسكە اساتىنىن ايتىپ, قالا تىرشىلىگىنە بەيجاي قارامايتىن اۋدان بەلسەندىلەرىنە دە العىسىن ءبىلدىردى.
