ايماقتار • 26 قاڭتار، 2022

ماس كۇيدە ايالدامادا ۇيىقتاپ قالعان شەنەۋنىك قىزمەتىنەن كەتتى

134 رەت كورسەتىلدى

پەتروپاۆلدا ماس كۇيدە ايالدامادا ۇيىقتاپ قالعان شەنەۋنىك قىزمەتىنەن بوساتىلدى. ۇەم تابيعي مونوپوليالاردى رەتتەۋ كوميتەتىنىڭ سولتۇستىك قازاقستان بويىنشا دەپارتامەنت باسشىسى اباي بالابەكوۆكە قاتىستى ءىس تارتىپتىك كەڭەستە قارالدى، دەپ حابارلايدى Egemen.kz.

وقيعا وتكەن جىلدىڭ قاراشا ايىندا بولعان. اۆتوبۋس ايالداماسىندا الاڭسىز ۇيىقتاپ جاتقان مەملەكەتتىك قىزمەتشىنى پاترۋلدىك پوليتسيا تاۋىپ العان. ونلاين وتكەن كەڭەستە ايىپتى جۇرەك تالماسى بولعاندىقتان كوشەدە جاتقانىن ايتىپ اقتالعان.

«مەن بالا كەزدەن جۇرەك اۋرۋىنا شالدىققانمىن، ديسپانسەرلىك تىركەۋدە تۇرمىن. تىنىس الۋ جولدارىندا دا اقاۋ بار. ۇيگە بارماق بولىپ تاكسي شاقىرتتىم، كەلمەدى. اۆتوبۋس ايالداماسىندا قوعامدىق كولىك كۇتتىم. ساعات 22.00 شاماسى بولاتىن. سپيرتتىك ىشىمدىكتەن بار-جوعى 300 گرامم العان ەدىم. ايالدامادا كوزىمدى جاي عانا جۇمىپ جاتقان ەدىم. پوليتسيا تاپ بولدى»، دەيدى ارمان بالابەكوۆ.

الايدا مەديتسينالىق كۋالاندىرۋ شەنەۋنىكتىڭ سپيرتتىك ىشىمدىككە تويىپ العانىن كورسەتكەن. تارتىپتىك كەڭەس مۇشەلەرى ونى قىزمەتىنەن بوساتۋ جونىندە ۇسىنىستى داۋىسقا سالدى.

«ارمان بالابەكوۆ ادەپ كودەكسىنىڭ نورمالارىن ءبىرىنشى رەت بۇزىپ وتىرعان جوق. 2020 جىلى ماس كۇيىندە كولىك تىزگىندەگەنى جانە ءوز كولىگىن ماس ادامعا جۇرگىزۋگە بەرگەنى انىقتالعان ەدى. كەڭەس مۇشەلەرى ءبىر اۋىزدان شەنەۋنىكتى قىزمەتىنەن بوساتۋ جونىندە ۇسىنىس جاساۋ شەشىمىن قابىلدادى»، دەيدى مەملەكەتتىك قىزمەت ىستەرى اگەنتتىگىنىڭ سقو بويىنشا دەپارتامەنتىنىڭ باس مامانى  ماحاببات سامرات.

سوڭعى جاڭالىقتار

ۇقساس جاڭالىقتار