قازاقستان • 18 قاڭتار، 2022

قازپوشتا تاريفتەر قۇنىن تومەندەتتى

«قازپوشتا» اق حالىق اراسىنداعى ەڭ كوپ سۇرانىسقا يە قىزمەتتەردىڭ تاريفتەرىن – سالماعى 2 كگ-عا دەيىنگى سالىمدارى بار پوشتا جونەلتىلىمدەرىن (سالەمدەمە) جەكە تۇلعالارعا جەتكىزۋ قىزمەتىنىڭ ءتاريفىن وزىندىك قۇنى دەڭگەيىنە دەيىن تومەندەتتى، دەپ حابارلايدى Egemen.kz «قازپوشتا» اق ءباسپاسوز قىزمەتىنە سىلتەمە جاساپ.

ارمان ماناربەك ۇلى

قازپوشتا باسشىلىعى قر پرەزيدەنتى قاسىم-جومارت توقاەۆتىڭ تاپسىرماسىنا سايكەس، اعىمداعى جىلعا بەكىتىلگەن تاريفتەردى تومەندەتۋ تۋرالى شەشىم قابىلدادى. بۇدان بىلاي سالماعى 0،5 كگ-عا دەيىنگى سالەمدەمەنى قازاقستان بويىنشا جەر ءۇستى كولىگىمەن جىبەرۋ قۇنى – 900 تەڭگەنىڭ ورنىنا 857 تەڭگە، سالماعى 1 كگ-عا دەيىن – 1000 تەڭگەنىڭ ورنىنا 900 تەڭگە، 2 كگ-عا دەيىن – 1200 تەڭگەنىڭ ورنىنا 1130 تەڭگە بولدى. تومەندەتىلگەن تاريفتەر 2022 جىلعى 1-جارتىجىلدىق ىشىندە قولدانىلادى.

قازپوشتا 2021 جىلدىڭ سوڭىندا 2022 جىلعا ارنالعان تاريفتەردى ارتتىرۋ جاعىنا قايتا قاراستىرعانىن اتاپ وتەمىز. اتالعان شەشىمگە تومەندە كەلتىرىلگەن وبەكتيۆتى فاكتورلار اسەر ەتكەن بولاتىن.

بىرىنشىدەن، بۇگىنگى كۇنى ۇلتتىق پوشتا وپەراتورى 3000-نان استام زالالدى اۋىلدىق پوشتا بولىمشەلەرىن ۇستاۋ، گازەتتەردى جەتكىزۋ، زەينەتاقىلاردى بەرۋ، پاندەميا جانە كوۆيدقا قارسى شارالاردىڭ سالدارىنان شەكارالاردىڭ جابىلۋى جانە حالىقارالىق اۋە قاتىناستارىنداعى جۇيەلى كىدىرىستەر (2020-2021 جج. ناتيجەلەرى بويىنشا باسقا ەلدەرمەن اينالىم كولەمى پاندەمياعا دەيىنگى كەزەڭگە قاراعاندا 30-40% پايىزعا تۇسكەن) سەبەپتى تۋىنداعان تەرىس قارجى ناتيجەلەرىن كورسەتىپ وتىر. الايدا قازپوشتا زەينەتاقىلاردى، جاردەماقىلاردى، مەرزىمدى باسپا باسىلىمدارىن جەتكىزۋ سياقتى الەۋمەتتىك بارلىق جۇكتەمەنى ورىنداۋدى جالعاستىرۋدا.

ەكىنشىدەن، تەرىس قارجى ناتيجەلەرى قازپوشتانىڭ 17،8 مىڭ ادامنان تۇراتىن وندىرىستىك پەرسونالىنىڭ جالاقىسىن كوتەرۋگە كەدەرگى كەلتىرەدى. بۇگىنگى كۇنى جالاقىلاردى يندەكستەۋ ماسەلەسى وزەكتى بولىپ تۇر. كومپانيا قىزمەتتەرىنىڭ تاريفتەرىن وزگەرتۋ – ءوندىرىس قىزمەتكەرلەرىنىڭ ەڭبەك جاعدايلارىن جاقسارتۋعا باعىتتالعان شارالاردىڭ ءبىرى.

«قازپوشتا» اق-نىڭ باسىمدىلىعى – تراگەديالىق وقيعالاردان كەيىن كۇردەلى قالپىنا كەلتىرۋ كەزەڭىندە قازاقستاندىقتارعا جانە كومپانيا قىزمەتكەرلەرىنە قولداۋ كورسەتۋ. ونىڭ ىشىندە سۇرانىسقا يە پوشتا قىزمەتتەرىن ەلدەگى ەڭ تومەن باعامەن حالىققا ۇسىنۋ.

ايتا كەتۋ كەرەك، بايلانىستىڭ امبەباپ كورسەتىلەتىن قىزمەتتەرىنە تاريفتەر 2019 جىلعى دەڭگەيدە قالدى (جاي حاتتاردى جونەلتۋ، مبب، پوشتا كارتوچكالارى مەن سالەمدەمەلەردى جەتكىزۋ). سونىمەن قاتار، جەكە تۇلعالار اراسىندا سۇرانىسقا يە جانە ءبىر ۋاقىتتا باسەكەلەستىك ورتادا جۇرگەن تاپسىرىستى حاتتاردى ەل ىشىندە جونەلتۋ جانە جەتكىزۋ تاريفتەرى دە وزگەرىسسىز قالدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز