پارلامەنت • 20 قاڭتار، 2022

سەناتورلار ماڭىزدى ماسەلەلەرگە نازار اۋداردى

5484 رەت كورسەتىلدى

سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وندا دەپۋتاتتار بەيبىت يساباەۆتى الەۋمەتتىك-مادەني دامۋ جانە عىلىم كوميتەتىنىڭ توراعاسى ەتىپ سايلادى، دەپ حابارلايدى Egemen.kz قر پارلامەنتى سەناتىنىڭ ءباسپاسوز قىزمەتىنە سىلتەمە جاساپ. 

ال بۇعان دەيىن وسى كوميتەتتىڭ توراعاسى بولعان مۇرات باقتيار ۇلى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەسى بولىپ سايلاندى. ماۋلەن اشىمباەۆ مۇرات باقتيار ۇلىنا كوميتەت توراعاسى رەتىندە اتقارعان ەڭبەگى، زاڭنامالىق جۇمىسقا جانە ازاماتتاردى الاڭداتقان وزەكتى ماسەلەلەردى شەشۋگە قوسقان ۇلەسى ءۇشىن العىس ءبىلدىردى.

وتىرىس بارىسىندا «زاتتار مەن ماتەريالداردىڭ قۇرامى مەن قاسيەتتەرىنىڭ ستاندارتتى ۇلگىلەرىن جاساۋ جانە قولدانۋ جونىندەگى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالىپ، قابىلداندى. بۇل قۇجات قازاقستاندىق تاۋارلاردى، جۇمىستار مەن قىزمەتتەردى جەتكىزۋشىلەرگە وسى كەلىسىمگە قاتىسۋشى ەلدەرگە ەكسپورتتاۋ كەزىندە تىزىلىمگە ەنگىزىلگەن مەملەكەتتىك ستاندارتتى ۇلگىلەردى قوسىمشا سىناقتارسىز نەمەسە زەرتتەۋلەرسىز پايدالانۋعا مۇمكىندىك بەرەدى. مۇنداي ءتاسىل وتاندىق كاسىپكەرلەرگە ءوز اقشاسى مەن ۋاقىتىن ۇنەمدەۋگە جول اشادى.

«زاتتار مەن ماتەريالداردىڭ قۇرامى مەن قاسيەتتەرىنىڭ ستاندارتتى ۇلگىلەرىن جاساۋدىڭ جانە قولدانۋدىڭ ەكونوميكامىز ءۇشىن ماڭىزى زور. بۇگىن قابىلدانعان كەلىسىم – قاتىسۋشى مەملەكەتتەر اراسىندا وسى باعىتتاعى كەلىسىلگەن جۇمىستاردى جۇرگىزۋدى كوزدەيدى. الداعى ۋاقىتتا بۇل قۇجات بيزنەستەگى اكىمشىلىك جۇكتەمەلەردى قىسقارتۋعا قىزمەت ەتەدى. سونداي-اق، كەلىسىمگە قاتىسۋشى – تمد ەلدەرى اراسىندا ەكونوميكالىق جانە عىلىمي-تەحنيكالىق ىنتىماقتاستىق ءۇشىن كەدەرگىلەردى ازايتادى دەپ سەنەمىز»، دەدى ماۋلەن اشىمباەۆ.

سونىمەن قاتار وتىرىس كەزىندە سەناتورلار وزدەرىنىڭ دەپۋتاتتىق ساۋالدارىن جولداپ، «قاڭتار تراگەدياسىنىڭ» سەبەپتەرى مەن سالدارىن تالداۋ جانە مەملەكەت باسشىسى قاسىم-جومارت توقاەۆ بەرگەن تاپسىرمالاردىڭ ىسكە اسىرىلۋىن باقىلاۋ اسا ماڭىزدى ەكەنىن ايتتى.

