• 13 ناۋرىز, 2014

قاتارىنان ءۇش جەڭىس

275 رەت

كورسەتىلدى

1 مين

وقۋ ءۇشىن

Egemen Qazaqstan

استانانىڭ «بارىسىن» كەلەسى كەزەڭگە شىعارۋعا جاقىن

استانانىڭ «بارىس» كومانداسى قۇرلىقتىق حوككەي ليگاسى پلەي-وفف سەرياسىنىڭ ءۇشىنشى ماتچىن ەكاتەرينبۋرگتە جەرگىلىكتى «اۆتوموبيليست» ۇجىمىمەن قارسى وتكىزىپ, قارسىلاسىن قاتارىنان ءۇشىنشى رەت تىزە بۇكتىردى. ەلوردا جاساعى, سونىمەن بىرگە, وسى كەزەڭدەگى ءۇش ويىنىندا ءبىرىنشى رەت نەگىزگى ۋاقىتتا جەڭىسكە جەتتى. ماتچ بارىنشا تارتىستى ءوتتى. بۇعان مۇنىڭ الدىندا استانادا وتكەن ەكى كەزدەسۋدە ۇتىلىپ قالعان الاڭ يەلەرىنىڭ قارىمتا قايتارۋ ءۇشىن بارىن سالعاندارى دا ايتارلىقتاي اسەر ەتتى. ال استاناداعى ەكى ويىننىڭ تاعدىرى دا وۆەرتايمدا شەشىلگەن بولاتىن. وسىنىڭ ءوزى ەكى جاقتىڭ ءبىر-بىرلەرىنە تەڭ قارسىلاس بولا العاندارىن كورسەتسە كەرەك. كەزدەسۋدىڭ ەسەبىن الاڭ يەلەرى 7-مينۋتتا اشتى. ونى فورۆارد ارتيوم چەرنوۆ ءتۇسىردى. ال ويىننىڭ ەكىنشى كەزەڭىندە, 23-مينۋتتا قوناقتار تارازى باسىن تەڭەستىردى. بۇل جولعى شايبانى استانالىق كونستانتين رومانوۆ ءوز ەسەبىنە جازدى. بۇدان كەيىن ماتچ ءبىزدىڭ جىگىتتەردىڭ ءبىرشاما باسىمدىعىمەن ءوربىدى. ولار مۇنى ويىن بىتۋگە 4 مينۋت قالعاندا گولعا اينالدىرا ءبىلدى. ءسويتىپ, شابۋىلشى كونستانتين رۋدەنكو سوققان سوڭعى شايبانىڭ ارقاسىندا «بارىس» ءۇشىنشى جەڭىسىنە قول جەتكىزدى. ەندى استانا حوككەيشىلەرىنە ءبىر رەت جەڭىسكە جەتسە جەتىپ جاتىر, ولار شيرەك فينالعا شىعادى. رۋسلان يگىلىك.