ۇكىمەت وتىرىسىندا دەنساۋلىق ساقتاۋ ءمينيسترى اجار عينيات ەلدەگى سانيتارلىق-ەپيدەميولوگيالىق احۋالدىڭ ناشارلاعانىن حابارلادى.
«قىزىل ايماققا» قايتا ەنگەن نۇر-سۇلتان, الماتى, شىمكەنت قالالارىندا جانە اتىراۋ وبلىسىندا كوروناۆيرۋس ينفەكتسياسىمەن سىرقاتتانۋدىڭ كۇرت وسكەنى بايقالدى. ال اقتوبە, باتىس قازاقستان, قاراعاندى, قىزىلوردا, پاۆلودار جانە ماڭعىستاۋ وبلىستارى «سارى ايماقتا» ورنالاسقان.
بۇگىنگى تاڭدا 9,4 ملن استام ادام ۆاكتسينانىڭ ءبىرىنشى كومپونەنتىن, 8,7 ملن-نان استام ادام ەكىنشى كومپونەنتىن الدى. 670 مىڭعا جۋىق ادام رەۆاكتسيناتسيادان ءوتتى.
ء«بىزدىڭ نەگىزگى مىندەتىمىز – ەپيدەميولوگيالىق احۋالدى باقىلاۋدا ۇستاۋ. حالىقتىڭ سانيتاريالىق-ەپيدەميولوگيالىق تالاپتاردى ساقتاۋى بويىنشا شارالاردى كۇشەيتۋ قاجەت», دەدى ءاليحان سمايىلوۆ.
ۇكىمەت باسشىسى دەنساۋلىق ساقتاۋ مينيسترلىگىنە, اكىمدىكتەرگە پتر-تەستىلەۋ سانىن ۇلعايتۋدى, جەدەل مونيتورينگ جۇرگىزىپ, مەديتسينا قىزمەتكەرلەرى مەن اۋرۋحانالاردا رەزەرۆتىك ورىنداردىڭ دايارلىعىن قامتاماسىز ەتۋدى, سونداي-اق ءدارى-دارمەك پەن مەديتسينالىق بۇيىمداردىڭ جەتكىلىكتى بولۋىن قاداعالاۋدى تاپسىردى.
پرەمەر-مينيستر ۇيدە مەديتسينالىق كومەك كورسەتۋ ءۇشىن ءموبيلدى بريگادالاردىڭ جۇمىسىن جانداندىرىپ, ولاردى تەگىن ءدارى-دارمەكپەن قامتاماسىز ەتۋ قاجەت ەكەنىن, سونىمەن قاتار ءدارىحانالاردا ءدارى-دارمەكتىڭ تاپشىلىعىنا جول بەرمەۋ شارالارىن قابىلداۋ قاجەتتىگىنە توقتالدى.
ءاليحان سمايىلوۆ دەنساۋلىق ساقتاۋ مينيسترلىگى مەن اكىمدىكتەرگە حالىقتى رەۆاكتسيناتسيالاۋ قارقىنىن ەداۋىر ارتتىرۋدى تاپسىردى. وڭىرلەردىڭ اكىمدەرى بۇل ماسەلەنى جەكە باقىلاۋىنا الۋى ءتيىس.
سونداي-اق ۇكىمەت باسشىسى ەلىمىزدىڭ بارلىق مەديتسينا قىزمەتكەرلەرىنە ريزاشىلىعىن ءبىلدىردى.
«ەل ءۇشىن سىن ساعاتتا ولار زارداپ شەككەندەر مەن جارالانعاندارعا تاۋلىك بويى كومەك كورسەتىپ جاتىر. دارىگەرلەر اۋرۋحانالار مەن جەدەل جاردەم كولىكتەرىن باسىپ العان لاڭكەستەردىڭ اگرەسسياسىن باستان كەشىردى. قۇرمەتتى مەديتسينا قىزمەتكەرلەرى, سىزدەرگە ەڭبەكتەرىڭىز بەن باتىلدىق تانىتقاندارىڭىز ءۇشىن, كەز كەلگەن جاعدايدا حالىققا كومەك كورسەتۋگە ازىرلىكتەرىڭىز ءۇشىن العىس ايتامىز!», دەدى ءاليحان سمايىلوۆ ءوز سوزىندە.
