ورتالىق بارلاۋ قىزمەتىنە ايىپ تاعىلدى
اقش سەناتىنىڭ بارلاۋ جونىندەگى كوميتەتىنىڭ باسشىسى دايەن فاينستاين ورتالىق بارلاۋ قىزمەتىنە كونگرەسس قىزمەتشىلەرى پايدالاناتىن كومپيۋتەرلەرگە بۇزىپ كىردى دەگەن ايىپ تاعىپ وتىر.
سەناتور فاينستاين جۋرناليستەرگە مۇنداي ارەكەتتىڭ زاڭ شىعارۋشى بيلىكتىڭ بارلاۋ قىزمەتتەرىن قاداعالاۋىنا نەگىزدەلگەن كونستيتۋتسيالىق قاعيداتتارعا نۇقسان كەلتىرەتىنىن مالىمدەگەن. ورتالىق بارلاۋ قىزمەتىنىڭ ىشكى تەرگەۋلەر بولىمىنە اقش كونگرەسى كومپيۋتەرلەرىنە بۇزىپ كىرۋ وقيعاسىن تەكسەرۋ تاپسىرىلدى. مەن بۇل ىسكە ۇلكەن ماڭىز بەرە قارايمىن, بۇل تۇرعىدا ورتالىق بارلاۋ قىزمەتىنىڭ فەدەرالدىق زاڭداردى بۇرمالاعان بولۋى ابدەن مۇمكىن, دەپ اتاپ كورسەتكەن فاينستاين. دەگەنمەن, ورتالىق بارلاۋ قىزمەتىنىڭ ديرەكتورى دجون برەننان سەنات تاراپىنان تاعىلعان ايىپتى جوققا شىعارىپ وتىر.
گامبيا اعىلشىن تىلىنەن باس تارتا ما؟
قۇرلىقتىق افريكاداعى ەڭ شاعىن مەملەكەت بولىپ تابىلاتىن گامبيا پرەزيدەنتى يايچ دجاممە ءوزىنىڭ اعىلشىن ءتىلىن رەسمي ءتىل رەتىندە پايدالانۋدان باس تارتاتىنىن مالىمدەدى. بۇل تۋرالى باتىستىق اقپارات قۇرالدارى حابارلاپ وتىر. ءبىز ءوزىمىزدىڭ تۋعان تىلىمىزدە سويلەسپەكپىز, دەپ مالىمدەگەن ول ەلدىڭ استاناسى بانجۋلدە جاڭا ادىلەت مينيسترىنەن انت قابىلداۋ ءراسىمى كەزىندە. دەگەنمەن, ول قاي تايپا ءتىلىنىڭ اعىلشىن ءتىلىن الماستىراتىنىن ناقتى اتاپ كورسەتپەگەن. سونىمەن بىرگە, بۇرىنعى مەتروپولياعا ءبىتىمسىز كوزقاراس ۇستاناتىن 48 جاستاعى ەل پرەزيدەنتىنىڭ ءوز ءسوزىن اعىلشىن تىلىندە ايتقانى دا بەلگىلى بولىپ وتىر.بىرىككەن ۇلتتار ۇيىمىن كىنالاۋدا
گايتيدە تىرىسقاق اۋرۋىنان زارداپ شەككەن بىرنەشە جۇزدەگەن ادام نيۋ-يورك سوتىنا بۇۇ ۇستىنەن ۇجىمدىق تالاپ ارىز تۇسىرگەن. وندا بۇۇ-عا اۋرۋ تاراتتى دەگەن ايىپ تاعىلىپ وتىر.
