قر ۇقك ءباسپاسوز قىزمەتىنىڭ حابارلاۋىنشا, شەكارا قىزمەتى ۇقك اۋماقتىق بولىمشەلەرىمەن ءوزارا ءىس-قيمىل جاساپ, ءىىم «ارلان» ارنايى ماقساتتاعى بولىمشەسىن تارتا وتىرىپ, الماتى وبلىسىندا جەدەل-ىزدەستىرۋ ءىس-شارالارىن جۇرگىزۋدە.
ۆەدومستۆودا ناقتىلاعانداي, ناتيجەسىندە تالدىقورعان پوليتسيا دەپارتامەنتىنە شابۋىل جاسادى دەگەن كۇدىكپەن سەگىز ادام جانە الماتىداعى تارتىپسىزدىكتەر مەن توناۋلارعا قاتىسى بار سەگىز ادام ۇستالدى.
ۇستالعاندار پوليتسيا بولىمشەلەرىنە جەتكىزىلدى.
سونداي-اق ۆەدومستۆو 11 قاڭتاردا تۇركىستان وبلىسىنداعى «شىمكەنت» اۆياتسيالىق وتكىزۋ پۋنكتىندە تۇركىستان – ستامبۋل باعىتىنداعى كس-7425 رەيسىن راسىمدەۋ كەزىندە قىزىلورداداعى ميتينگتەرگە قاتىسقان جانە الەۋمەتتىك جەلىلەردىڭ مەسسەندجەرلەرى ارقىلى ازاماتتاردى تارتىپسىزدىكتەرگە قاتىسۋعا شاقىرۋ تۋرالى اقپاراتتى تاراتقان قازاقستان ازاماتى انىقتالعانىن حابارلادى.
ۇستالعان ازامات شىمكەنت قالاسىنىڭ جەلىلىك پوليتسيا بولىمىنە جەتكىزىلدى.
10 قاڭتاردا قوستاناي وبلىسىنىڭ «وباعان» (اۆتوموبيل) وتكىزۋ پۋنكتىندە ءسۇزۋ ءىس-شارالارى شەڭبەرىندە 1986 جىلى تۋعان پ. ەسىمدى تاراز تۇرعىنى ۇستالدى. تەكسەرۋ ءىس-شارالارى بارىسىندا ۇستالعان ادامنىڭ ۇيالى تەلەفونىنان 5 قاڭتاردا قۇرىلعان كۇش قۇرىلىمدارىنىڭ ارنايى كيىم-كەشەگىنەن (قورعانىس دۋلىعاسى, ءتۇسىرۋ كەۋدەشەسى, مەتالل قالقان جانە رەزەڭكە تاياق) ونىڭ فوتوسۋرەتى تابىلدى.
كۇدىكتى تەرگەۋ ءىس-شارالارىن جۇرگىزۋ ماقساتىندا ۇزىنكول اپب-نە جەتكىزىلدى.
