ايماقتار • 24 قاڭتار، 2022

تارتىپسىزدىك كەزىندە زارداپ شەككەندەرگە وتەماقى تولەنەدى

86 رەت كورسەتىلدى

بۇل تۋرالى باقىتجان ساعىنتاەۆتىڭ توراعالىعىمەن وتكەن الماتىنىڭ تىنىس-تىرشىلىگىن قالپىنا كەلتىرۋ جونىندەگى قالالىق شتاب وتىرىسىندا اكىمنىڭ ورىنباسارى ءىلياس وسەروۆ حابارلادى، دەپ جازادى Egemen.kz.

وسەروۆتىڭ ايتۋىنشا، مەملەكەتتىك ورگانداردىڭ، اۋرۋحانالار مەن باق-تىڭ زارداپ شەككەن 603 قىزمەتكەرىنە وتەماقى تولەنەدى. ونىڭ قاتارىندا 592-ءى قۇقىق قورعاۋ ورگاندارىنىڭ قىزمەتكەرى، توتەنشە جاعدايلار دەپارتامەنتىنىڭ 1 قىزمەتكەرى، جەرگىلىكتى اتقارۋشى ورگانداردىڭ 3 قىزمەتكەرى، «الماتى» تەلەارناسىنىڭ 1 قىزمەتكەرى جانە مەديتسينالىق ۇيىمداردىڭ 6 قىزمەتكەرى بار.

جاراقات الىپ، زارداپ شەككەندەرگە وتەماقى ءۇش سانات بويىنشا بەرىلەدى. اۋىر دارەجەدە - 2 ملن تەڭگە، ورتاشا دارەجەدە – 1 ملن تەڭگە، جەڭىل تۇردە – 500 مىڭ تەڭگە ەسەبىندە.

سونىمەن قاتار تج كەزىندە جۇمىلدىرىلعان پوليتسيا دەپارتامەنتىنىڭ 3878 قىزمەتكەرىنە، توتەنشە جاعدايلار دەپارتامەنتىنىڭ 1207 قىزمەتكەرىنە، قوعامدىق دەنساۋلىق باسقارماسىنىڭ 3888 قىزمەتكەرىنە، قۇتقارۋ قىزمەتىنىڭ 93 قىزمەتكەرىنە 100 مىڭ تەڭگە قارجىلاي كومەك تولەنەدى.

«بۇگىن ءتيىستى قۇجاتتار قازىناشىلىققا جىبەرىلىپ، تۇستەن كەيىن العاشقى تولەمدەر جاسالادى»، دەپ اتاپ ءوتتى الماتى اكىمىنىڭ ورىنباسارى.

پوليتسيا دەپارتامەنتىنە ءتيىستى تەرگەۋ ارەكەتتەرى اياقتالعاننان كەيىن زارداپ شەككەن اۆتوكولىكتەرگە تولەمدەردى قامتاماسىز ەتۋ ءۇشىن شامامەن 200 ملن تەڭگە مولشەرىندە باستاپقى سوما جىبەرىلەتىن بولادى. قاجەت بولعان جاعدايدا بۇل سوما كوبەيتىلەدى.

سوڭعى جاڭالىقتار

ۇقساس جاڭالىقتار