پرەزيدەنتتىڭ العىسحاتىندا: ء«وزىڭنىڭ جاستىعىڭا قاراماستان, سەن ناعىز ۇلكەن ەرلىك جاسادىڭ! اجال ارانىندا قالعان وزىڭدەي ورىمدەي جاس بالالارعا دەر كەزىندە ويلانباستان كومەككە ۇمتىلىپ, باتىلدىق پەن شىنايى قاھارماندىقتىڭ ۇلگىسىن كورسەتتىڭ! ۇلكەن قايعى-قاسىرەتكە جول بەرمەدىڭ», دەپ جازدى.
قاسىم-جومارت كەمەل ۇلى توقاەۆتىڭ العىسحاتىن باتىر بالاعا وبلىس اكىمى ارحيمەد مۇحامبەتوۆ تابىس ەتتى. سونداي-اق ولەگ پيروگ قازاقستان رەسپۋبليكاسى توتەنشە جاعداي مينيسترلىگىنىڭ «ورتتە كورسەتكەن قايسارلىعى ءۇشىن» مەدالىمەن, ال ولەگتىڭ اناسى ۆالەنتينا پيروگ وسى مينيسترلىكتىڭ العىسحاتىمەن ماراپاتتالدى.
مەملەكەت باسشىسىنىڭ ۇندەۋىن Allur كومپانيالار توبى دا قولداپ, جاس قاھارمانعا قوستانايداعى «سارىارقااۆتوپروم» سەرىكتەستىگىندە جاسالعان Chevrolet Nexia ءاۆتوموبيلىن مىنگىزدى.
– ءبىزدىڭ پرەزيدەنتىمىز قازاقستاندىقتاردىڭ وسىنداي ەرلىك ىستەرىن ءاردايىم كورە بىلەدى جانە باعالايدى. قازاق جەرى قاشاندا باتىر ۇلدارىمەن داڭققا بولەنگەن. جاپ-جاس بالانىڭ ءوزى ءبىلىپ جاساعان ونەگەلى ءىسى – ۇلكەن-كىشىگە بىردەي ۇلگى, تاڭعالۋعا تۇرارلىق ناعىز ەرلىك ەكەنى ءسوزسىز, – دەدى «Allur» كت» اق ديرەكتورلار كەڭەسىنىڭ توراعاسى اندرەي لاۆرەنتەۆ.
اندرەي لاۆرەنتەۆ بۇل سىيلىق ولەگ پيروگتىڭ ەرلىك ارەكەتىن جوعارى باعالاعان كاسىپورىننىڭ بارلىق قىزمەتكەرلەرىنىڭ اتىنان ەكەنىن اتاپ ءوتتى.
ايماق باسشىسى ارحيمەد مۇحامبەتوۆ ەرلىكتى دارىپتەپ, باتىر بالاعا كولىك سىيلاعان كاسىپورىن باسشىلىعى مەن ولەگ پيروگتىڭ اتا-اناسىنا العىس ايتتى.
بۇدان بۇرىن وبلىس اكىمى ءورت سالدارىنان باسپاناسىز قالعان ومىرزاقوۆتار وتباسىنا قوستاناي قالاسىنداعى 3 بولمەلى پاتەردىڭ كىلتىن تابىس ەتكەن بولاتىن.
قوستاناي وبلىسى
