بيىل جەتىساي اۋدانى بويىنشا 78 500 گەكتار اۋماققا ەگىس ەگۋ جوسپارلانىپ وتىر. سونىڭ ىشىندە مىڭ گەكتارعا ەرتە پىسەتىن قىرىققابات ەگىلمەك. جەردى جالعا الىپ وتىرعان شارۋانىڭ ءبىرى ساپار ۇسەنوۆ: «كۇن-ءتۇن دەمەي قاراشا ايىنان باستاپ جىلىجايعا ەرتە پىسەتىن «پانديون» جانە «زاريسما» كوشەتتەرىن ءوندىرۋدى باستاعانبىز. دايىن بولعان كوشەتتەردى 5 گەكتار اۋماققا وتىرعىزدىق. بىلتىر وسى جەردەن 300 توننا ءونىم الدىق. ول ءونىمدى كورشىلەس ەلدەرگە جىبەرەمىز. بىلتىر ءونىم ءوزىن ءوزى اقتادى», دەيدى.
وتكەن جىلى جەتىساي اۋدانىندا 1 097 گەكتارعا قىرىققابات ەگىلىپ, 38 مىڭ توننا ءونىم جينالعان. ەرتە پىسەتىن ونىمدەر وڭىردە ازىق-ت ۇلىك باعاسىن تۇراقتاندىرۋعا دا سەپتىگىن تيگىزۋدە. بۇل ورايدا مەملەكەت باسشىسى قاسىم-جومارت توقاەۆتىڭ تاپسىرماسىمەن وبلىستا الەۋمەتتىك ماڭىزى بار تاۋارلار باعاسى تۇراقتى باقىلاۋدا ەكەنىن ايتا كەتەلىك. تۇركىستان قالاسىندا 11 قاڭتارداعى جاعداي بويىنشا الەۋمەتتىك ماڭىزى بار ازىق-ت ۇلىك تاۋارلارىنىڭ باعا يندەكسى 0,4%-عا تومەندەدى. وبلىس اكىمدىگىنىڭ مالىمەتىنشە, جۇمىرتقا مەن ءسابىز باعاسى ارزانداعان. قالعان 15 تاۋار (نان, قارتوپ, كۇرىش, كۇنباعىس مايى, قاراقۇمىق, ايران, سۇزبە, قىرىققابات, سيىر ەتى, تاۋىق ەتى, قۇمشەكەر, تۇز, سارى ماي, پياز, ماكارون) بويىنشا جاعداي تۇراقتى. وبلىستىڭ اۋدان, قالا اكىمدىكتەرىنىڭ قولداۋىمەن مەرەكەلىك جانە دەمالىس كۇندەرى كوشپەلى ساۋدا جۇرگىزىلىپ, حالىققا 26,5 ملن تەڭگەگە 57 توننا تاۋار ساتىلعان. الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن رەتتەۋ تاپسىرماسىنا سايكەس «اينالىم سحەماسى» شەڭبەرىندە تاۋار وندىرۋشىلەرگە جالپى 640 ملن تەڭگە بەرىلدى. سونىمەن قوسا تۇراقتاندىرۋ قورى ەسەبىندە 255,7 ملن تەڭگە ورنالاستىرىلعان. ناتيجەسىندە, Magnum Cash&Carry, «الي ساۋدا», «عاجايىپ-پ», «سايرام ءسۇت» جشس مەن ساۋدا ورىندارى تاۋارلاردى نارىقتاعى باعادان 10-15%-عا تومەن باعامەن ساتۋدا. بۇدان باسقا تۇركىستان قالاسىندا فيليالى بار Magnum cash&Carry ساۋدا جەلىسىمەن الەۋمەتتىك ماڭىزى بار ازىق-ت ۇلىك تاۋارلارىنا ساۋدا ۇستەمەسىن 15%-دان 10%-عا دەيىن تومەندەتۋ تۋرالى مونوپولياعا قارسى كومپلاەنس اكتىسى قابىلداندى.
سونداي-اق الەۋمەتتىك ماڭىزى بار ازىق-ت ۇلىك تاۋارلارى باعاسىنىڭ نەگىزسىز ءوسۋىنىڭ الدىن الۋ ماقساتىندا ءىرى ساۋدا ورىندارى مەن دۇكەندەر جانە امبەباپ بازارلارمەن بيىلعى 9 قاڭتارداعى جاعداي بويىنشا وبلىس كولەمىندە 1 098 مەموراندۋم تۇزىلگەن. اۋدان, قالالارداعى موبيلدىك توپتار الەۋمەتتىك ماڭىزدى تاۋارلار بويىنشا ناقتى جۇمىستار جۇرگىزۋدە. تۇركىستان قالاسى بويىنشا الەۋمەتتىك ماڭىزى بار ازىق-ت ۇلىك تاۋارلارىنىڭ 19 تۇرىنەن كەمىندە 1-1,5 ايعا جەتەتىن قور جاساقتالعان. باسقا قالا, اۋدانداردا دا وسى كولەمدە قور بار.
تۇركىستان وبلىسى
