ىستىق شاي, ساقشىنىڭ كوڭىلى جاي
بۇگىندە وبلىستا قۇقىقتىق ءتارتىپتى قامتاماسىز ەتۋ ماقساتىندا بارلىق كۇشتىك قۇرىلىمدار, اتاپ ايتقاندا, پوليتسيا قىزمەتكەرلەرى, ۇلتتىق ۇلان مەن قورعانىس مينيسترلىگىنىڭ اسكەري قىزمەتشىلەرى كۇشەيتىلگەن رەجىمدە قىزمەت اتقارۋعا كوشىرىلدى. ءوڭىردىڭ ەلدى مەكەندەرىندە شىعۋ جانە كىرۋ جولدارىندا بلوك-بەكەتتەر قويىلعان.
قازىرگى تاڭدا توتەنشە جاعدايدىڭ ءتارتىبى كۇشىنە ەندى. سوڭعى مالىمەتتەرگە ساي, پوليتسيا قىزمەتكەرلەرى 447 ءتارتىپ بۇزۋشىلىقتى انىقتاپتى. اكىمشىلىك قاماۋعا 31 ءتارتىپ بۇزۋشى تارتىلعان. تىيىم سالىنعان 17 زات, ونىڭ ىشىندە 9 تەگىس ۇڭعىلى مىلتىق تاركىلەنىپ, ەسىرتكى زاتتارىن ساقتاۋدىڭ 6 فاكتىسى انىقتالدى دەگەن رەسمي اقپارات بار.
جالپى, ەلىمىزدىڭ وڭتۇستىگىندەگى قايعىلى وقيعالار مەن توتەنشە جاعداي رەجىمى قاراعاندى وبلىسىنىڭ تۇرعىندارىن بىرىكتىردى دەپ سەنىممەن ايتۋعا بولادى. جاسىراتىنى جوق, تۇرعىنداردىڭ كوبى ەلدى مەكەندەردە كۇشەيتىلگەن پاترۋلدەۋگە, سونداي-اق بلوك-بەكەتتەردەگى تەكسەرۋلەرگە تۇسىنىستىكپەن قارايدى. ءتىپتى بەلسەندى ازاماتتاردىڭ تىنىشتىق كۇزەتىندە تۇرعان ءتارتىپ ساقشىلارىنا ىستىق تاماق پەن شاي اكەلگەن وقيعالارى دا بار. مىسالى, وسىنداي ىزگى قادامعا العاشقىلاردىڭ ءبىرى بولىپ ارىپتەسىمىز اينۇر بالاكەشوۆا باردى. جۋرناليست بلوك-بەكەتتەردە كەزەكشىلىك ەتەتىن پوليتسيا قىزمەتكەرلەرى مەن ۇلتتىق گۆاردياشىلارعا ىستىق تاماق پەن شاي اكەلدى.
– ىستىق تاماق پەن شاي – بۇل ءبىزدىڭ تىنىشتىعىمىزدى ساقتايتىن جانە ءبىزدى قورعايتىن ادامدار ءۇشىن جاساي الاتىن نارسەلەردىڭ از عانا بولىگى. كۇش – بىرلىكتە! باتىرلارىمىزعا كومەكتەسەيىك, – دەيدى اينۇر بالاكەشوۆا.
تاپشىلىق قۇرىقتالعان, باعا ىرىقتالعان
قازىرگى تاڭداعى قالىپتاسقان كۇردەلى جاعدايدا وبلىستا ازىق-ت ۇلىك تاپشىلىعىنىڭ جوقتىعى, جانار-جاعارماي قورىنىڭ جەتكىلىكتى ەكەندىگى تۋرالى رەسمي حابار تۇرعىنداردىڭ ەرتەڭگى كۇنگە دەگەن سەنىمىن ەسەلەي ءتۇستى.
وسى ورايدا وبلىس اكىمى جەڭىس قاسىمبەك تاياۋدا وتكەن اپپارات كەڭەسىندە وڭىردە باعانىڭ نەگىزسىز كوتەرىلۋىنە جول بەرمەۋدى جانە كۇندەلىكتى مونيتورينگ جۇرگىزۋدى تاپسىردى.
– الەۋمەتتىك ماڭىزى بار ازىق-ت ۇلىك تاۋارلارىنىڭ بارلىق تۇرلەرى بويىنشا باعانىڭ نەگىزسىز وسۋىنە جول بەرمەۋ بويىنشا جۇمىستى جالعاستىرۋ قاجەت, – دەگەن ول قالالار مەن اۋدانداردىڭ اكىمدەرىنە, وبلىستىق باسقارمالاردىڭ باسشىلارىنا ناقتى تاپسىرما بەردى.
