ۇلىبريتانيانىڭ ەقىۇ جانىنداعى ەلشىلىگى 20 قاڭتاردا ۆەنادا وتكەن ۇيىمنىڭ تۇراقتى كەڭەسىنىڭ وتىرىسىندا قازاقستانداعى جاعدايدعا باعا بەرىپ, مالىمدەمە جاسادى.
«جاقىن دوستار رەتىندە ءبىز سوڭعى اپتالاردا قازاقستان حالقىنىڭ باستان كەشكەن قايعىلى وقيعالارىنا قاتتى الاڭداۋشىلىق بىلدىردىك. زورلىق-زومبىلىق ناتيجەسىندە ادامداردىڭ قازا تاپقانىن زور كۇيزەلىسپەن قابىلدادىق جانە مارقۇمداردىڭ وتباسىلارىنا كوڭىل ايتامىز. الماتى مەن باسقا دا وڭىرلەردىڭ تەزىرەك قالىپتى ومىرگە ورالۋىنا تىلەكتەستىك بىلدىرەمىز», دەدى ۇلىبريتانيانىڭ ەقىۇ جانىنداعى تۇراقتى وكىلى, ەلشى نيل بۋش.
بريتاندىق ەلشى مەملەكەت باسشىسى ق.توقاەۆتىڭ حالىققا ۇندەۋىندە, الماتىداعى جانە باسقا قالالارداعى بەيبىت شەرۋشىلەر مەن «ۇيىمداسقان قىلمىستىق توپ» اراسىنداعى ناقتى ايىرماشىلىقتى اتاپ وتكەنىن قۇپتادى. بۇل «كونستيتۋتسيالىق بيلىكتى قۇلاتۋدى كوزدەگەنى انىق» دەپ اتاپ وتكەن ديپلومات قازاقستاندا ورىن العان وقيعا «جان-جاقتى تەرگەۋدى قاجەت ەتەتىن ماسەلە» ەكەنىن باسا ايتتى.
ء«بىز قازاقستان پرەزيدەنتىنىڭ بولعان وقيعالار مەن ءولىمنىڭ سەبەبىن انىقتاۋ ءۇشىن تەرگەۋ كوميسسياسىن قۇرۋ تۋرالى شەشىمىن قۇپتايمىز. قازاقستان بيلىگى بۇل تەرگەۋدى ءتيىمدى ءارى اشىق بولۋىن جانە قازاقستان حالقىنىڭ سەنىمىنە يە بولۋىن قامتاماسىز ەتۋ جونىندەگى مىندەتتەمەسىن قولدايمىز», دەلىنگەن ەلشى مالىمدەمەسىندە.
سونداي-اق مالىمدەمەدە قازاقستاندىق بيلىكتىڭ ادام قۇقىقتارى مەن حالىقارالىق مىندەتتەمەلەرىن ساقتاۋعا بەرىك كەپىلدىكتەرى اتاپ ءوتىلدى.
سونىمەن قاتار بارلىق ۇستالعاندار زاڭعا سايكەس ءتيىستى قۇقىقتىق ءراسىمدى قامتاماسىز ەتۋدىڭ ماڭىزدىلىعى ايتىلدى. پرەزيدەنت ق.توقاەۆتىڭ 11 قاڭتاردا قازاقستان پارلامەنتىندە بەيبىت شەرۋشىلەردىڭ نەگىزگى تالاپتارىنا جاۋاپ رەتىندە ەكونوميكالىق, الەۋمەتتىك جانە ساياسي رەفورمالار جوسپارى تۋرالى سويلەگەن ءسوزىنىڭ ماتىنىندە بريتاندىق ديپلومات ولاردىڭ ورىندالۋىنا قولداۋ كورسەتۋگە دايىن ەكەنىن ايتتى.
بريتاندىق ەلشى ن.بۋش ەكى ەل اراسىنداعى ديپلوماتيالىق قارىم-قاتىناستاردىڭ 30 جىلدىعىندا قالىپتاسقان بەرىك ارىپتەستىككە توقتالا وتىرىپ قازاقستانعا قولداۋ كورسەتۋگە دايىن ەكەندىگىن اتاپ ءوتتى.
