بۇگىندە وبلىستاعى جاعداي پوليتسيا قىزمەتكەرلەرىنىڭ تولىق باقىلاۋىندا. قوعامدىق ءتارتىپتى قامتاماسىز ەتۋ ماقساتىندا توتەنشە جاعداي رەجىمى اياقتالعانشا وبلىس اۋماعىندا 10 بلوك-بەكەت ورنالاستىرىلدى. قازىر اقتوبە قالاسىندا 3 بلوك-بەكەت, ال اۋدانداردا 7 بلوك-بەكەت بار. وسى ورىنداردا پوليتسيا قىزمەتكەرلەرى مەن قورعانىس مينيسترلىگىنىڭ اسكەريلەرى قىزمەت اتقارۋدا, ولار وبلىس جانە اۋدان ورتالىقتارىنان كىرىپ-شىعىپ جاتقان اۆتوكولىكتەردى تەكسەرەدى.
اقتوبە وبلىسىندا كومەندانتتىق ساعات مەرزىمى جەرگىلىكتى ۋاقىتپەن تۇنگى ساعات 23.00-دەن تاڭعى 07.00-گە دەيىن ۇزارتىلدى. ەلدەگى شەكتەۋلەرگە قاراماستان تۇنگى مەزگىلدەگى جۇرىستەرىن تىيماعان تۇرعىندار دا كەزدەسىپ قالادى. تەك 10 قاڭتار ءتۇنى عانا كومەندانتتىق ساعاتتى بۇزعانى ءۇشىن پوليتسيا بولىمدەرىنە 115 ازامات جەتكىزىلسە, 83 اكىمشىلىك ادام جاۋاپكەرشىلىككە تارتىلدى. كومەندانتتىق ساعات رەجىمىن ورەسكەل تۇردە بۇزىپ, قۇجاتسىز جۇرگەن, جۇرىستەرى كۇدىكتى 30 اقتوبەلىك قاماۋعا الىنسا, 9 ادامعا ايىپپۇل سالىنىپ, 20 تۇرعىنعا ەسكەرتۋ بەرىلدى.
10 قاڭتاردا اقتوبە قالاسىنىڭ ىرگەسىندەگى ءبىر بلوك-بەكەتتە «ۆاز-2140» اۆتوكولىگىن تەكسەرۋ كەزىندە جۇرگىزۋشىنىڭ جانىندا وتىرعان جولاۋشىدان 12 كاليبرلى تەگىس ۇڭعىلى ەكى مىلتىق تابىلدى. قازىر 40 جاستاعى كولىك جۇرگىزۋشىسى مەن ونىڭ قاسىنداعى جولاۋشىنىڭ ۇستىنەن اكىمشىلىك ءىس قوزعالدى. مىلتىقتىڭ قايدان شىققانى, قۇجاتتارى تەكسەرىلىپ جاتىر.
اقتوبە وبلىسى
