ءبىزدىڭ ەلدە دە سوعان ۇقساس حولدينگ قۇرىلسا, مەملەكەتتىڭ ءومىر ءسۇرۋ ساپاسى, ەكونوميكالىق دەڭگەيى جاقسارادى دەپ سەندىك. وسىلايشا, سينگاپۋردىڭ تاجىريبەسىنە نەگىزدەلگەن «سامۇرىق-قازىنا» وسىدان ون بەس جىلداي بۇرىن قۇرىلعان ەدى. ال قازىر بۇل حولدينگ ەلىمىزدەگى ەڭ باي مەملەكەتتىك ۇيىمعا اينالدى. ونىڭ قۇرامىندا «قازمۇنايگاز», «قازترانسويل», «قازاقستان تەمىر جولى», «قازاتومپروم», «ەير استانا», «سامۇرىق-ەنەرگو», «KEGOK» سىندى ءىرى حولدينگتەر توپتاسقان. بۇگىندە بۇل قوردىڭ اكتيۆى ەلىمىزدىڭ ىشكى جالپى ءونىمىنىڭ 60 پايىزىن قۇرايدى. دەمەك, ول ءتيىمدى جۇمىس اتقارسا, مەملەكەتتىڭ ەكونوميكالىق ءوسىمى دە قارقىندى دامىعان بولار ەدى. الايدا ەل سەنگەن «سامۇرىق-قازىنا» وزدەرىنىڭ قىزمەتىن ويداعىداي اتقارا العان جوق. قوردىڭ جۇمىسىنىڭ تيىمسىزدىگى ەسەپ كوميتەتىنىڭ ەسەپتەرىندە تالاي ايتىلدى. بىراق قۇلاق اسقان ەشكىم جوق.
مەنىڭ ويىمشا, قوردىڭ نەگىزگى كوزدەگەنى – ەلدەگى بەلگىلى ءبىر توپتاردىڭ پايداسى ءۇشىن قوماقتى قارجى كوزدەرىن ۋىسىندا ۇستاۋ. قوردىڭ توپ-مەنەدجەرلەرى باس اينالدىرارلىق جالاقى الاتىنى, ونىڭ سىرتىندا سىياقىلارى مەن بونۋستارى دا كوپ ەكەنى تالاي سىنعا الىندى. مىسالى, «سامۇرىق-قازىنانىڭ» قۇرامىندا بولعان «سامۇرىق-قازىنا» كورپوراتيۆتىك ۋنيۆەرسيتەتى بار. قازىر ول – جەكەمەنشىك قۇرىلىمعا اينالدى. وسى ۋنيۆەرسيتەت كەلىسىمشارت نەگىزىندە قورعا قىزمەتكەرلەردى جۇمىسقا الۋ بويىنشا اۋتسورسينگتىك قىزمەت كورسەتەدى. ەڭبەك شارتى بويىنشا جۇمىسكەرلەر قىزمەتكە الىنعانىمەن ولار شتاتتان تىس جۇمىس ىستەيدى. ياعني قاعاز جۇزىندە تاپسىرىس بەرۋشىنىڭ شتاتتاعى قىزمەتكەرلەر سانى وزگەرىسسىز قالادى. بۇل قوردىڭ باسىندا وتىرعاندارعا وتە ءتيىمدى. كەلەسىدە شتات سانىن ۇلعايتۋدى سۇرايدى دا سولاردىڭ ەسەبىنەن وزدەرى ەسەلەنگەن سىياقىسى مەن بونۋستارىن الىپ, قارجىنى تالان-تاراجعا سالىپ, الاڭسىز جۇرە بەرەدى. سوندىقتان الدىمەن مەملەكەتتىك كومپانيانىڭ كورپوراتيۆتىك ۋنيۆەرسيتەتىنە, «سامۇرىق-قازىنانىڭ» ەنشىلەس كومپانيالارىنا تەكسەرىس جۇرگىزۋ كەرەك. قوردى ينۆەستيتسيالىق جوباعا اينالدىرۋ دا تىعىرىقتان شىعار جول ەمەس. كەيىن ونىڭ قۇرامىنداعى كومپانيالار جەكەمەنشىكتىڭ قولىنا ءوتىپ, مەملەكەتتىڭ قارجىسى تىپتەن تالان-تاراجعا ءتۇسۋى مۇمكىن.
سونداي-اق «سامۇرىق-قازىنا» ۇلتتىق ءال-اۋقات قورى» اق ساتىپ الۋلارى جانە بارلىق ۇلتتىق كومپانييانىڭ ساتىپ الۋلارى «كۆازيمەملەكەتتىك سەكتوردىڭ جەكەلەگەن سۋبەكتىلەرىنىڭ ساتىپ الۋ تۋرالى» زاڭمەن رەتتەلۋى كەرەك. ونىڭ بارلىق پروتسەسى ءجىتى قاداعالانىپ, قايتا قارالعانى ءجون. تۇبەگەيلى وزگەرىس كەرەك. ءتىپتى «سامۇرىق-قازىنانى» جاۋىپ تاستاسا دا بولادى. مۇنداي قۇرىلىمنىڭ بىزگە كەرەگى جوق. قانشاما قارجى جەلگە ۇشتى؟ ميللياردتاعان قارجىنىڭ ەسەبىن ەشكىم دە بىلمەيدى. اقپارات تا اشىق ايتىلعان ەمەس. سولاردىڭ ءبارىن تىزبەكتەپ, ەلگە اشىق مالىمەتتەردىڭ بەرىلگەنى ابزال.
عالىم بايتۇق,
تاۋەلسىز ساراپشى
