جوعالعان «بوينگتىڭ» قۇپيالارى بىرتىندەپ اشىلىپ جاتىر

بۇدان التى كۇن بۇرىن وڭتۇستىك قىتاي تەڭىزى اۋماعىندا ءىزىم-قايىم جوق بولىپ كەتكەن مالايزيا اۋە كومپانياسىنىڭ Boeing 777-200 ۇشاعى اپاتقا ۇشىراعان بولۋى دا مۇمكىن. بۇل تۋرالى يتار-تاسس حابارلادى. اگەنتتىك ءتىلشىسىنىڭ مالىمەتىنشە, ۆەتنام جاعالاۋىندا ورنالاسقان مۇناي كومپانيالارىنىڭ ءبىرىنىڭ قىزمەتكەرى مايكل دجەروم ماككەي قۇلاپ بارا جاتقان ۇشاقتى كورگەن ەكەن. ول وسىعان بايلانىستى مالايزيا ۇكىمەتىنە ەلەكتروندى حات جولداپ, ءوزىنىڭ كورگەندەرىن بايانداپ بەرىپتى. كۋاگەر لاينەردىڭ اۋەدە جارتىلاي جانىپ قۇلاعانىن جازادى. اۋە كەمەسى بار-جوعى 10-15 سەكۋندتا جانىپ كەتكەن. قازىر بۇل ۆەرسيا دا تەكسەرىلىپ جاتىر. ەسكە سالا كەتەيىك, ناۋرىزدىڭ 8-ءى كۇنى مالايزيانىڭ استاناسى كۋالا-لۋمپۋردان ۇشىپ قىتايدىڭ ورتالىعى – بەيجىڭدى بەتكە العان Boeing 777-200 ۇشاعى اۋەگە كوتەرىلگەننەن كەيىن 19-مينۋتتا كەنەت جوعالىپ كەتكەن. ۇشاقتىڭ بورتىندا 227 جولاۋشىمەن بىرگە 12 ەكيپاج مۇشەسى بولعان. جولاۋشىلار اراسىندا 14 ەلدىڭ ازاماتى بار. ىزدەۋ وپەراتسياسى ءالى جالعاسۋدا. وعان يندونەزيا, اۆستراليا, قىتاي, تايلاند, سينگاپۋر, ۆەتنام, اقش, ءۇندىستان جانە جاپونيا قۇتقارۋشىلارى اتسالىسۋدا. قازىر بۇعان 35 ۇشاق, 42 كەمە قوسىلعان. دەگەنمەن, قازىر جوعالعان ۇشاقتىڭ تاعدىرى تۋرالى بولجامدار كوپ. مىسالى, وتكەن اپتادا قىتاي سپۋتنيگىنىڭ ۇشاقتىڭ قۇلاعان جەرىن انىقتاعانى جەتكىزىلدى. قىتاي ماماندارىنىڭ ايتۋلارىنشا, تۇسىرىلگەن سۋرەتتەردەن تەڭىزدە قالقىپ جۇرگەن ءۇش نىساننىڭ سۇلباسى انىق كورىنەدى. بۇلاردىڭ لاينەردىڭ بولشەكتەرى بولۋى ابدەن مۇمكىن. تاعى ءبىر بولجام بويىنشا, ۇشاق رادارعا كورىنبەي كەتكەننەن كەيىن 4 ساعات ۋاقىت اسپاندا قالىقتاپ جۇرگەن. مۇنى حابارلاعان The Wall Street Journal باسىلىمى وقيعانى زەرتتەۋگە قاتىسقان امەريكالىق ساراپشىلارعا سىلتەمە جاسايدى. ساراپشىلار اۆيالاينەردىڭ قوزعالتقىش جۇيەسى اۆتوماتتى تۇردە جەرگە جىبەرىپ وتىرعان اقپاراتتارعا سۇيەنىپ, وسىنداي توقتامعا كەلگەن. اتالمىش اقپاراتتاردىڭ اراسىندا ۇشاق قوزعالتقىشىنىڭ جۇمىسى, ورنالاسقان جەرى مەن جىلدامدىعى تۋرالى دا مالىمەتتەر كەزدەسەدى. مۇنداي بىرەگەي قوندىرعى ۇشاقتىڭ قوزعالتقىشىنا Malaysia Airlines كومپانياسى مەن Rolls-Royce كونتسەرنى اراسىندا بەكىتىلگەن كەلىسىم-شارت اياسىندا ورناتىلعان ەكەن. قازىرگى ۋاقىتتا ماماندار Boeing 777-200 لاينەرىنىڭ ۇشۋ تراەكتورياسىن انىقتاۋ ءۇشىن داتچيكتىڭ كورسەتكىشتەرىن ءجىتى زەرتتەۋگە كىرىستى. ەگەر داتچيكتىڭ مالىمەتتەرى دۇرىس بولسا, راداردان جوعالىپ كەتكەن ۇشاق تاعى دا 4 مىڭ شاقىرىم قاشىقتىقتى ۇشىپ ءوتىپ, پاكستانعا جەتۋى مۇمكىن, ءتىپتى ءۇندى مۇحيتى نە ارابيا تەڭىزىنە شىعىپ كەتۋى ىقتيمال. ەگەر بۇل بولجام راستالسا, اۋە كەمەسىن ىزدەستىرۋ جۇمىستارى ودان بەتەر كۇردەلەنەتىن ءتۇرى بار, دەيدى ساراپشىلار. ماماندار لاينەردى لاڭكەستەر ايداپ اكەتتى دەگەن بولجامدى جوققا شىعارمايدى. الايدا, ونىڭ دىتتەگەن جەرىنە جەتكەنى نەمەسە اپاتقا ۇشىراعانى تۋرالى ناقتى مالىمەت جوق. ءبىر قىزىعى, ساراپشىلار اپات ۇشقىشتىڭ قاتەلىگىنەن بولۋى مۇمكىن دەگەن بولجامدى مۇلدە قاراستىرماعان. ساكەن مايلىباي. دەرەككوز: يتار-تاسس. فوتو: يتار-تاسس.