جول اپاتىنا ۆيتسە-پرەمەر كىنالى
چەحيانىڭ ۆيتسە-پرەمەرى پاۆەل بەلوبرادەك موپەد جۇرگىزۋشىسىن سوعىپ كەتكەن. بۇل تۋرالى جەرگىلىكتى بۇقارالىق اقپارات قۇرالدارى حابارلاعان كورىنەدى. وقيعا ەل استاناسى پراگادا دۇيسەنبى كۇنى كەشكىلىك ورىن العان. پوليتسيانىڭ مالىمەتى بويىنشا, اۆتوموبيل رولىندە كەلە جاتقان بەلوبرادەك كوشە قيىلىسىندا باستى جولمەن كەلە جاتقان موپەدكە جول بەرمەگەن كورىنەدى. سونىڭ سالدارىنان ەكى دوڭعالاقتى كولىك جۇرگىزۋشىسى جەڭىل جاراقات العان. قۇقىق قورعاۋ ورگاندارى ابايسىزدان دەنەگە جاراقات سالۋ دەرەگى بويىنشا ءىس قوزعاعان. ال بەلوبرادەك بولسا, ءوزىنىڭ موپەد جۇرگىزۋشىسىن بايقاماي قالعانىن, دەگەنمەن, اپاتتان كەيىن بىردەن «جەدەل جاردەم» شاقىرعانىن ايتىپ اقتالعان.ۇكىمەت باسشىسى قىزمەتىنەن كەتتى
ليۆيا پارلامەنتىنىڭ دەپۋتاتتارى وتكەن سارسەنبى كۇنى پرەمەر-مينيستر الي زەيدانعا سەنىمسىزدىك بىلدىرگەن. وقيعانىڭ بۇلايشا وربۋىنە سولتۇستىككورەيالىق «مورنينگ گلوري» تانكەرىنىڭ جەرگىلىكتى اسكەري اۋە كۇشتەرى كەمەلەرىنىڭ جولدى جاپقانىنا قاراماستان ليۆيانىڭ ەس-سيدر پورتىنان كەتىپ قالۋى تۇرتكى بولعان.
ەلدىڭ قورعانىس ءمينيسترى ابداللا ءال-تاني, پرەمەر-مينيستر مىندەتىن ۋاقىتشا اتقاراتىن بولادى. ال تۇراقتى پرەمەر-ءمينيستردى ليۆيا پارلامەنتى تاياۋداعى ەكى اپتانىڭ ىشىندە سايلاۋى ءتيىس. ايتا كەتۋ كەرەك, الي زەيدان مۋاممار كاددافي رەجىمى قۇلاتىلىپ, العاشقى پارلامەنتتىك سايلاۋ وتكەن 2012 جىلى ليۆيا ۇكىمەتىن باسقارۋعا كەلگەن بولاتىن. پرەمەر-مينيستر لاۋازىمىندا جۇرگەندە زەيدان تالاي رەت سىنعا دا ىلىكتى. اسىرەسە, ونىڭ ساياساتىن تىم بەيتاراپ دەپ ساناعان يسلاميستەر ەل ۇكىمەتى باسشىسىن ءجيى-ءجيى سىن تەزىنە الاتىن.
26 جىلدان سوڭ اقتالدى
لۋيزيانا سوتى 26 جىل بويى ءولىم جازاسىنا كەسىلگەن ۇكىمدى كۇتىپ وتىرعان 64 جاستاعى گلەنن فوردتى اقتاپ الدى. ول شەشىم شىققاننان كەيىن بىرنەشە ساعاتتان سوڭ-اق بوستاندىققا شىققان. فوردتقا ونىڭ ادۆوكاتتارى ادام ءولىمى بولعان كەزدە ونىڭ قىلمىس ورىن العان جەردە بولماعانىن دالەلدەگەننەن كەيىن عانا اقتالۋدىڭ ءساتى تۇسكەن. فوردتقا 1980 جىلعى قىلمىستىق ءىس بويىنشا زەرگەر جانە ساعات شەبەرى يزيدورا روزماندى ءولتىردى دەگەن ايىپ تاعىلعان بولاتىن. ويتكەنى, فوردت روزمانمەن تانىس بولىپ, كەيدە وعان ءۇي شارۋاسىندا كومەكتەسىپ تە تۇرعان. سونىمەن بىرگە, ول ءوزىنىڭ زەرگەردىڭ ولىمىنە ەش قاتىسى جوق ەكەنىن دە ايتۋمەن بولعان ەكەن. وسىلايشا فوردتقا وزىنە قاتىستى شىعارىلعان ۇكىمنىڭ ورىندالۋىن 26 جىل بويى كۇتۋگە تۋرا كەلگەن. ينتەرنەت ماتەريالدارى نەگىزىندە ازىرلەندى.
