پرەزيدەنت قاسىم-جومارت توقاەۆتىڭ جارلىعىمەن داۋلەت باۋىرجان ۇلىنا ءىىى دارەجەلى «ايبىن» وردەنى بەرىلگەن بولاتىن. قارالى جيىندا حالىق قاھارمانى باقىتجان ەرتاەۆ بۇل قايعى ءبىر عانا وتباسى ەمەس, حالىقتىڭ قايعىسى ەكەنىن جەتكىزدى. ال سارىاعاش اۋدانىنىڭ اكىمى مۇحيت وتارشيەۆ پەن ەل اعالارى, اسكەري سالا باسشىلارى مەن وكىلدەرى, جەرگىلىكتى تۇرعىندار مارقۇمنىڭ وتباسىنا كوڭىل ايتتى.
«داۋلەت – ءوز ەلىنىڭ ناعىز پاتريوتى, انتىنا ادال, جولداستارى اراسىندا سىيلى, ەلىنە ءالى بەرەرى كوپ, بولاشاعىنان ۇلكەن ءۇمىت كۇتتىرەتىن ازامات ەدى. ورنى تولماس اۋىر قايعىلارىڭىزعا ورتاقتاسىپ, شىن جۇرەكتەن كوڭىل ايتامىن. باتىر ۇلدىڭ جارقىن بەينەسى اۋدان حالقىنىڭ, اعايىن-تۋىس, دوس-جاران, ارىپتەستەرىنىڭ جۇرەگىندە ماڭگى ساقتالارى ءسوزسىز», دەدى اۋدان اكىمى.
داۋلەت جۇپاربەكوۆ 2002 جىلى 1 جەلتوقساندا سارىاعاش قالاسىندا دۇنيەگە كەلگەن. تولىباي باتىر اتىنداعى جالپى ورتا مەكتەبىن ءبىتىرىپ, الماتى قالاسىنداعى ۇلتتىق قاۋىپسىزدىك كوميتەتى شەكارا قىزمەتى اكادەمياسىنا وقۋعا تۇسكەن بولاتىن. وتباسىنداعى ەكىنشى پەرزەنت. مارقۇمنىڭ سوڭىندا اردا ازاماتتان قاپيادا كوز جازىپ قالعان اتا-اناسى, اپكەسى جانە ەكى ءىنىسى قالدى.
تۇركىستان وبلىسى
