«قازاقستاندا ەلەكتروندىق ۇكىمەت ءتيىمدى جۇمىس ىستەۋدە, ەكونوميكانىڭ بارلىق جۇيە قۇراۋشى سەكتورلارىن تسيفرلاندىرۋ, سمارت-قالالاردى, مەديتسينا مەن ءبىلىم بەرۋدى دامىتۋ جونىندەگى جوبالار ىسكە اسىرىلۋدا, تسيفرلىق شەشىمدەر بانك-قارجى جۇيەسىندە تابىستى قولدانىلۋدا», دەدى قاسىم-جومارت توقاەۆ «ورتالىق ازيا - ءۇندىستان» سامميتىندە سويلەگەن سوزىندە.
مەملەكەت باسشىسى بۇگىندە جاساندى ينتەللەكت, Big data, ينتەرنەت-زاتتار, ونلاين-كوممەرتسيا جانە كيبەرقاۋىپسىزدىك سياقتى سالالاردى دامىتۋ ۇلكەن سۇرانىسقا يە بولىپ وتىرعانىن ايتتى. بۇدان باسقا, قازاقستاندا تەلەكوممۋنيكاتسيا, ەلەكتروندىق ونەركاسىپ, سونداي-اق ەلەكتروندىق تەحنيكانىڭ قۇراستىرۋ وندىرىستەرى سالاسىنداعى زەرتحانالاردى قۇرۋ جونىندەگى جوبالار قىزىعۋشىلىق تۋدىرادى.
ء«بىز وسى باعىتتار بويىنشا ءوزارا ءتيىمدى ىنتىماقتاستىققا دايىنبىز. ءۇندى كومپانيالارىن قازاقستاندىق نارىققا شاقىرامىز. مەن قازاقستان حالقىنا ارناعان جولداۋىمدا 2025 جىلعا قاراي كەمىندە 100 مىڭ جوعارى بىلىكتى IT -مامانداردى دايارلاۋ مىندەتىن قويدىم. وسىعان بايلانىستى بىزگە ءۇندىستاننىڭ تاجىريبەسى دە, ءۇندىستاننىڭ IT جانە ينجەنەرلىك كادرلاردى وقىتۋداعى باي تاجىريبەسى دە قىزىقتى. پراكتيكالىق قادام رەتىندە «Astana Hub» حالىقارالىق IT-ستارتاپتار تەحنوپاركى بازاسىندا Bagmane تەحنولوگيالىق پاركىمەن جانە باسقا دا ءۇندى IT-الىپتارىمەن بىرگە ورتالىق ازيا ءۇشىن ينجەنەرلىك كەڭسە مەن اقپاراتتىق تەحنولوگيالار مەكتەبىن اشۋدى ۇسىنامىز», دەدى قاسىم-جومارت توقاەۆ.
