«الەمدىك شارۋاشىلىق بايلانىستار جۇيەسىندە ورتالىق ازيانىڭ كولىكتىك-لوگيستيكالىق الەۋەتى زور. قازاقستان اۋماعى ارقىلى 11 حالىقارالىق ترانزيتتىك ءدالىز وتەدى. ونىڭ ىشىندە 5 تەمىرجول جانە 6 اۆتوموبيل باعىتى شىعىس-باتىس جانە سولتۇستىك-وڭتۇستىك باعىتىندا جۇك قوزعالىسىنىڭ جوعارى جىلدامدىعىن قامتاماسىز ەتەدى. سولتۇستىك-باتىس باعىتتا ەۋرازيالىق ەكونوميكالىق وداق كەڭىستىگىندەگى بىرىڭعاي كەدەندىك اۋماقتى ەسكەرە وتىرىپ, رەسەي نارىعىنا, سونداي-اق شىعىس ەۋروپانىڭ بىرقاتار ەلدەرىنە كەدەرگىسىز قولجەتىمدىلىك بار», دەدى قاسىم-جومارت توقاەۆ سامميت بارىسىندا.
مەملەكەت باسشىسى قۋاتى جىلىنا 26 ملن توننا بولاتىن اقتاۋ جانە قۇرىق قازاقستاندىق پورتتارى ارقىلى وتەتىن وڭتۇستىك-باتىس مارشرۋتىنىڭ دا بولاشاعى زور ەكەنىن اتاپ ءوتتى.
«كاسپي تەڭىزى ارقىلى ولار كاسپي ءوڭىرى, تۇركيا مەملەكەتتەرىنە جانە ودان ءارى باتىسقا كەڭ جول اشادى. سوڭعى ون جىلدا قازاقستان ۇلتتىق كولىك ينفراقۇرىلىمىن دامىتۋعا شامامەن 30 ملرد دوللار ينۆەستيتسيالادى. بولاشاقتا ءبىز ونى جاڭعىرتۋعا ەلەۋلى ينۆەستيتسيالار سالۋدى جالعاستىرامىز. تەڭىزگە شىعا المايتىن ەلدەرىمىز ءۇشىن بۇل ستراتەگيالىق ماڭىزى بار ماسەلە. ورتالىق جانە وڭتۇستىك ازيانىڭ ءوزارا بايلانىستىلىعى ارحيتەكتۋراسىنىڭ نەگىزگى ەلەمەنتى سەنىمدى, ءتيىمدى جانە قاۋىپسىز ترانزيتتىك ينفراقۇرىلىم قۇرۋ بولۋعا ءتيىس دەپ سەنەمىن», دەپ قوستى پرەزيدەنت.
وسىعان بايلانىستى مەملەكەت باسشىسى وڭىرارالىق كولىك-لوگيستيكالىق كونسورتسيۋم قۇرۋدى ۇسىندى.
«ول ءۇشىن وڭىرارالىق كولىك-لوگيستيكالىق كونسورتسيۋم قۇرۋ مۇمكىندىگىن قاراستىرۋدى ۇسىنامىن. اتالعان قۇرىلىم ءۇندىستان, كاسپي تەڭىزى مەن پارسى شىعاناعى پورتتارى باعىتىنداعى كولىك باعىتتارىنىڭ تولىققاندى ءارى ءوزارا ءتيىمدى جۇكتەلۋىنە قاتىستى ۇلتتىق ساياساتتى ءتيىمدى ۇيلەستىرۋدى قامتاماسىز ەتە الار ەدى», دەپ اتاپ ءوتتى قاسىم-جومارت توقاەۆ.
