قوعام • 18 قاڭتار، 2022

توتەنشە جاعداي كەزىندە ءتارتىپتى قامتاماسىز ەتكەن قىزمەتكەرلەرگە سىياقى بەرىلەدى

59 رەت كورسەتىلدى

توتەنشە جاعداي كەزىندە قۇقىقتىق ءتارتىپتى قامتاماسىز ەتكەن قىزمەتكەرلەرگە 150 مىڭ تەڭگە سىياقى بەرىلدى. بۇل تۋرالى ۇكىمەت وتىرىسىندا ىشكى ىستەر ءمينيسترى ەرلان تۇرعىمباەۆ ءمالىم ەتتى، دەپ حابارلايدى Egemen.kz.

«الەۋمەتتىك-ەكونوميكالىق جاعدايدى تۇراقتاندىرۋ جوسپارىنا سايكەس، ىشكى ىستەر مينيسترلىگى 3 ءىس-شارا بويىنشا نەگىزگى ورىنداۋشى. ءبىرىنشى – اسكەري دايارلىقتى جانە قامتاماسىز ەتۋدى ارتتىرۋ، اسكەري قىزمەتشىلەردىڭ مورالدىق رۋحىن كوتەرۋ بويىنشا شارالار قابىلداۋ. ەڭ الدىمەن، ارنايى بولىنىستەردىڭ ماتەريالدىق-تەحنيكالىق بازاسىن نىعايتۋ جوسپارلانۋدا. جالپى، ماتەريالدىق بازانى نىعايتۋ ءۇشىن ۇكىمەت رەزەرۆىنەن قارجى بولىنگەن»، دەدى ە.تۇرعىمباەۆ.

ونىڭ ايتۋىنشا، جەكە قۇرامنىڭ اسكەري رۋحىن كوتەرۋ بويىنشا وتاندى سۇيۋگە، قىزمەتتىك مىندەتكە ادال بولۋعا تاربيەلەۋ بويىنشا ءىس-شارالار جوسپارى بار. قيىندىققا شىداۋ، توزىمدىلىك بويىنشا ارنايى ترەنينگتەر ۇيىمداستىرىلدى.

«ىنتالاندىرۋ، قىزمەتكەرلەردىڭ ەڭبەگىن باعالاۋ تۇراقتى جۇزەگە اسىرىلادى. مىسالى، توتەنشە جاعداي كەزىندە قۇقىقتىق ءتارتىپتى قامتاماسىز ەتكەن قىزمەتكەرلەرگە 150 مىڭ تەڭگە، ال كۋرسانتتار مەن اسكەريلەرگە باعالى سىيلىقتار بەرىلدى. جالپى، جەكە قۇرام قاۋىپسىزدىكتى قامتاماسىز ەتۋگە تولىق دايىن»، دەدى مينيستر.



 

سوڭعى جاڭالىقتار

ۇقساس جاڭالىقتار