پرەزيدەنت • 12 قاڭتار، 2022

پرەزيدەنت:تابىستى ءارى وركەندەگەن قازاقستاندى بىرگە قۇرامىز!

مەملەكەتتىڭ باستى مىندەتى - وتانداستارىمىزدىڭ ءال-اۋقاتى مەن ءومىر ءسۇرۋ ساپاسىن قامتاماسىز ەتۋ. ادال باسەكەلەستىكتى دامىتۋ، شاعىن جانە ورتا بيزنەستى قولداۋ، مەملەكەتتىك قولداۋ شارالارىنىڭ اشىقتىعى – جاڭا ەكونوميكالىق باعىتتىڭ باستى قۇرامداس بولىگى، دەپ جازدى قازاقستان پرەزيدەنتى قاسىم-جومارت توقاەۆ Twitter پاراقشاسىنا، دەپ حابارلايدى Egemen.kz.

بوتاكوز باقبەرگەن

«ۇكىمەتتىڭ باسىمدىعى ۇلتتىق ۆاليۋتا باعامىنىڭ تۇراقتىلىعىن قامتاماسىز ەتۋ بولۋى ءتيىس. مىقتى تەڭگە مەن ينفلياتسيانى تومەندەتپەي تۇراقتى ەكونوميكالىق ءوسۋ، ازاماتتاردىڭ ءال-اۋقاتىن ارتتىرۋ جانە ينۆەستورلار تاراپىنان سەنىم ارتۋ مۇمكىن ەمەس. وڭىرلىك سايكەسسىزدىكتەردى ەڭسەرۋ ەرەكشە نازار اۋدارۋدى تالاپ ەتەدى. جۇمىسپەن قامتۋ ماسەلەسىن شەشىپ، ەلىمىزدىڭ بارلىق وبلىستارىندا الەۋمەتتىك جانە مادەني دامۋ ءۇشىن جاعداي جاساۋ كەرەك. وڭىرلەردە جەتەكشى شەتەلدىك جوعارى وقۋ ورىندارىنىڭ فيليالدارى اشىلادى»، دەپ جازدى قاسىم-جومارت توقاەۆ.

سونداي-اق پرەزيدەنت وڭىرلەر اراسىنداعى دامۋ الشاقتىعىن ەڭسەرۋگە باسا ءمان بەرۋ كەرەكتىگى تۋرالى جازدى.

«جۇمىسپەن قامتۋ ماسەلەسىن شەشىپ، ەلىمىزدىڭ بارلىق وبلىسىنىڭ الەۋمەتتىك جانە مادەني دامۋىنا جاعداي جاساۋ كەرەك. ايماقتاردا شەتەلدىك جەتەكشى جوعارى وقۋ ورىندارىنىڭ فيليالدارى اشىلادى.

جالپىحالىقتىق «قازاقستان حالقىنا» قورى ازاماتتاردىڭ ناقتى پروبلەمالارىن شەشۋگە قىزمەت ەتەدى. قور سيرەك كەزدەسەتىن اۋرۋعا شالدىققان بالالاردى ەمدەۋگە كومەكتەسىپ، الەۋمەتتىك جانە مادەني نىسانداردىڭ قۇرىلىسىن قارجىلاندىرادى. الماتىنى قالپىنا كەلتىرۋگە قارجى بولىنەدى.

مەملەكەتىمىزدىڭ تۇتاستىعىن، بەيبىتشىلىك پەن كەلىسىمدى بىرلەسىپ ساقتاي الدىق. ازاماتتارىمىز ەكسترەميستەرمەن كۇرەستە پاتريوتيزم مەن بىرلىكتىڭ ۇلگىسىن كورسەتتى. ەلىمىز دامۋدىڭ جاڭا كەزەڭىنە قادام باستى. بۇل – شىنايى جاڭارۋدىڭ كەزەڭى. تابىستى ءارى وركەندەگەن قازاقستاندى بىرگە قۇرامىز!» دەپ جازدى قاسىم-جومارت توقاەۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز