ولگەن ادامدى كۋاعا تارتقان سوت ءوتتى

الماتىدا وسىدان ەكى جىل بۇرىن ءۇيىن قورعاي­­مىن دەپ ءجۇرىپ, ءوزىن ورتەپ ولتىرگەن سۆەتلانا تۇرعانباەۆا ەسىمدى مارقۇم كىسىگە قاتىستى سوت پروتسەسى تاعى جالعاستى. سەبەبى, اشىنعان كوپ بالالى انانىڭ بۇل ومىردەگى اقىرعى قادامى دا باس­پانا داۋىنا سوڭعى نۇكتەنى قويا الماپتى. 2012 جىلدىڭ ساۋىرىندە س.تۇرعانباەۆا تابان اقى, ماڭداي تەرىمەن ساتىپ العان باسپاناسىن قور­عاۋ ءۇشىن سوڭعى سۇحباتىن بەرگەن. ال اراعا اي سالىپ ۇيىنە كەلگەن سوت ورىنداۋشىلارى­نان باس­پاناسىن قورعايمىن دەپ, اق شاشتى انا اقىر­عى قادامىنا باردى. سول جولى ءوز-ءوزىن ورتە­مەك بولعان ايەلدىڭ دەنەسىنىڭ 85 پايىزىن كۇيىك شا­لىپ, كوپبالالى انا اۋرۋحانا توسەگىندە كوز جۇمدى. الايدا, شاراسىز ايەلدىڭ اقىرعى قادامى دا قور­جىنباەۆتار وتباسىن باسپانا داۋىنان قۇتقار­مادى. ايەلدىڭ جىلىن بەرۋگە ءبىر اپتا قالعاندا, سوت ورىنداۋشىلارى مارقۇمنىڭ اتىنا ءۇيدى بوساتۋ قاجەتتىگى تۋرالى ەسكەرتپە قاعازىن جىبەرىپتى. ودان كەيىن ءدال وسى ءىستى قاراعان الاتاۋ اۋداندىق سۋدياسىنىڭ ءوزى ءىستى بولىپ, بۇل داۋ ءبىراز تىنىشتانعان. قازىر قالالىق سوتتان حابار كەلىپ, قارسى تاراپتىڭ اپەللياتسيالىق شاعىمى قارالۋدا. تالاپكەر مەلەتحان ماساقوۆتىڭ ايتۋىنشا, ونىڭ ولگەن ىنىسىمەن بىرگە تۇرعان ايەل ءۇيدى جالعان قۇجات ارقىلى ساتىپ كەتكەن. ال ز.قورجىنباي وتكەن سوت پروتسەسىندە ىسكە تىركەگەن تالاپ-ارىزىندا جاۋاپكەردىڭ قايتىس بولۋىنا بايلانىستى ءىستىڭ توقتاتىلۋىن وتىنگەن. سۋديا ءدال وسى شاعىمدى سوت ماتەريالدارىنان تاپپاپتى. سونداي-اق, سۆەتلانانىڭ كۇيەۋى زەيىش قورجىنباي ءۇيدى قاي­تارسا, ايەلىنىڭ دە ورنىن تولتىرۋدى تالاپ ەتتى. ءسويتىپ, قايتىس بولعان ادام جاۋاپكەرلىككە تار­تىلعان اپەللياتسيالىق ىسكە سوڭعى نۇكتە قويىل­عان جوق. سوت ماتەريالدارىندا كەيبىر شاعىمنىڭ جوعالىپ كەتۋىنە بايلانىستى كەلەسى سوت ءماجىلىسى 18-ناۋرىزدا وتەتىن بولدى. قۇرىش نۇرىمبەت.