قر پرەمەر-مينيستر رەسمي سايتىنىڭ مالىمەتىنشە, اقتوبە, اتىراۋ, ماڭعىستاۋ وبلىستارىندا – گازدىڭ ءليترى 50 تەڭگە ( 200 شاقىرىمنان اساتىن شالعاي اۋداندار ءۇشىن – ليترىنە 55 تەڭگە) بولىپ بەلگىلەندى. ال شىمكەنت قالاسىندا شىعىس قازاقستان, جامبىل, باتىس قازاقستان, قىزىلوردا جانە تۇركىستان وبلىستارىندا گازدىڭ ءليترى 60 تەڭگەدەن (200 شاقىرىمنان اساتىن شالعاي اۋداندار ءۇشىن - ليترىنە 65 تەڭگە) ساتىلادى. الماتى قالاسىندا ءليترى 65 تەڭگە بولادى. نۇر-سۇلتان قالاسىندا, اقمولا, الماتى, قوستاناي, قاراعاندى, پاۆلودار, سولتۇستىك قازاقستان وبلىستارىندا گازدىڭ ءليترى 70 تەڭگە ( 200 شاقىرىمنان اساتىن شالعاي اۋدانداردا – ليترىنە 75 تەڭگە) بولىپ بەكىتىلدى.
ايتا كەتەرلىگى, سۇيىتىلعان مۇناي گازىن ەلەكتروندى ساۋدا الاڭدارى ارقىلى ساتۋعا تولىقتاي اۋىسۋ ءبىر جىلعا كەيىن شەگەرىلدى.
بەنزين مەن ديزەل وتىنىن ساتۋعا ۋاقىتشا 180 كۇنگە باعانى مەملەكەتتىك رەتتەۋ ەنگىزىلدى. بەنزيننىڭ قوسىمشا قۇن سالىعىن ەسەپكە الا وتىرىپ بولشەك ساۋداسىنا كەلەسىدەي شەكتى باعالار بەلگىلەندى: اي-80 ماركالى – ليترىنە 89 تەڭگە; اي-92 ماركالى – ليترىنە 182 تەڭگە; اي-93 ماركالى – ليترىنە 182 تەڭگە; اي-95 ماركالى – ليترىنە 215 تەڭگە.
ديزەل وتىنىنىڭ (جازعى, ماۋسىمارالىق) ققس ەسكەرە وتىرىپ, بولشەك ساۋداسىنا شەكتى باعالار وڭىرگە بايلانىستى بەلگىلەندى:
اقمولا, اقتوبە, شىعىس قازاقستان, باتىس قازاقستان, قوستاناي, سولتۇستىك قازاقستان وبلىستارىندا – ليترىنە 260 تەڭگە;
نۇر-سۇلتان, الماتى, شىمكەنت قالالارى, الماتى, اتىراۋ, جامبىل, قاراعاندى, قىزىلوردا, پاۆلودار, تۇركىستان وبلىستارىندا – ليترىنە 230 تەڭگە.
جاڭاوزەن قالاسىندا جاڭادان گاز وڭدەۋ زاۋىتىنىڭ قۇرىلىسىنا دايىندىق جۇمىستارى جەدەلدەتىلدى.
تاياۋ ۋاقىتتا رەتتەلەتىن كوممۋنالدىق قىزمەتتەرگە: سۋمەن قامتاماسىز ەتۋ, سارقىندى سۋلاردى بۇرۋ, جىلۋمەن قامتاماسىز ەتۋ, گازبەن قامتاماسىز ەتۋ جانە ەلەكترمەن قامتاماسىز ەتۋگە تاريفتەردىڭ كوتەرىلۋىنە 180 كۇنگە ۋاقىتشا ماراتوري ەنگىزىلەتىن بولادى.
الەۋمەتتىك ماڭىزى بار ازىق-ت ۇلىك تاۋارلارىنا, ونىڭ ىشىندە سيىر, قوي ەتتەرى, كارتوپ جانە سابىزگە باعالاردى تۇراقتاندىرۋ ماقساتىندا ءىرى قارا مەن ۇساق مالداردى 6 ايعا, كارتوپ پەن ءسابىزدى 3 ايعا شەتەلگە شىعارۋعا تىيىم سالىندى.
