جاپوندىق مامانداردىڭ ايتۋىنشا, عارىش اپپاراتىن 10 سانتيمەترلىك كىشىگىرىم شارشى رەتىندە جاساۋ جوسپارلانىپ وتىر. جەرسەرىكتىڭ سىرتقى قاباتى اعاشتان جاسالماق. ونىڭ سىرتىنا كۇن باتارەيالارى, ال ىشىنە انتەننا قوسىلعان ەلەكتروندىق جابدىق ورناتىلادى.
اقپان ايىندا جاپونيانىڭ اەروعارىشتىق زەرتتەۋلەر اگەنتتىگىنىڭ عارىشكەرى تاكاو دوي عارىشتا اعاش سۇرەگىن سىناپ كورەدى. ول حالىقارالىق عارىش ستانتسياسىنداعى زەرتتەۋ ءمودۋلىنىڭ سىرتىنا اعاشتىڭ بىرنەشە تۇرىنەن جاسالعان پانەلدەر بەكىتەدى. ولار اشىق عارىشتا شامامەن توعىز ايعا قالدىرىلادى.
جاپوندىق مامانداردىڭ ويىنشا, جەرسەرىكتەردى اعاشتان جاساۋ ارزانعا تۇسەدى. قازىرگى قولدانىستاعى جەرسەرىكتەر الليۋمينيدەن جاسالعان.
كيوتو ۋنيۆەرسيتەتىنىڭ پروفەسسورى ءدويدىڭ ايتۋىنشا, جوسپار جۇزەگە اسىرىلسا, عارىشقا قىزىعۋشىلىق تانىتقان بالالاردىڭ ءوزى جەرسەرىك جاساي الاتىن بولادى. جەرسەرىكتى جاساۋمەن كيوتو ۋنيۆەرسيتەتى مەن Sumitomo Forestry كومپانياسىنىڭ ماماندارى اينالىسىپ جاتىر.
