پالاتا سپيكەرى ءوز سوزىندە تاياۋدا مەملەكەت باسشىسى قاسىم-جومارت توقاەۆ بەلگىلەپ بەرگەن ەلىمىزدىڭ نەگىزگى باسىمدىقتارى تۋرالى ايتتى.
«ەل پرەزيدەنتى قازاقستاننىڭ الدىندا تۇرعان الەۋمەتتىك-ەكونوميكالىق جانە قوعامدىق-ساياسي باعىتتاعى نەگىزگى باسىمدىقتاردى بەلگىلەپ بەردى. سونداي-اق جاڭا ۇكىمەت قۇرامى مەن بارلىق مەملەكەتتىك اپپاراتقا ناقتى تاپسىرمالار بەردى. مەملەكەت باسشىسى ساياسي جۇيەمىزدى ودان ءارى دەموكراتيالاندىرۋ قاجەت ەكەنىن دە اتاپ ءوتتى. وسى باعىتتاعى ناقتى باستامالار ساراپشىلارمەن جانە جۇرتشىلىقپەن جۇرگىزىلگەن جان-جاقتى ديالوگتان كەيىن بيىلعى قىركۇيەكتە جاريالانادى», دەدى ماۋلەن اشىمباەۆ.
سونىمەن قاتار پالاتا توراعاسى سەناتتىڭ الدىندا ەل پرەزيدەنتىنىڭ بارلىق باستاماسىن زاڭنامالىق تۇرعىدان ساپالى جانە ۋاقتىلى قامتاماسىز ەتۋ ءۇشىن اۋقىمدى مىندەتتەر تۇرعانىن ايتتى.
ءوز كەزەگىندە كەترين ليچ قازاقستان پرەزيدەنتى ايقىنداعان مىندەتتەردىڭ ماڭىزدى ەكەنىنە توقتالىپ, ولاردىڭ قولعا الىنعان رەفورمالاردى جەدەل ىسكە اسىرۋعا باعىتتالعانىن تىلگە تيەك ەتتى.
كەزدەسۋ بارىسىندا سۇحباتتاسۋشىلار جىل باسىندا ەلىمىزدە بولعان قايعىلى وقيعا دا نازار اۋداردى. بۇل رەتتە بولعان جاعدايدى وبەكتيۆتى جانە اشىق باعالاۋدىڭ ماڭىزدى ەكەنى ايتىلدى. پالاتا توراعاسى ول ءۇشىن ەلىمىزدە بارلىق قاجەتتى شارالار قابىلدانعانىن, تەرگەۋ جۇمىستارىنىڭ ناتيجەسى اشىق جاريالانىپ, حالىقارالىق قوعامداستىققا جولداناتىنىن جەتكىزدى.
تاراپتار ەكى ەلدىڭ پارلامەنتارالىق ىنتىماقتاستىعىن نىعايتۋ ماسەلەلەرىن دە تالقىلادى. ماۋلەن اشىمباەۆ پاندەميادان كەيىن قازاقستان مەن ۇلىبريتانيا اراسىندا پارلامەنتارالىق بايلانىستىڭ قارقىنى تولىق قالپىنا كەلەتىنىنە سەنىم ءبىلدىردى. بۇدان باسقا, ول قازاقستاندىق دەپۋتاتتار ەقىۇ پارلامەنتتىك اسسامبلەياسى, پارلامەنتارالىق وداق جانە باسقا دا قۇرىلىمدار اياسىندا بريتانيالىق ارىپتەستەرىمەن كوپجاقتى بايلانىستى دامىتۋعا مۇددەلى ەكەنىن ايتتى.
