ەلىمىزدىڭ قۇتقارۋ قىزمەتى كوكتەمگى تاسقىن الدىنداعى دايىندىقتارىن كۇشەيتىپ جاتىر. بۇعان دەيىن بىرنەشە وڭىردە كۇن كۇرت جىلىنسا, سۋدىڭ دەڭگەيىن كوتەرىلىپ, تۇرعىن ۇيلەردى باسىپ قالۋى مۇمكىن دەگەن بولجام جاسالعان. بۇل تۋرالى كتك تەلەارناسى حابارلادى.
قازىرگى كۇندەرى, اسىرەسە اقتوبە جانە باتىس قازاقستان وبلىستارىندا قاردىڭ جىلداعى مولشەردەن ارتىق جيىلىپ تۇرعانى قاتتى قاۋىپ ءتوندىرىپ وتىر. ەندى قار ەرىگەننەن كەيىن ايماقتارداعى ونداعان ەلدى مەكەندى تاسقىن سۋدىڭ قاسىپ قالۋى ابدەن ىقتيمال.
وسىعان وراي بۇل كۇندەرى اقتوبەدە كومۋنالدىق مەكەمەلەر كۇنى-ءتۇنى جۇمىس ىستەۋدە. سوڭعى 3 اپتا ىشىندە قالا سىرتىنا 200 مىڭ توننا قار شىعارىلعان. مۇنشالىقتى قار بۇل وڭىردە بۇرىن-سوڭدى بولماعان. ءتىپتى پوليگونعا قاردىڭ سىيماعانى سونشا, قازىر تاعى ءبىر وسىنداي ورىن اشىلعان.
«قازۆودحوز» مەكەمەسى وكىلدەرىنىڭ ايتۋىنشا, سۋ قويمالارىنداعى ىلعالدىڭ دەڭگەيىن كۇندە ولشەپ وتىر. ايماقتاعى ەكى اۋدان, اتاپ ايتقاندا, ىرعىز بەن ويىلدى سۋ باسىپ قالۋ قاۋپى بار. سونداي-اق اقتوبە وبلىسى بويىنشا 59 الەۋمەتتىك نىسان مىقتى باقىلاۋعا الىنادى. سەبەبى, كۇن بىردەن جىلىنسا, بۇلار دا توپاننىڭ استىندا قالىپ قويادى. ازىرگە كوممۋنالدىق مەكەمەلەر سينوپتيكتەردىڭ بولجامىنا قاراپ تىرلىك جاساپ جاتىر. ال اۋا رايى بولجامى كۇننىڭ جۋىق ارادا كۇن كۇرت جىلىنبايتىنىن ايتادى.
جايىقتىڭ ەرنەۋىنەن اسىپ كەتپەۋىن ويلاعان باتىس قازاقستان وبلىسىنىڭ قۇتقارۋ قىزمەتى تاسقىنعا دايىندىقتارىن ەكى اي بۇرىن باستاپ كەتتى. سونداي-اق, وزەنگە كەپ قۇياتىن ساعالار مەن شاعىن كولدەر دە ۇنەمى باقىلاۋدا. ويتكەنى, ءۇش جىل بۇرىڭعى اپات وسى اسا ۇلكەن قاۋىپ تۋدىرماعان ايماقتاردان كەلگەن. سول كەزدە 38 ەلدىمەكەندى سۋ باسىپ, تالاي ادام باسپاناسىز قالعان بولاتىن.
بيىلعى كۇزدە جاڭبىر دا جىلداعىدان كوپ جاۋدى. سونىڭ اسەرىنەن توپىراق ابدەن ءجىپسىپ, وعان ەندى ەرىگەن قار ارالاسسا ارتى تاسقىنعا ۇلاسۋ قاۋپى ءتونىپ تۇر. قۇتقارۋشىلاردىڭ ەرتە قيمىلداۋىنا ءتۇرتى بولعان سەبەپتەردىڭ ءبىرى وسى. قازىر باتىسقازاقستاندىق شەنەۋنىكتەر اپاتتىڭ الدىن الۋ شارالارىنا 152 ملن تەڭگە الدى. قاۋىپتى ايماقتاردىڭ بارىندە جانار-جاعارماي, قۇم مەن شاعىل تاستاردىڭ قاجەتتى قورى جينالىپ جاتىر. ارنايى جاساقتالعان توپتار ەندى الداعى ءبىر اپتانىڭ ىشىندە بارىنە ساقاداي-ساي وتىرماق.
وڭتۇستىك قازاقستان وبلىسىندا دا تاسقىنعا قارسى كۇرەسكە دايىندىق جۇرۋدە. اۋدانداردا ارىقتاردىڭ جاعاسى تۇگەل بەكىتىلدى. ءمينيستردىڭ ءوزى سىرداريانىڭ جيەگىن اۋەدەن بىرنەشە مارتە شولىپ شىقتى. سەلدىڭ كەسىرىنەن كەپتەلىس بولىپ, سۋ ارناسىنان اسىپ كەتپەس ءۇشىن, قازىر وزەندەردەگى مۇزدار دا جارىلىپ جاتىر.
ماسەلەن, تاياۋدا ارىس اۋدانىندا بىرنەشە جىلقى سۋعا باتىپ كەتكەن ەدى. وسىدان كەيىن جەرگىلىكتى اكىمدىكتەر قاتاڭ ەسكەرتۋ الىپ, ساقتىق شارالارىن جاساۋعا كىرىسىپ كەتتى.
مۇرات ايتقوجا.
دەرەكوز: كتك ارناسى.
فوتو: دياپازون.
