«الەمدە بولىپ جاتقان وقيعالار تەرروريزم, ەكسترەميزم, ترانسۇلتتىق قىلمىس قازىرگى زاماننىڭ وزەكتى سىن-قاتەرلەرى بولىپ قالاتىنىن كورسەتەدى. بۇل جاعدايدا اوسشك قىزمەتى ەرەكشە وزەكتىلىككە يە. قازاقستان فورۋمنىڭ قازىرگى توراعاسى بولىپ تابىلاتىنى جانە اوسشك كەڭىستىگىندە قاۋىپسىزدىك پەن ىنتىماقتاستىقتى نىعايتۋ ءۇشىن بارلىق كۇش-جىگەرىن سالاتىنى بەلگىلى. فورۋمنىڭ ودان ءارى ينستيتۋتسيونالدىق دامۋى, ونىڭ حالىقارالىق ۇيىمعا اينالۋى بۇل جۇمىسقا جاڭا سەرپىن بەرەدى دەپ سانايمىز», دەدى قاسىم-جومارت توقاەۆ «ورتالىق ازيا - ءۇندىستان» سامميتىندە سويلەگەن سوزىندە.
پرەزيدەنت كەڭەستىڭ الەۋەتى مەن مارتەبەسىن نىعايتۋداعى ءۇندىستاننىڭ ءرولى زور ەكەنىن اتاپ ءوتتى.
«بيىل اوسشك مەرەيتويلىق ءسامميتى وتەدى, مودي مىرزا ءسىزدى قازاقستاننىڭ ەلورداسىندا كورەمىز دەگەن ۇمىتتەنەمىن. فورۋم اياسىندا تالقىلاۋعا شىعارىلاتىن وزەكتى ماسەلەلەردىڭ قاتارىندا اۋعان ماسەلەسى دە بار. ءبىزدىڭ ساياسي كوزقاراستارىمىز بەن جەكە سەنىمىمىزگە قاراماستان, ءبىز اۋعانستان مەن ونىڭ حالقىن گۋمانيتارلىق داعدارىستىڭ بۇرىن-سوڭدى بولماعان قيىندىقتارى مەن قاۋىپ-قاتەرلەرىمەن جالعىز قالدىرماۋىمىز كەرەك. قازاقستان ءوز تاراپىنان اۋعانستانمەن ءىس جۇزىندەگى ءوزارا ءىس-قيمىلدى جالعاستىرىپ, مەزگىل-مەزگىل وعان ازىق-ت ۇلىك, ءبىرىنشى كەزەكتە قاجەتتى تاۋارلار مەن ءدارى-دارمەكتەر تۇرىندە كومەك جىبەرەدى. قاۋىپسىز جانە تۇراقتى اۋعانستان ازيا ەلدەرىنىڭ ساۋدا-ەكونوميكالىق بايلانىستارىن كەڭەيتۋگە جانە ورنىقتى دامۋىنا جاڭا مۇمكىندىكتەر اشاتىنىنا سەنىمدىمىن», دەپ تۇيىندەدى قاسىم-جومارت توقاەۆ.
