قازاقستان مەن تۇركيا ەلدەرى بىرلەسىپ اشقان Tulpar May جشس-ى جىلىنا 2,9 مىڭ توننا ماقتا مايىن, 14 مىڭ توننا شروت وندىرمەك. ماقتاارال اۋىلدىق وكرۋگى, كوكارال ەلدى مەكەنىندە اشىلعان كاسىپورىننىڭ اۋماعى – 0,27 گەكتار, ينۆەستيتسيا كولەمى – 2,1 ملرد تەڭگە. زاۋىتتا 50-گە جۋىق ادام جۇمىسقا قابىلدانعان. جىلىنا 10 مىڭ توننا ماقتانى وڭدەۋگە قاۋقارلى. قازىرگى تاڭدا زاۋىتتىڭ قۇرال-جابدىقتارىن ورناتۋدىڭ سوڭعى ساتىلارى جۇزەگە اسۋدا. اۋدان اكىمى باقىت اسانوۆ ماقتا مايىن شىعاراتىن زاۋىتتان بولەك, تۇركيا مەملەكەتىمەن بىرگە ءجىپ يىرەتىن توقىما فابريكاسىن ىسكە قوسۋ دا جوسپارلانىپ وتىرعانىن ايتادى. «ماقتاارالدىقتار «اق التىنىن» شيكىزات كۇيىندە ەمەس, دايىن ءونىم كۇيىندە ەلىمىزدىڭ باسقا وڭىرلەرىنە, شەتەلگە ساتىپ, تابىسىن ەسەلەي الادى. ايتا كەتەيىن, 2021-2024 جىلدارى اۋداندا شەتەلدەن تىكەلەي ينۆەستيتسيا تارتۋ باعىتىندا جالپى كولەمى 10,8 ملرد تەڭگە بولاتىن 5 ءىرى جوبا ىسكە اسىرىلۋدا», دەيدى اۋدان اكىمى.
جىل ون ەكى اي بويى قاراپ وتىرمايتىن ماقتاارالدىق ديقاندار قاڭتاردىڭ ءاربىر ءساتتى كۇنىن پايدالانىپ, قىرىققابات جانە قىزىلشا داقىلدارىن ەگۋدە. ەگىستىك القاپتار مەن ۇيىرگەلىك جەرلەردە قازىردىڭ وزىندە بىرنەشە بريگادا قىزۋ جۇمىس جۇرگىزۋدە. مىسالى, «فيزۋلي» شارۋا قوجالىعى 15 گەكتارعا ەرتە پىسەتىن قىرىققابات ەككەن. ەگىستىك القابىندا 60 ادامنان قۇرالعان بريگادا تىنباي جۇمىس ىستەۋدە. «جۇمىسشىلارعا كۇنىنە 4 500 تەڭگەدەن ەڭبەكاقى تولەۋدەمىز. قىرىققاباتتىڭ «ۆاليكور» اتتى سۇرپىن تامشىلاتىپ سۋارۋ تەحنولوگياسىمەن ەگىپ جاتىرمىز. نەگىزىنەن 2 ايدىڭ كولەمىندە ەككەن ەگىنىمىز ءپىسىپ جەتىلەدى. ەگىلگەن كوشەتتىڭ ءۇستىن جاپقىشپەن جاۋىپ, جاۋىن-شاشىننان قورعايمىز. ەڭ باستىسى – كۇتىپ-باپتاۋعا ۇلكەن ءمان بەرىلۋى كەرەك», دەيدى قوجالىق باسشىسى ف.اليەۆ.
ەرتە پىسەتىن قىرىققابات ونىمىنە ەۋروپالىقتار مەن رەسەيلىكتەر تاراپىنان سۇرانىس وتە جوعارى. قازىردىڭ وزىندە ماقتاارال اۋدانىندا 18 گەكتار جەرگە قىرىققابات, 15 گەكتارعا قىزىلشا داقىلى وتىرعىزىلعان. جالپى بيىل 1 446 گەكتار جەرگە ەرتە ەگىلەتىن كوكونىستەر ەگۋ جوسپارلانىپ وتىر. قىرىققابات پەن قىزىلشا داقىلدارى ەرتە پىسەتىندىكتەن, ماقتاارالدىق ديقاندار ونىڭ سوڭىنان قاۋىن-قاربىز, ماقتا سياقتى داقىلدار ەگۋگە كىرىسەدى. وسىلايشا جەر ەمگەن شارۋالار ءبىر جىلدا ەكى رەت, ءتىپتى ءۇش رەت ءونىم الادى. وتكەن جىلى ماقتاارالدىق شارۋالار 46,4 مىڭ توننا كوكونىس ءوندىرىپ, ونىڭ 80%-ىنا جۋىعىن تمد ەلدەرىنە, بالتىق جاعالاۋى, تۇركيا, گەرمانيا, گرەكيا ەلدەرىنە ەكسپورتتاعان.
سونداي-اق اۋداندا اعىن سۋدى بارىنشا ۇنەمدى ءارى ءتيىمدى پايدالانۋ ماقساتىندا قىسقى سور شايۋ جۇمىستارىن جۇرگىزۋ ءۇشىن 27 301 گەكتار ەگىستىك القاپتا پال الۋ جۇمىستارى جۇرگىزىلۋدە. قازىرگى تاڭدا 3 135 گەكتار القاپ سۋارىلعان. «دوستىق» ماگيسترالدى كانالىنان ماقتاارال اۋدانىنىڭ ەگىستىك القاپتارىنا سەكۋندىنا 32 تەكشە مەتر سۋ كەلۋدە. وسى كورسەتكىشتى ساقتاي وتىرىپ, قىسقى سور شايۋ جۇمىستارىن ناۋرىز ايىنىڭ العاشقى ونكۇندىگىنە اياقتاۋ جوسپارلانعان. ايتا كەتەلىك, «وڭتۇستىك قازاقستان گيدروگەولوگيالىق-مەليوراتيۆتىك ەكسپەديتسياسى» رمم-ءنىڭ اۋدان بويىنشا بەرگەن كارتاسىنا سايكەس, اۋىلدىق وكرۋگى بويىنشا سۋارمالى جەرلەردىڭ 1,4 مىڭ گەكتارى (2,1%) وتە كۇشتى, 3,4 مىڭ گەكتارى (5,3%) كۇشتى, 16,3 مىڭ گەكتارى (2,6%) ورتا, 15,8 مىڭ گەكتارى (2,4%) شامالى تۇزدانعان. ال 26,6 مىڭ گەكتار (41,7%) تۇزدانباعان جەرلەر بولىپ سانالادى.
تۇركىستان وبلىسى