سەناتور ءلاززات سۇلەيمەن بەيبىت ادامدار ادىلەتسىزدىكتىڭ قۇربانى بولماس ءۇشىن «قاسىرەتتى قاڭتار» وقيعاسى كەزىندەگى بارلىق دەرەكتەر مۇقيات زەرتتەلىپ، تەكسەرىلۋى كەرەك ەكەنىن ايتتى. سونداي-اق ول قۇقىق قورعاۋ ورگاندارىنا جەتكىزىلگەن جانە ۇستالعان ادامداردىڭ قورعاۋعا جانە بىلىكتى زاڭگەرلىك كومەك الۋعا قاتىستى كونستيتۋتسيالىق قۇقىعىن قامتاماسىز ەتۋ ماڭىزدى ەكەنىن تىلگە تيەك ەتتى.

ءوز كەزەگىندە ايگۇل قاپباروۆا قايعىلى وقيعا ەڭبەك سالاسىندا ساپالى وزگەرىس قاجەت ەكەنىن كورسەتىپ بەرگەنىن ايتىپ، قازىرگى جۇمىسپەن قامتۋ جانە جاستاردى جۇمىسقا ورنالاستىرۋ باعدارلامالارىن قايتا قاراۋ قاجەتتىگىنە نازار اۋداردى.

اقىلبەك كۇرىشباەۆ پرەمەر-مينيسترىنە ساۋال جولداپ، اۋىل تۇرعىندارىن الاڭداتقان پروبلەمالاردى ءسوز ەتتى. ونىڭ ىشىندە ەڭ ماڭىزدىسى جۇمىسسىزدىق ەكەنىن اتاپ وتكەن سەناتور پالاتا دەپۋتاتتارى بۇل ماسەلەنى تۇراقتى تۇردە كوتەرىپ جۇرگەنىمەن ولاردى شەشۋ ءۇشىن ۇكىمەت تاراپىنان ءتيىستى شارالار قولعا الىنباي وتىرعانىن ايتتى.

مۇحتار جۇماعازيەۆ الەمدىك تاجىريبەگە سۇيەنە وتىرىپ، اۋىل شارۋاشىلىعى تەحنيكالارىنا قاتىستى ۋتيلدىك الىم مولشەرلەمەسىن ازايتۋ ماڭىزدى ەكەنىن ايتتى. قازىرگى جاعدايدا اۋىل شارۋاشىلىعى تەحنيكاسى 80 پايىزعا دەيىن توزعاندا ۋتيلدىك الىمنىڭ قولدانىستاعى نورمالارى وتاندىق فەرمەرلەرگە جانە جالپى اۋىل شارۋاشىلىعىنا ەلەۋلى زالال كەلتىرەدى. مۇنىڭ سالدارى ازىق-ت ۇلىك باعاسىنىڭ وسۋىنە اكەلەدى.

ءوز ساۋالىندا اندرەي لۋكين ەلىمىزدەگى تۇرمەلەردە جازاسىن وتەۋشىلەردىڭ راديكالدانۋىنا توسقاۋىل قويۋ ءۇشىن ناقتى شارالاردى ىسكە اسىرۋ كەرەكتىگىن ايتتى.

نۇرجان نۇرسيپاتوۆ قىزمەتتىك بورىشىن ورىنداۋ كەزىندە قازا تاپقان نەمەسە مەرتىككەن جاعدايدا قۇقىقتىق ءتارتىپ قىزمەتكەرلەرىن الەۋمەتتىك قامتاماسىز ەتۋ جانە ولاردىڭ وتباسىلارىن قولداۋ شارالارىن جۇيەلەۋدىڭ ماڭىزدىلىعىن اتاپ ءوتتى.

ال، نۇرتورە ءجۇسىپ وسكەلەڭ ۇرپاقتى وتانشىلدىق رۋحتا تاربيەلەۋ ماسەلەسىن كوتەرىپ، ۇلتتىق قۇندىلىقتاردى ساقتاۋ جانە دارىپتەۋدىڭ ماڭىزىنا توقتالدى.

سوڭعى جاڭالىقتار

ۇقساس جاڭالىقتار