ەرەكشە ايتا كەتەتىن جايت, وبلىس تۇرعىندارى ازىق-ت ۇلىك, جانار-جاعارماي جانە اۆتوكولىككە ارنالعان گاز باعاسىن كوتەرۋ فاكتىلەرى تۋرالى Senim109 قىزمەتىنە حابارلاۋ مۇمكىندىگىنە يە بولدى. وپەراتورلار 109 قىسقا ءنومىرى بويىنشا دۇكەندەر مەن جانارماي قۇيۋ بەكەتتەرىنىڭ اتاۋلارى مەن مەكەنجايلارىن كورسەتە وتىرىپ, وتىنىشتەردى قابىلدايدى. بۇل ورايدا تۇرعىندار قالالىق جانە ۇيالى تەلەفوندار ارقىلى قوڭىراۋ شالا الادى. بارلىق شاعىمدار قۇزىرەتتى قىزمەتتەرگە شارا قولدانۋ ءۇشىن جىبەرىلەدى. وڭىردەگى احۋال, توتەنشە جاعداي رەجىمى بويىنشا كەز كەلگەن باسقا دا ماسەلەلەر بويىنشا سۇراقتار قابىلداناتىنىن دا ايتا كەتكەن ءلازىم.
اقشانى جوقتاتپادى, ءوندىرىستى توقتاتپادى
قازىرگى ۋاقىتتا قاراعاندى وبلىسىندا قولما-قول اقشانى بانكوماتتار مەن بانك بولىمشەلەرىنەن الۋعا بولادى. سونداي-اق Kaspi Bank پەن Halyk Bank ءموبيلدى قوسىمشالارى ارقىلى قولما-قول اقشاسىز ەسەپ ايىرىسۋلار جۇرگىزىلەدى. بۇل تۋراسىندا ۇلتتىق بانكتىڭ قاراعاندى فيليالىنىڭ ديرەكتورى عازيز شەگەنوۆ ءمالىم ەتتى.
– وسى دەمالىس كۇندەرى ەكىنشى دەڭگەيلى بانكتەر وتاندىق ۆاليۋتامەن تولىقتىرىلدى. بانكوماتتارعا قولما-قول اقشا جۇكتەلدى. بانكتەر بۇرىنعى جۇمىس ىرعاعىنا ورالادى. Kaspi Bank پەن Halyk Bank موبيلدىك قوسىمشالارى جۇمىس ىستەپ تۇر, – دەپ اتاپ ءوتتى فيليال باسشىسى.
سونداي-اق يندۋستريالدى وڭىردەگى ونەركاسىپتىڭ تۇراقتى جۇمىس ىستەپ تۇرعانىن, كاسىپورىندار بويىنشا ەشقانداي پروبلەمانىڭ جوقتىعىن ايتا كەتكەن ءجون. وبلىستىق ونەركاسىپ باسقارماسىنىڭ باسشىسى مۇرات قىدىرعانبەكوۆ بۇگىندە ءوڭىردىڭ بارلىق ونەركاسىپتىك كاسىپورىندارى قالىپتى رەجىمدە جۇمىس ىستەپ تۇرعانىن مالىمدەدى.
– ولاردىڭ قىزمەتىنە كۇندەلىكتى مونيتورينگ جۇرگىزىلەدى. جالپى, وبلىس بويىنشا شيكىزاتتى, دايىن ءونىمدى, سونداي-اق جۇمىسشى پەرسونالدى تاسىمالداۋ جانە جەتكىزۋ بويىنشا پروبلەمالار بايقالمايدى. ونەركاسىپ ءونىمى كولەمىنىڭ جوسپارلانعان كورسەتكىشتەرى قامتاماسىز ەتىلەدى, – دەدى ول.
جالپى العاندا, جۇيە قۇرۋشى ءىرى كومپانيالار تۇراقتى جۇمىس ىستەۋدە جانە ايلىق كورسەتكىشتەردى ورىنداۋدى جوسپارلاپ وتىر. سونىمەن قاتار تۇرعىن ءۇي-كوممۋنالدىق شارۋاشىلىق جانە ەنەرگيا كوزدەرىنىڭ جۇمىسىندا دا پروبلەمالار جوق دەگەن رەسمي مالىمەت بار. مىسالى, وبلىستىق ەنەرگەتيكا جانە تكش باسقارماسىنىڭ باسشىسى ۇلانتاي ۇسەنوۆ ءوڭىر بويىنشا جىلىتۋ ماۋسىمىنىڭ تۇراقتى ءوتىپ جاتقانىن اتاپ ءوتتى.
– تىرشىلىكتى قامتاماسىز ەتۋدىڭ بارلىق نىساندارى شتاتتىق رەجىمدە جۇمىس ىستەپ تۇر. ءوڭىردىڭ 8 ستانساسىندا 37 قازاندىق, ونىڭ 7-ەۋى رەزەرۆتە جۇمىس ىستەيدى, – دەيدى باسقارما باسشىسى.
P.S. ال كەشە وبلىس اكىمى جەڭىس قاسىمبەك جەرگىلىكتى ىشكى ىستەر ورگاندارىنىڭ قىزمەتكەرلەرىمەن جانە اسكەري قىزمەتشىلەرمەن كەزدەسىپ, ولارعا مەملەكەت باسشىسى اتىنان كۇردەلى كەزەڭدە ۇيلەسىمدى جۇمىس اتقارىپ جاتقاندارى ءۇشىن العىس ايتتى.
– بۇگىندە سىزدەر قوعامدىق ءتارتىپتى ساقتاۋ ماقساتىندا وتە جاۋاپتى مىندەت اتقارىپ جۇرسىزدەر. سىزدەردى ماقتان ەتەمىز جانە ءبىزدىڭ ازاماتتارىمىز سىزدەرگە سەنەدى! – دەدى ءوڭىر باسشىسى.
قاراعاندى وبلىسى
